މިއަހަރު އެކަނިވެސް 6 މީހަކު އެޗްއައިވީއަށް ޕޮޒިޓިވްވި

މިއަހަރުގެ އޮކްޓޯބަރު މަހުގެ ނިޔަލަށް ހަ މީހަކަށް އެއިޑްސް ޖެހިފައިވާކަން ހެލްތު ޕްރޮޓެކްޝަން އޭޖެންސީ، އެޗްޕީއޭގެ ތަފާސްހިސާބުތަކުން ދައްކައިފިއެވެ. އެޗްއައިވީ އެއިޑްސް ރާއްޖެއިން އެންމެ ފުރަތަމަ ފެނުނުތާ، 33 އަހަރު ފާއިތުވީއިރު، އެންމެ ގިނަ ކޭސްތައް އެއް އަހަރުގެ ތެރޭގައި ރިކޯޑުކުރެވުނު އަހަރީ މިހިނގާ 2024 ވަނަ އަހަރެވެ.

ރާއްޖޭގައި އެޗްއައިވީ އެއިޑްސް އެންމެ ފުރަތަމަ ރެކޯޑުކުރެވިފައިވަނީ 1991 ވަނަ އަހަރުގެ ތެރޭގައެވެ. އޭގެފަހުން އެއިޑްސް ބަލި ފެނުނުފަހުން ވޭތުވެދިޔަ 33 އަހަރުގެތެރޭގައި އެންމެ ގިނަ ކޭސްތައް ރިކޯޑުކުރެވުނު އަހަރަކީ މިއަހަރުކަމަށް ތަފާސް ހިސާބުތަކުންދައްކައެވެ. މިގޮތުން މިއަހަރުގެ ޖެނުއަރީ މަހުން ފެށިގެން އޮކްޓޯބަރު މަހާއި ހަމައަށް އެކަނިވެސް 6 މީހަކަށް އެއިޑްސް ޖެހިފައިވާކަމަށް އެ ރެކޯޑުތަކުން ދައްކައެވެ. މިއީ ކަންބޮޑުވާންޖެހޭ ނުރައްކާތެރިކަމެއްގެ ގޮތުގައި ސިއްޙީ މާހިރުން ސިފަކުރައްވައެވެ.

ރާއްޖޭގައި އެއިޑްސްގެ ފުރަތަމަ ކޭސް ރިކޯޑުކުރެވުނު ފަހުން މިހާތަނަށް ޖުމްލަ 49 މީހަކު ބައްޔަށް ޕޮޒިޓިވްވެފައިވެއެވެ. އެއީ 7 އަންހެނުންނާއި 43 ފިރިހެނުންނެވެ. މީގެތެރެއިން 16 މީހަކު މިބަލީގައިވަނީ ނިޔާވެފައެވެ. އަދި 32 މީހަކު މިހާރުވެސްދަނީ ބައްޔަށް ފަރުވާ ހޯދަމުންނެވެ.

އެއިޑްސްގެ ނުރައްކާ ބޮޑުވަމުން އަންނައިރު، މުޖުތަމަޢުގައި ބަލީގެ ނުރައްކާ އޮތްމިންވަރު ދެނެގަތުމަށް އެޗްޕީއޭއިން ސަވައިލެންސް ޓެސްޓުކުރުން އިތުރުކޮށްފައިވާކަން އެއޭޖެންސީން ފާހަގަކުރައްވައެވެ. އަދި މި ބަލި ފެތުރެން ދިމާވާ މައިގަނޑު އެއް ސަބަބަކީ ކައިވެނިން ބޭރުން، ރައްކާތެރި ނޫންގޮތުގައި ޖިންސީ ގުޅުން ހިންގުމުގެ ނުބައި އާދައެވެ.

ދީނީގޮތުންނާއި އިޖުތިމާޢީ އެތައް މައްސަލައަކަށް ހުށައެޅޭ މިފަދަ އާދަތަކުގެ ތެރޭގައި މަސްތުވާތަކެތީގެ މައްސަލައަކީވެސް ބޮޑުވެފައިވާ މައްސަލައެކެވެ. އެގޮތުން އެކަކަށްވުރެ ގިނަ މީހުން ސިރިންޖު ބޭނުންކޮށްގެން މަސްތުވާތަކެތި ބޭނުންކުރުމުގެ އާދަ އިތުރުވުމަކީވެސް މިފަދަ ބައްޔަށް ހުށައެޅޭ އެއް ސަބަބެވެ.

މީގެއިތުރުންވެސް ބަލި ޖެހުމަށް މެދުވެރިވެދާނެ އިތުރު ދެޙާލަތެއް އޮވެއެވެ. ބަލި ޖެހިފައިވާ އަންހެނަކަށް ލިބޭ ތުއްތު ކުއްޖަކަށް ގާތުން ދިނުމުގެ ތެރޭގައިވެސް ބަލި އެކުއްޖާއަށް ވާޞިލުވުމުގެ ފުރުސަތު އޮވެއެވެ. ހަމައެއާއެކު އެޗްއައިވީ ވައިރަސް ހުރި މީހެއްގެ ލޭ އެހެން މީހެއްގެ ގަޔަށް އެޅިއްޖެނަމަވެސް މިބައްޔަށް ހުށައެޅިގެންދާނެއެވެ. މި ދެގޮތަކީ ރާއްޖޭގައި މި ބަލި ޖެހުމުގެ ފުރުސަތު ވަރަށް ހަނިގޮތެއްކަން ކަމާބެހޭ ފަރާތްތަކުން ފާހަގަކުރައްވައެވެ. އެހެންނަމަވެސް ބައްޔަށް ޓެސްޓުކުރުމުގެ މުހިންމުކަން އެޗްޕީއޭއިން ފާހަގަކުރައްވައެވެ.

އެއިޑްސްގެ ނުރައްކާ އަހަރުން އަހަރަށް އިތުރުވަމުންދާއިރު ކަމާބެހޭ ފަރާތްތަކާއި މުޖުތަމަޢުގެ ހުރިހާ ފަރާތެއް ގުޅިގެން މިފަދަ ނުރައްކާތެރި ބަލިތައް ކޮންޓްރޯލްކުރުމަށް މަސައްކަތް ކުރަންޖެހެއެވެ. މިގޮތުން ޖިންސީ ގުޅުމަކީ ދީނުގައި އަންގަވާފައިވާގޮތަށް، ކައިވެނީގެ މާތްގުޅުމުގެ ތެރޭގައި އޮންނަ ކަމަކަށް ހެދުމާއި، މަސްތުވާތަކެތީގެ ވަބާއިން މުޖުތަމަޢު ސަލާމަތްކުރުމަށް އެންމެން ގުޅިގެން މަސައްކަތް ކުރަންމިވަނީ ޖެހިފައެވެ. އެއިޑްސް ބައްޔަށް ފަރުވާ އޮތްނަމަވެސް އެއީ މުޅިން މީހާ ޢާއްމު މީހަކަށް، ވާނެކަމެއް ނޫނެވެ. އެހެންކަމުން ހައްލަކީ ބައްޔަށް ހުށައެޅުމަށް ހުރި ދޮރުތައް ބަންދުކޮށް ބަލިން ރައްކާތެރިވުމެވެ.