ޚަބަރު

ރައީސްގެ ވަޢުދުފުޅާ އެއްގޮތަށް ފަންނުވެރިންނަށް ޚާއްސަކޮށްގެން 25 މިލިޔަން ރުފިޔާ ބަޖެޓުގައި ހިމަނައިފި


  • ރަނގަޅު ފެންވަރުގެ އާޓް ގެލަރީއެއް ހަދާނެކަމަށް ވިދާޅުވި

  • ރަނގަޅު ސިނަމާއެއް ތަރައްޤީކުރައްވާނެކަމަށް ވިދާޅުވި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާއެއްގޮތަށް، ދިވެހި ފަންނުވެރިންނަށް ފަހި ފުރުޞަތުތަކެއް ފޯރުކޮށްދިނުމަށް އަންނަ އަހަރު 25 މިލިޔަން ރުފިޔާ ބަޖެޓުގައި ހިމަނާފައިވާކަމަށް ޒުވާނުން ބާރުވެރިކުރުވުމާއި މަޢުލޫމާތާއި ފަންނާ ބެހޭ ވަޒީރު އިބްރާހީމް ވަޙީދު ވިދާޅުވެއްޖެއެވެ.

ޕީއެސްއެމް ނިއުސްއިން ގެނެސްދިން "ހަފުތާ 52" ޕްރޮގްރާމްގައި، ޒުވާނުން ބާރުވެރިކުރުވުމާއި މަޢުލޫމާތާއި ފަންނާ ބެހޭ ވަޒީރު އިބްރާހީމް ވަޙީދު ވަނީ މިދިޔަ އެއްއަހަރު ދުވަހުގެ ތެރޭގައި އެ ވުޒާރާއިން ކުރައްވާފައިވާ މަސައްކަތްތަކާއި އަންނަ އަހަރު އެ ވުޒާރާއިން ކުރުމަށް ނިންމާފައިވާ ބައެއްކަންކަމުގެ މަޢުލޫމާތު ހިއްސާކުރައްވާފައެވެ.

ޒުވާނުން ބާރުވެރިކުރުވުމާއި މަޢުލޫމާތާއި ފަންނާ ބެހޭ ވަޒީރު ވިދާޅުވީ، ފަންނުވެރިންނަށް ފަހި ފުރުޞަތުތަކެއް ފޯރުކޮށްދިނުމަށްޓަކައި 25 މިލިޔަން ރުފިޔާގެ ބަޖެޓެއް އަންނަ އަހަރު ޚާއްސަކުރުމަށް ނިންމަވާފައިވާކަމަށެވެ. އަދި ފަންނުވެރިންނަށް ފުރުޞަތުތައް ހޯދައިދިނުމަށްޓަކައި ރަނގަޅު ފެންވަރަށް އާޓް ގެލަރީއެއް ތަރައްޤީކުރައްވާނެކަމަށާއި، މި ދައުރު ނިމުމުގެ ކުރިން ރަނގަޅު ފެންވަރުގެ ސިނަމާއެއްވެސް ތަރައްޤީކޮށްދެއްވާނެކަމަށް ވަޒީރު ވިދާޅުވިއެވެ.

"މި ހުންނަނީ އެންމެ އޮލިމްޕަހެއް. ގިނަ ޑައިރެކެޓަރުން އެބަތިބޭ ފިލްމު އުފައްދާފައި އޮލިމްޕަހުގައި ފިލްމް އެޅުވުމަށް ކިޔުގައި. އެހެންވީ އަޅުގަނޑުމެން ރަނގަޅު ގޮތެއް ހަމަޖައްސައިދޭނަން." ޒުވާނުން ބާރުވެރިކުރުވުމާއި މަޢުލޫމާތާއި ފަންނާ ބެހޭ ވަޒީރު އިބްރާހީމް ވަހީދު ވިދާޅުވިއެވެ.

ވަޒީރު ވިދާޅުވީ ޤައުމީ ކުތުބުޚާނާގެ އައު އިމާރާތުގެ މަސައްކަތް އަންނަ އަހަރު ފަށްޓަވާނެކަމަށާއި، ރާއްޖޭގެ 7 ސަރަޙައްދެއްގައި ޒަމާނީ ފެންވަރުގެ ލައިބްރަރީތައް ތަރައްޤީކުރުމުގެ މަސައްކަތް މި ދައުރު ނިމޭއިރު ތަރައްޤީކޮށް ނިންމަވާނެކަމަށެވެ.

ފަންނުވެރިންނަށް ފަހި ފުރުޞަތުތަކެއް ފޯރުކޮށްދިނުމަށް ފަންނުވެރިންނަށް މާލީ އެހީތެރިކަން ސަރުކާރުގެ ބަޖެޓުގެތެރެއިން ހަމަޖައްސަވާނެކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާންކުރެއްވީ މޯލްޑިވިއަން އާޓިސްޓް ކޮމިޔުނިޓީގެ "އަންވެއިލިންގ ވިޜަންސް 2024"ގައެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ފަންނުވެރިންނަށް ބޭނުންވާ އެކިކަހަލަ އާލާތްތަކާއި ވަޞީލަތްތައް ހޯދުމަށްޓަކައި ބޭނުންވާނެ ފަންޑުވެސް އެ ފައިސާގެ ތެރޭގައި ހިމެނޭނެކަމަށް ވިދާޅުވެފައެވެ.