ދަނޑުވެރިކަމުގެ އިޤްތިޞާދީ ސަރަޙައްދު ތަރައްޤީކުރުމުގެ މަޝްރޫޢު ފުށިދިއްގަރުފަޅަށް ބަދަލުކޮށްފި

ދިވެހިރާއްޖޭގެ ކާބޯތަކެތީގެ ރައްކާތެރިކަން ކަށަވަރު ކުރުމުގެގޮތުން އުތުރުތިލަފަޅުގައި ފަށަން ނިންމި މަޝްރޫއު ފުށިދިއްގަރުފަޅަށް ބަދަލުކޮށްފިއެވެ. މިކަން އެސްޓީއޯއިން ވަނީ ޔަޤީންކޮށްދީފައެވެ.

ދިވެހިރާއްޖޭގެ ކާބޯތަކެތީގެ ރައްކާތެރިކަން ކަށަވަރު ކުރުމުގެގޮތުން ދަނޑުވެރިކަމުގެ އިޤްތިޞާދީ ސަރަޙައްދެއް ޤާއިމްކުރުމަށް މޯލްޑިވްސް އިންޑަސްޓްރިއަލް ޑިވެލޮޕްމެންޓް ފްރީޒޯން ކުންފުނިން، ޗައިނާގެ ހާބަރ އިންޖިނިއަރިންގ ކޮމްޕެނީ ލިމިޓެޑާއެކު އެއްބަސްވުމެއްގައި ސޮއިކޮށްފައިވަނީ މިއަހަރުގެ މާރިޗު މަހުއެވެ.

ދަނޑުވެރިކަމުގެ އިޤްތިޞާދީ ސަރަހައްދު ގާއިމްކުރުމަށް 100 ހެކްޓަރުގެ ބިމެއް ހިއްކުމަށް ވަނީ ނިންމާފައެވެ. އުތުރުތިލަފަޅުގައި ފަށަން ނިންމި މަޝްރޫއު ފުށިދިއްގަރުފަޅަށް ބަދަލުކުރި މައިގަނޑު ސަބަބެއް އެސްޓީއޯއިން ހާމަކޮށްފައި ނުވިނަމަވެސް ދަނޑުވެރިކަމުގެ އިޤްތިޞާދީ ސަރަހައްދުގެ ޢަމަލީ މަސައްކަތްތައް 2026 ވަނަ އަހަރުގެ ކުރީކޮޅު ފެށޭނެކަމަށް އެސްޓީއޯގެ މެނޭޖިންގ ޑިރެކްޓަރ ޝިމާދު އިބްރާހީމް ދާދިފަހުން ވަނީ ވިދާޅުވެފައެވެ.

މި މަޝްރޫޢަށް ބިން ހިއްކުމަށް ނިންމާފައިވަނީ މިމަޝްރޫޢު ކުރިއަށްގެންދިއުމަށް ބޮޑު ބިމެއް ބޭނުންވާތީ ކަމަށް އެސްޓީއޯއިން ވަނީ ވިދާޅުވެފައެވެ. އަދިއެއީ މި މަޝްރޫޢު ކުރިއަށްގެންދިއުމަށް އެންމެ ފައިދާހުރިގޮތްކަމަށްވެސް އެސްޓީއޯގެ އެމްޑީ ޝިމާދު ވަނީ ވިދާޅުވެފައެވެ.

ދަނޑުވެރިކަމުގެ އިޤްތިޞާދީ ސަރަހައްދުގައި ދަނޑުހެއްދުމުގެ އިތުރުން، ޓްރެއިނިންގ ސެންޓަރާއި، އެކްމޮޑޭޝަން ބްލޮކްތައްވެސް ހުންނާނެކަމަށް އެސްޓީއޯއިން ވަނީ ވިދާޅުވެފައެވެ.

މި ޕްރޮޖެކްޓްގެ ދަށުން 100 ހެކްޓަރުގެ ބިމުގައި ދަނޑުވެރިކަން ކުރުމަށް ގްރީން ހައުސްތައް އަޅާނެއެވެ. އަދި 100 ހެކްޓަރުގެ ބިމުގައި އަޑިއަށް ފައިބާ ތަރުކާރީއާއި މޭވާ ހެއްދުމަށް ޚާއްސަކުރާނެއެވެ. މީގެއިތުރުން 2 ވަނަ ފޭސްގައި ރާއްޖެއަށް ބޭނުންވާ ކުކުޅުބިސް އުފެއްދުމަށް ޚާއްސަ ޕޯލްޓްރީ ފާމެއް ޤާއިމްކުރުމަށް ހަމަޖެހިފައިވާކަމަށް ދަނޑުވެރިކަމާއި ބެހޭ ވުޒާރާއިން ވަނީ ވިދާޅުވެފައެވެ.