ޣައްޒާއަށް ދެމުންދާ ޙަމަލާތައް ޝަރުތަކާ ނުލައި ހުއްޓައިލަން އދގެ ޢާންމު މަޖިލީހުން ފާސްކޮށްފި

ފަލަސްތީނުގެ ޣައްޒާއަށް، ޔަހޫދީ އިސްތިޢުމާރީ ފައުޖުން ދެމުންދާ ޙަމަލާތައް، އެއްވެސް ޝަރުތަކާ ނުލައި، ވަގުތުން ހުއްޓައިލުމަށް ބާރު އަޅައި، އދގެ ޢާންމު މަޖިލީހުން ޤަރާރެއް ފާސްކޮށްފިއެވެ.

ޣައްޒާގައި ދިރިއުޅޭ ފަލަސްތީނުގެ މައުސޫމް ދެ މިލިޔަން މީހުންނާ ދެކޮޅަށް ޔަހޫދީ އިސްތިޢުމާރީ ފައުޖުން ހިންގަމުންދާ ލާއިންސާނީ ޖަރީމާތައް ހުއްޓުވަން މީގެ ކުރިން ފާސްކޮށްފައިވާ ދެ ޤާރާރާ ޚިލާފަށް، މި ފަހަރުގެ ޤަރާރުގައި ޔަހޫދީ ދައުލަތަށް ގޮވާލާފައިވާ ގޮވައިލުން ވަނީ ކުރީ ފަހަރުތަކަށް ވުރެ ހަރުކަށި އިބާރާތަކުންނެވެ.

އެ ޤަރާރު ފާސްކޮށްފައިވަނީ، ޖުމްލަ 193 މެންބަރު ޤައުމުގެ މައްޗަށް އެކުލެވޭ އދގެ ޢާންމު މަޖިލީހުގެ 153 ޤަޢުމުގެ ވޯޓާ އެކުއެވެ. އެމެރިކާއާއި އިސްރާއީލާ އެކު އިތުރު ހަތް ޤައުމަކުން އެ ގަރާރާ ދެކޮޅަށް ވޯޓު ދިން އިރު، 13 ޤައުމަކުން ވަކި ކޮޅަކަށް ވޯޓު ދީފައެއް ނުވެއެވެ.

އދގެ ޢާންމު މަޖިލީހުގެ ޤަރާރުތަކަށް ޢަމަލުކުރުން ލާޒިމު ނުވި ނަމަވެސް، މި ޤަރާރު މެދުވެރިކޮށް އިސްރާއީލުން ހަނގުރާމައިގެ ނަމުގައި ފަލަސްތީނުގައި ހިންގަމުންދާ ލާއިންސާނީ ޖަރީމާތަކާ މެދު ދުނިޔޭގެ ގިނަ ޤައުމުތައް ދެކޭ ގޮތް ހާމަކޮށްފައިވާތީ، އޭގައި ސިޔާސީ ބުރަދަން ހުންނާނެއެވެ.

އދގެ ޢާންމު މަޖިލީހުން ވަނީ، ނިމަކެތި ހާލުގައި ދިރިއުޅެމުންދާ ފަލަސްތީނުގެ ރައްޔިތުންނަށް އެހީ ފޯރުކޮށްދެމުންދާ، އދގެ ރެފިޔުޖީ އޭޖެންސީ (އަންރުވާ)ގެ ދިފާޢުގައި ތެދުވެ، އިތުރު ޤަރާރެއް ފާސްކޮށްފައެވެ.

އިސްރާއީލުން ވަނީ، އަންރުވާގެ ޙަރަކާތްތައް އަންނަ ޖެނުއަރީ މަހުގެ ފަހުކޮޅުން ފެށިގެން ހުއްޓުވަން ޤާނޫނެއް ފާސްކޮށްފައެވެ.

ޖުމްލަ 159 މެންބަރު ޤައުމުން ތާޢީދުކުރި ޤަރާރުގައި ވަނީ، އަންރުވާގެ ދަޢުރު ފުރިހަމައަށް އަދާކުރެވޭ ގޮތަށް، އެއްވެސް ހުރަހެއް ނެތި މަސައްކަތް ކުރެވޭނެ މަގު ފަހިކުރުމަށް އިސްރާއީލަށް ގޮވާލައިފައެވެ. އެ ޤަރާރަށް ވެސް އެމެރިކާއާއި އިސްރާއީލާ އެކު ހަތް ޤައުމަކުން ދެކޮޅު ހެދިއެވެ. އަދި 11 ޤައުމަކުން ވަކި ކޮޅަކަށް ވޯޓު ދީފައެއް ނުވެއެވެ.

"މި ޤަރާރުތަކުން އަޅުގަނޑުމެން ދުނިޔެއަށް ދޭ މެސެޖުތައް ވަރަށް މުޙިންމު. އެހެންކަމުން މި ދެ ޤަރާރުގައި ވެސް ބޮޑެތި މައްސަލަތަކެއް އެބަހުރި،" އދގައި ހުންނަވާ އެމެރިކާގެ ސަފީރުގެ ނައިބު ރޮބަޓް ވުޑް ޢާންމު މަޖިލީހުގައި ވާހަކަ ދައްކަވަމުން ވިދާޅުވިއެވެ.

"އެއް ޤަރާރުން ހަމާސަށް ހިތްވަރުދީ، ރަހީނުން މިނިވަންކުރުމުގެ މުޙިއްމުކަން ކުޑަވޭ. އަނެއް ޤަރާރުން ފަލަސްތީނުގެ ރައްޔިތުންނަށް އިންސާނީ އެހީތެރިކަން އިތުރުކުރުމަށް ކުރިއަށް ދާނެ މަގެއް ނުދައްކައި، އިސްރާއީލް ބަދުނާމު ކުރީ،" އޭނާ ވިދާޅުވިއެވެ.

ވުޑް މިހެން ވިދާޅުވި ނަމަވެސް، ޢާންމު މަޖިލީހުން މިއަދު ފާސްކުރި ޤަރާރުގައި، ހަމާސުން ރަހީނުކޮށްފައިވާ ޔަހޫދީން މިނިވަންކުރަން ވެސް ގޮވާލާފައިވެއެވެ.

އދގެ ޢާންމު މަޖިލީހުން އަންރުވާ އުފެއްދީ، ޔަހޫދީ ދައުލަތް އުފެއްދުމަށް ކުރި ހަނގުރާމައަށް ފަހު 1949 ވަނަ އަހަރެވެ. ޣައްޒާ، ހުޅަނގު އައްސޭރި، ސޫރިޔާ، ލުބުނާން އަދި އުރުދުންގައި ދިރިއުޅޭ އެތައް މިލިއަން ފަލަސްތީންގެ ރައްޔިތުންނަށް ސިއްޙީ، ތައުލީމު އަދި ކާބޯތަކެތީގެ އެހީ ފޯރުކޮށްދޭ އަންރުވާގެ ބަދަލުގައި، އެ މަސައްކަތް ކުރެވޭނެ އެހެން ޖަމްޢިއްޔާއެއް ނެތް ކަމަށް އދން ވަނީ ބުނެފައެވެ.