ބޭރުފައިސާ މާރުކުރުމުގެ ވިޔަފާރިކުރުމުގެ ލައިސަންސަށް އެދި ހުށަހަޅާފައިވަނީ 98 ފަރާތަކުން

"މަނީ ޗޭންޖިންގ ވިޔަފާރިއާބެހޭ ޤަވާއިދު"ގެ 98 ފަރާތަކުން ބޭރުފައިސާ މާރުކުރުމުގެ ވިޔަފާރިކުރުމުގެ ލައިސަންސަށް އެދި ހުށައަޅާފައިވާކަމަށް މޯލްޑިވްސް މަނިޓަރީ އޮޓޯރިޓީ، އެމްއެމްއޭއިން ހާމަކުރައްވައިފިއެވެ.

"މަނީ ޗޭންޖިންގ ވިޔަފާރިއާބެހޭ ޤަވައިދު"ގެ ދަށުން ލައިސަންސްއަށް އެދި ހުށައެޅުމަށް އެމްއެމްއޭއިން ހުޅުވާލީ އޮކްޓޯބަރ މަހުގެ 2 ވަނަ ދުވަހުއެވެ.

މޯލްޑިވްސް މަނިޓަރީ އޮޓޯރިޓީ، އެމްއެމްއޭއިން ވިދާޅުވީ، ލައިސަންސްއަށް އެދި ހުށައެޅުމުގެ ސުންގަޑި 30 ނޮވެމްބަރ ވަނަ ދުވަހު ހަމަވިއިރު 98 ފަރާތަކުން ލައިސަންސްއަށް އެދި ހުށައަޅާފައިވާކަމަށެވެ. އެގޮތުން ޓިއާ 1 ލައިސަންސަށް 79 ފަރާތަކުން ވަނީ ހުށައަޅާފައެވެ. މީގެތެރޭގައި މުޅިން އަލަށް ހުށައަޅާފައިވާ 44 ފަރާތަކާއި ކުރިން ލައިސަންސް އޮތް 35 ފަރާތެއް ހިމެނެއެވެ.

ޓިއާ2 ލައިސަންސްއަށް އެދި 19 ފަރާތެއް ވަނީ ހުށައަޅާފައެވެ. މީގެތެރޭގައި މުޅިން އަލަށް ލައިސަންސްއަށް އެދި ހުށައަޅާފައިވާ 5 ފަރާތަކާއި، ކުރިން ލައިސަންސް އޮތް 14 ފަރާތަކުން ވަނީ ހުށައަޅާފައެވެ.

ޓިއާ1 ކެޓަގަރީގެ ވިޔަފާރިތަކަށް ދޫކުރަނީ ބޭރުފައިސާ ގަނެ ވިއްކުމަށް ދޫކުރާ ލައިސަންސެވެ. ޓިއާ2 ލައިސަންސަކީ ހަމައެކަނި ރިސޯޓްތަކަށް ބޭރުފައިސާ ވިއްކަން ދެވޭ ލައިސަންސެކެވެ.

މިހާރު މަނީ ޗޭންޖިންގ ލައިސަންސް އޮތް ފަރާތްތަކުގެ އަދަދަކީ 212 އެވެ. މީގެތެރެއިން މުޅިން އަލަށް ލައިސަންސްއަށް އެދި ހުށައަޅާފައިވަނީ 49 ފަރާތެވެ.

އެމްއެމްއޭއިން ވިދާޅުވީ، އެ އޮޓޯރިޓީން ދޫކޮށްފައިވާ ލައިސަންސެއް ލިބިގެން ދިވެހިރާއްޖޭގައި މަނީ ޗޭންޖިންގ ވިޔަފާރިކުރަމުންދާ ފަރާތްތަކުގެ ތެރެއިން އާ ގަވައިދުގެ ދަށުން ލައިސަންސްއަށް އެދި އެޕްލިކޭޝަން ހުށައެޅުމަށް ހުޅުވާލި މުއްދަތުގެ ތެރޭގައި ލައިސަންސްއަށް އެދި ހުށައަޅާފައިވާ ފަރާތްތަކަށް ލައިސެންސް ދިނުމާއިމެދު އެ އޮތޯރިޓީން ވަކި ގޮތެއް ނިންމައި އަންގަންދެން އެ ފަރާތްތަކަށް ދޫކޮށްފައިވާ ލައިސަންސްގެ ދަށުން ބޭރުފައިސާ ގަނެ ވިއްކުމުގެ ވިޔަފާރި ކުރިއަށްގެންދެވޭނެކަމަށެވެ.