އަންނަ އަހަރުގެ ބަޖެޓުން ފައިސާ ދޭނީ 5 ޕާޓީއަކަށް

އަންނަ އަހަރަށް ލަފާކޮށް ފާސްކޮށްފައިވާ ދައުލަތުގެ ބަޖެޓުން ސިޔާސީ ޕާޓީތަކަށް ދޫކުރާ ފައިސާ ލިބުމުގެ ޝަރުތު ހަމަވަނީ 5 ސިޔާސީ ޕާޓީއެއްކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.

ސިޔާސީ ޕާޓީތަކުގެ ގާނޫނު އޮންނަ ގޮތުން ދައުލަތުގެ ބަޖެޓުން ފައިސާ ދޫކުރަނީ 10،000 މީހުން ހަމަވާ ޕާޓީތަކަށެވެ. އިލެކްޝަންޝް ކޮމިޝަނުން ވިދާޅުވީ އަންނަ އަހަރަށް ލަފާކޮށް ފާސްކޮށްފައިވާ ދައުލަތުގެ ބަޖެޓުން ފައިސާ ލިބުމުގެ ޝަރުތު ހަމަވަނީ 5 ސިޔާސީ ޕާޓީއެއްކަމަށެވެ. އެ ޕާޓީތަކަކީ،

ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ)
ޕީޕަލްސް ނޭޝަނަލް ކޮންގްރެސް (ކޮންގްރެސް ޕަޓީ)
އަދާލަތު ޕާޓީ
ޖުމްހޫރީ ޕާޓީ
މޯލްޑިވްސް ޑިވެލޮޕްމަންޓް އެލެޔަންސް (އެމް.ޑީ.އޭ)

10،000 މެންބަރުން ހަމަވާ ޕާޓީތަކުގެ ތެރޭގައި އުވާލަން ނިންމާފައިވާ ޕީޕީއެމްވެސް ހިމެނެއެވެ. ނަމަވެސް އެ ޕާޓީ އުވާލުމުގެ އިދާރީ ކަންކަން އިލެކްޝަންސް ކޮމިޝަނުން މިހާރު ކުރިއަށްގެންދަތީ އެ ޕާޓީއަށް ފައިސާ ދޫނުކުރާނެކަމަށް އެ ކޮމިޝަނުން ވިދާޅުވެއެވެ.

އިލެކްޝަންސް ކޮމިޝަނުން ވިދާޅުވީ ބަޖެޓުން ފައިސާ ދިނުމަށް ކަނޑައެޅުއްވި ފަސް ޕާޓީގެ ތެރެއިން ކޮންމެ ޕާޓީއަކަށްވެސް ދޫކުރާނެ ފައިސާގެ އަދަދު ކަނޑައަޅާނީ މިމަހުގެ ނިޔަލަށް ޕާޓީތަކުގައި މެންބަރުން ތިބި ނިސްބަތަށް ބަލައިގެންކަމަށެވެ.

މީގެކުރިން ސިޔާސީ ޕާޓީތަކަށް ފައިސާ ދޫކުރަނީ އެ އަހަރެއްގެ ދައުލަތުގެ ބަޖެޓުން %0.1 އާއި %0.2 އާއި ދެމެދުގެ އަދަދެކެވެ. ނަމަވެސް ޤާނޫނު އިސްލާހުކުރުމަށްފަހު މިހާރު ވަނީ ބަޖެޓުން އެ އަހަރަކަށް ލަފާކުރާ އާމްދަނީގެ %0.1 އާއި %0.2 އާއި ދެމެދުގެ އަދަދެއް ޕާޓީތަކަށް ދޫކުރާގޮތަށް ކަނޑައަޅުއްވާފައެވެ.

މިއަހަރަށް ފާސްކުރި ބަޖެޓުން ސިޔާސީ ޕާޓީތަކަށް ދޫކޮށްފައިވަނީ 44 މިލިއަން ރުފިޔާއެވެ. އެ ފައިސާ 6 ސިޔާސީ ޕާޓީއަކަށް ބަހާފައިވާއިރު އޭގެ ތެރޭގައި، ހިމެނެނީ އަންނަ އަހަރުގެ ބަޖެޓުންވެސް ފައިސާ ދޫކުރުމަށް ކަނޑައެޅުއްވި 5 އާއި ޕީޕީއެމްއެވެ.