އަލިފާނުގެ ހާދިސާ: 7 ގޭބިސީއަކުން 29 މީހަކު ވަގުތީ ހިޔާތަކަށް ބަދަލުކުރަނީ

މިއަދު ހިނގި އަލިފާނުގެ ހާދިސާގައި 29 މީހަކު ވަގުތީ ހިޔާތަކަށް ބަދަލުކުރުމުގެ މަސައްކަތް ކުރަމުންދާކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ވިދާޅުވެއްޖެއެވެ.

މިއަދު އިމާރާތްކުރުމާއި ބިނާރާ ބެހޭ ވުޒާރާގެ އިމާރާތުގައި ހިނގި އަލިފާނުގެ ހާދިސާގައި އެ ސަރަޙައްދުގައި ހުރި ގެތަކަށް ވަނީ އެކިވަރުގެ ގެއްލުންތައް ލިބިފައެވެ. އެގޮތުން 3 އިމާރާތެއްގެ 7 ގޭބިސީއަކުން 29 މީހުން ވަގުތީ ހިޔާތަކަށް ބަދަލުކުރުމުގެ މަސައްކަތް ކުރަމުންދާކަމަށް އެންޑީއެމްއޭއިން ވިދާޅުވެއެވެ. މީގެ ތެރޭގައި ހިމެނެނީ 15 ފިރިހެނުންނާއި 14 އަންހެނުންނެވެ. އެއީ މ.ލޯކަށިގެ، މ.ކުދިމާވިލާ، އަދި މ.ލޫބިޔާ މި 3 ގޭގެ މީހުންނެވެ.

އަލިފާނުގެ ހާދިސާއާ ގުޅިގެން އެންޑީއެމްއޭއިން ވަނީ ސޯޝަލް ސެންޓަރުގައި އިމަޖެންސީ އިވެކުއޭޝަން ސެންޓަރެއް ޤާއިމްކޮށްފައެވެ. އެތަނުގައި މިހާދިސާއަށް ގުޅިގެން އެހީ ބޭނުންވާ މީހުންނަށް އެހީތެރިވުމަށް ސައިކޯ ސޯޝަލް ސަޕޯޓްގެ ޚިދުމަތްތައްވެސް އަންނަނީ ފޯރުކޮށްދެމުންނެވެ.

އަލިފާނުގެ ހާދިސާއާ ގުޅިގެން 50އަށްވުރެ ގިނަ މީހުންނަށް އހެިތެރިކަން ބޭނުންވާކަމަށް މިހާތަނަށް ފާހަގަކޮށްފައިވެއެވެ. އަދި އެމީހުންނަށް ބޭނުންވާ ޒަރޫރީ ބައެއްކަންކަން ހަމަޖައްސާދީފައިވާކަމަށާއި ބައެއް މީހުން އެމީހުންގެ އާއިލާގެ ގެތަކަށް ބަދަލުވާން ބޭނުންވުމުން އެކަމުގެ ހުއްދަވެސް ދީފައިވާކަމަށް އެންޑީއެމްއޭއިން ވަނީ ވިދާޅުވެފައެވެ.