އަލިފާނުގެ ހާދިސާ: ނޭވާލާން އުނދަގޫވުންފަދަ ކަމެއް ދިމާވާނަމަ ސިއްޙީ އެހީތެރިއެއްގެ ލަފާހޯދުމަށް އިލްތިމާސްކޮށްފި

ނޭވާލާން އުނދަގޫވެ، ބޯއެނބުރުން ފަދަ ކަމެއް ދިމާވެއްޖެނަމަ ލަސްނުކޮށް ޞިއްޙީ އެހީތެރިއެއްގެ ލަފާހޯދުމަށް ސިއްޙަތާއި ބެހޭ ވުޒާރާއިން އިލްތިމާސްކޮށްފިއެވެ. ސިއްޙަތާއި ބެހޭ ވުޒާރާއިން މިގޮތައް އިލްތިމާސްކޮށްފައިވަނީ މާލޭގައި މިއަދު ހިނގި އަލިފާނުގެ ހާދިސާއާއި ގުޅިގެން މުޅި މާލެއަށް ދުމުގެ އަސަރުކޮށްފައިވާތީއެވެ.

ސިއްޙަތާއި ބެހޭ ވުޒާރާއިން ވިދާޅުވީ، ނޭވާލާ ނިޒާމް އަދި ހިތުގެ ބަލިތައް ހުންނަ ފަރާތަތްކަށް ދުނުގެ ސަބަބުން ކުރާ ނޭދެވޭ އަސަރު ބޮޑުވުން އެކަށީގެންވާކަމަށެވެ. އެހެންކަމުން ނޭވާ ކުރުވުން، ނޭވާލާން އުނދަގޫވުން، ގަދަޔަށް ކެއްސުން އަދި ބޯ އެނބުރުން ފަދަ އަލާމާތެއް ފެނިއްޖެނަމަ ލަސްނުކޮށް ޞިއްޙީ އެހީތެރިއެއްގެ ލަފާހޯދުމަށް އެދޭކަމަށެވެ.

އަލިފާނުގެ ހާދިސާއާއި ގުޅިގެން ސަމާލުކަން ދޭންވީ ބައެއް ކަންކަންވެސް ސިއްޙަތާއި ބެހޭ ވުޒާރާއިން ވަނީ ހިއްސާކޮށްފައެވެ. އެގޮތުން ގޭގެ ދޮރުތަކާއި ކުޑަދޮރުތައް، ދުން ނުވަންނާނެހެން ބަންދުކުރުމާއި، އާއްމު ފަރާތްތަކުން ދުމުގެ އަސަރުކޮށްފައިވާ ސަރަހައްދުތަކަށް ކޮންމެހެން ނުކުންނަން ޖެހިއްޖެ ހާލަތެއްގައި މެނުވީ ނުނިކުތުމަށް ވަނީ އިލްތިމާސްކޮށްފައެވެ. އަދި ދުމުގެ އަސަރުކޮށްފައިވާ ސަރަހައްދަކަށް ނުކުތުމުގެ ކުރިން އަނގައާއި ނޭފަތް ނިވާކުރުމަށްވެސް ސިއްޙަތާއި ބެހޭ ވުޒާރާއިން ވަނީ އެދިވަޑައިގަންނަވާފައެވެ.