ޑޭވިޑް މިލާ އާއި ލުންގީ އެންގިޑީ އަކީ ދެކުނު އެފްރިކާއިން އެންމެ ފަހުން އަނިޔާވި ދެ ކުޅުންތެރިން ކަމަށް ވެއްޖެ އެވެ.
މިއީ އަންނަ މަހުގެ 19 ވަނަ ދުވަހު ޕާކިސްތާނުގައި ފަށާ ޗެމްޕިއަންސް ޓްރޮފީ މުބާރާތުގެ ކުރިން ދެކުނު އެފްރިކާ އަށް ތަޖުރިބާ ކުރަން ޖެހުނު ފަސް ވަނަ އިންޖަރީގެ މައްސަލަ އެވެ. މި ދެ ކުޅުންތެރިން މިހާރު އަންނަނީ މުބާރާތް ފަށަންވާއިރަށް ފިޓްވުމުގެ މަސައްކަތް ފަށައިފަ އެވެ.
މީގެ އިތުރުން މިޑްލް އޯޑަރ ބެޓްސްމަން މިލާ އަށް އަނިޔާވީ ބޯޅަ ހޮވަން އުޅުމުގެ ތެރޭގަ އެވެ. އޭނާ ދަނޑުން ބާލަން ޖެހުނީ މެޑިކަލް ޓީމުގެ އެހީތެރިކަމާއެކުގަ އެވެ. މީގެ އިތުރުން އެންރިޗް ނޯޖޭ ވަނީ އުނގަނޑުގެ މައްސަލައަކާ ހުރެ މި ފަހަރުގެ މުބާރާތް ކުޅޭ ޓީމުން އުނިކޮށްފަ އެވެ. އެއީ މުބާރާތަށް އޭނާ ފިޓްވާނެ ކަމުގެ ކުޑަވެސް އުއްމީދެއް ނެތުމުންނެވެ. މީގެ އިތުރުން ބާރު އުކުންތެރިޔާ ނަންދްރޭ ބާގާ އާއި ލިޒާޑް ވިލިއަމްސް އަދި ޑަރައިން ޑުޕަވިލޮން އާއި ވިއާން މުލްޑާ އާއި އޮޓެނީލް ބާޓްމަން އަކީ ވެސް އަނިޔާގެ މައްސަލަތަކުގެ ސަބަބުން ޓީމުން ޖާގަ ނުލިބިދާނެ ކަމަށް ބެލެވިފައިވާ ކުޅުންތެރިންނެވެ.
ދެކުނު އެފްރިކާގެ ކޯޗު ޓްރެވޯ ޕެނީ ބުނީ ކުރިޔާ ވެސް ކުޅެވޭނަމަ މިއިން ކޮންމެ ކުޅުންތެރިއަކު ވެސް ޓީމުގައި ހިމަނާނެ ކަމަށެވެ.
"ލުންގީ އަކީ ވަރަށް ބާރު އުކުންތެރިއެއް. މިކަހަލަ ބައެއް ކުޅުންތެރިންނަށް ކުރިމަތިވާ އަނިޔާ ރަނގަޅުވާން ގިނަ ދުވަސްތަކެއް ހޭދަވޭ ބައެއް ފަހަރު. އެކަމަކު އަހަރުމެންނަށް ކިރިޔާ ގޮތެއް އޮތް ނަމަވެސް އޭނާ ނުލައި ޓީމު ފައިނަލް ނުކުރާނެ،" ކޯޗު ބުންޏެވެ.
ޗެމްޕިއަންސް ޓްރޮފީގައި ދެކުނު އެފްރިކާ ހިމެނެނީ އަފްގާނިސްތާނާއި އޮސްޓްރޭލިޔާ އަދި އިންގްލޭންޑާއެކު ގްރޫޕް ބީ ގަ އެވެ. މުބާރާތުގެ ފުރަތަމަ މެޗުގައި އެ ގައުމު ވާދަކުރާނީ ފެބްރިއަރީ މަހުގެ 21 ވަނަ ދުވަހު އަފްގާނިސްތާނާ އެވެ. މި މެޗު ކުޅޭނީ ޕާކިސްތާނުގެ ކަރާޗީގަ އެވެ.