ގޯތިތައް ހަވާލުކުރުމުގައި ޤާނޫނާއި ޚިލާފަށް އެއްވެސް ކަމެއް ކޮށްފައެއް ނޯންނާނެ: އެޗްޑީސީ

ބިންވެރިޔާ ސްކީމްގެ ދަށުން ހުޅުމާލެއިން ގޯތިތައް ހަވާލުކުރުމުގައި ޤާނޫނާއި ޚިލާފަށް އެއްވެސް ކަމެއް ކޮށްފައެއް ނޯންނާނެކަމަށް އެޗްޑީސީގެ މެނޭޖިން ޑިރެކްޓަރ އިބްރާހިމް ފަޒުލް ރަޝީދު ވިދާޅުވެއްޖެއެވެ.

އެޗްޑީސީގެ މެނޭޖިން ޑިރެކްޓަރ ފަޒުލް ރަޝީދު މިހެން ވިދާޅުވީ ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް އެޗްޑީސީން ގޯތިތަކެއް ދީފައިވާކަމަށް ބުނެ މީޑިއާގައި ފަތުރަމުންދާ ވާހަކަތާއި ގުޅޭގޮތުން ނޫސްވެރިންނަށް މައުލޫމާތު ދެއްވަމުންނެވެ.

އެޗްޑީސީގެ މައި އޮފީހުގައި ނޫސްވެރިންނަށް މައުލޫމާތު ދެއްވަމުން މެނޭޖިން ޑިރެކްޓަރ ފަޒުލް ރަޝީދު ވިދާޅުވީ ބިންވެރިޔާ ސްކީމްގެ ދަށުން ގޯތިތައް ދޭނެ ފަރާތްތައް ކަނޑައަޅަނީ އެޗްޑީސީން ނޫންކަމަށާއި، އެއީ ހައުސިން މިނިސްޓްރީން ކުރިއަށްގެންދަވާ މަސައްކަތެއްކަމަށެވެ. އަދި ހައުސިން މިނިސްޓްރީން ގޯތި ދޭން ނިންމާފައިނުވާ ބަޔަކަށް އެޗްޑީސީން ގޯއްޗެއް ދީފައިނުވާނެކަމަށްވެސް ފަޒުލް ވިދާޅުވިއެވެ.

"އަޅުގަނޑުމެންގެ ޕޯޓަލް މެދުވެރިކޮށް އެޕްލައި މިކުރަނީ އެ ރަޖިސްޓްރީއެއް އޮންނަ ފަރާތެއްކަމަށް އަޅުގަނޑުމެން މި ޤަބޫލު ކުރަނީ. އެހިސާބުން ފެށިގެން ބައުންޑަރީ ޕާމިޓް އަޅުގަނޑުމެން ދޫކޮށްލަނީ. ދޫކޮށްލާ ހާލަތުގައި ވެރިފިކޭޝަން ޕްރޮސެސްއެއް އިނީޝިއޭޓްކޮށްފައިވާނެ." އެޗްޑީސީގެ މެނޭޖިން ޑިރެކްޓަރ އިބްރާހިމް ފަޒުލް ރަޝީދު ވިދާޅުވިއެވެ.

ފަޒުލް ވިދާޅުވީ މީޑިއާގައި މިހާރު ފެންމަތިވެގެން އުޅޭ ގޯތިތަކުގެ މައްސަލައަކީވެސް އެޗްޑީސީން ފާހަގަކޮށް، ކަމާބެހޭ ފަރާތްތަކަށް ހުށަހެޅުއްވި މައްސަލައެއްކަމަށެވެ. އެގޮތުން އެޗްޑީސީއަށް މައްސަލަ ފާހަގަވީ 2 ގޯއްޗެއްގައިކަމަށާއި، އެކަމާއި ގުޅިގެން ބަލަންޖެހޭ ކަންކަން ބެއްލެވުމަށް ހައުސިން މިނިސްޓްރީއަށް ހުށަހެޅުއްވީ އެޗްޑީސީން އިސްނަގައިގެންކަންވެސް ފަޒުލް ވިދާޅުވިއެވެ.

"ފުރަތަމަ ޕްލޮޓްގައި ޕާމިޓަށް އައީ 30 ޖޫންގައި އެއީ ޕްލޮޓް ނަންބަރު 20768. އޭގެ ފަހުގައި 17 ޖުލައިގައި ދެވަނަ ރިކުއެސްޓެއް އައުމުން 24 ޖުލައިގައި ވާނީ ހައުސިން މިނިސްޓްރީއަށް ހިއްސާކޮށްފައި. އޭގެ ޖަވާބު ލިބުނީ 15 އޯގަސްޓުގައި. ޕްލޮޓް ނަންބަރު 20821 އަޅުގަނޑުމެންނަށް ފުރަތަމަ ރިކުއެސްޓް އައިސްފައި އޮތީ 19 ޖޫންގައި. ދެވަނަ ބައުންޑަރީ ރިކުއެސްޓް ޕާމިޓް އައިސްފައިވަނީ 17 ޖުލައިގައި. އެކަން ވެރިފައި ކުރުމަށްޓަކައި ހައުސިން މިނިސްޓްރީއަށް 22 ޖުލައިގައި 2024 ގައި ފޮނުވިން. ޖަވާބު އައީ 15 އޯގަސްޓުގައި." އެޗްޑީސީގެ މެނޭޖިން ޑިރެކްޓަރ އިބްރާހިމް ފަޒުލް ރަޝީދު ވިދާޅުވިއެވެ.

ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް ގޯތިތަކެއް ދީފައިވާކަމަށް ބުނާ މައްސަލަ ފުލުހުން ތަހުޤީޤުކުރައްވަމުން ގެންދަވާއިރު، އެޗްޑީސީގެ ފުރިހަމަ އެއްބާރުލުން މުއައްސަސާތަކަށް ލިބޭނެކަމަށްވެސް ފަޒުލް ވިދާޅުވިއެވެ. އަދި އެޗްޑީސީން ޤާނޫނާއި ހިލާފަށް އެއްވެސް ކަމެއް ކޮށްފައި ނޯންނާނެކަމުގެ ފުރިހަމަ ޔަޤީންކަން އެބައޮތްކަމަށްވެސް ފަޒުލް ވިދާޅުވިއެވެ.

ފަޒުލް ފާހަގަކުރެއްވި ގޮތުގައި ގޯތިތައް ހަވާލުކުރުމުގައި އަމިއްލަ މަސްލަހަތު ގެންގުޅުއްވިކަމަށް ބުނެ ދައްކާ ވާހަކަތަކަކީ ސިޔާސީ މަންފާއަށް ބަޔަކު ފަތުރާ ދޮގު ވާހަކަތަކެއްކަމަށެވެ. އަދި ޖަވާބުދާރީ ނުވެވޭފަދަ އެއްވެސް ކަމެއް ކުރައްވާފައި ނުވާނެކަމަށްވެސް ފަޒުލް ވިދާޅުވިއެވެ.