ނ.ފޮއްދޫ ބަނދަރުގެ މަސައްކަތް ލަސްވަނީ ޑިޒައިނަށް ބަދަލުގެންނާތީ: ވަޒީރު ޑރ.މުއްޠަލިބް

ނ.ފޮއްދޫ ބަނދަރު ތަރައްޤީކުރުމުގެ މަޝްރޫޢުގެ މަސައްކަތް ނުފެށި ލަސްވަނީ، އެކަމަށް ރައްޔިތުން ގެންނަން ބޭނުންވި ބަދަލުތައް ގެނެސް އަލުން މަސައްކަތް ފެށުމަށްކަމަށް އިމާރާތްކުރުމާއި ބިނާރާ ބެހޭ ވަޒީރު ޑރ.ޢަބްދުﷲ މުއްޠަލިބް ވިދާޅުވެއްޖެއެވެ.

ވަޒީރު މިހެން ވިދާޅުވީ ފޮއްދޫ ބަނދަރުގެ މަސައްކަތް ކޮންޓްރެކްޓަރާ ހަވާލުކުރުމަށްފަހު މަޝްރޫޢުގެ މަސައްކަތް ލަސްވަމުންދާތީ އެކަމާ ގުޅޭގޮތުން މަޖިލީހުގައި ޖަލްސާގައި ވެލިދޫ ދާއިރާގެ މެންބަރު މުޙައްމަދު އައްބާސް ސުވާލު ކުރެއްވި ސުވާލަށް ޖަވާބުދެއްވަމުންނެވެ.

ގެދޮރުވެރިކަމާއި ބިނާރާ ބެހޭ ވަޒީރު ޑރ.އަބްދުﷲ މުއްޠަލިބް ވިދާޅުވީ، ފޮއްދޫ ބަނދަރުގެ މަސައްކަތް އެމްޓީސީސީއާ ހަވާލުކޮށްފައިވަނީ 3 ސެޕްޓެމްބަރު 2023ގައި ކަމަށެވެ. މި މަޝްރޫޢަކިވެސް އެ އަހަރު އިންތިޚާބާ ދިމާކޮށް ވަރަށް ގިނަ އެހެން މަޝްރޫޢުތައް ހިމަނާފައި އޮތްގޮތަށް، ކުޑަކުޑަ ފައިސާކޮޅެއް ބަޖެޓުގައި ޖަހާ ހިމަނާފައިވާ މަޝްރޫޢެއްކަމަށެވެ. ވަޒީރު ވިދާޅުވީ މި މަޝްރޫޢަށް 2023ވަނަ އަހަރުގެ ބަޖެޓުގައި ހިމަނާފައި އޮތީ 2.1 މިލިއަން ރުފިޔާކަމަށެވެ. އަދި 2024ވަނަ އަހަރުގެ ބަޖެޓުގައި 266 ހާސް ރުފިޔާ މިމަޝްރޫއަށް ހިމަނާފައިވާއިރު މުޅި މަޝްރޫޢުގެ އަގުގެ ގޮތުގައި 53.7 މިލިއަން ރުފިޔާ ކޮންޓްރެކްޓްގައި ހިމަނާފައިވާކަމަށް ވަޒީރު ވިދާޅުވިއެވެ. މިމަޝްރޫޢު ހަވާލުކޮށްފައި އޮތީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީއާއެވެ.

ވަޒީރު ޑރ.ޢަބްދުﷲ މުއްޠަލިބު ވިދާޅުވީ މިމަޝްރޫޢު ފުރަތަމަ ފަރުމާކޮށްފައި އޮތީ ޑިޓޭޗް ހާބަރެއްގެ ގޮތުގައިކަމަށެވެ. މިއީ އާއްމުކޮށް ރަށްރަށުގައި ބަނދަރު ހަދާ ގޮތެއް ނޫނެވެ. ވަޒީރު ވިދާޅުވީ މިމަޝްރޫޢަށް ރައްޔިތުން ބޭނުންވާ ބަދަލުތައް ގެނައުމަށް ސަރުކާރުން ނިންމަވާފައިވާކަމަށާއި، މަޝްރޫޢުގެ ޢަމަލީ މަސައްކަތް ލަސްވަނީ އެ ސަބަބާހުރެކަމަށެވެ.

"ބަނދަރު އަޅަން ނިންމާފައިވެސް އޭރު އޮތީ ސްޓޯމް ވޯޓަރ ނިޒާމު އަދި ޓޫރިސްޓް ބީޗް އޭރިއާއެއް އޮތް ހިސާބުގައި. ކަންބޮޑުވުން ހުރުމާއެކު ރަށުގެ ރައްޔިތުން ބޭނުންވިގޮތަށް ޑިޒައިން ވަނީ ބަދަލުކޮށްފައި. މިހާރު އީއައިއޭ ކުރިއަށްދޭ. 2025ގައި ޢަމަލީ މަސައްކަތް ފަށާނަން." އިމާރާތްކުރުމާއި ބިނާރާ ބެހޭ ވަޒީރު ޑރ.ޢަބްދުﷲ މުއްޠަލިބް ވިދާޅުވިއެވެ.

ވަޒީރު ވިދާޅުވީ މިދިޔަ ދެ އަހަރުވެސް އެ މަޝްރޫޢު ބަޖެޓުގައި ހިމަނާފައި އޮތް ނަމަވެސް، ކޮންޓްރެކްޓަރަށް އެޑްވާންސް ފައިސާ ދެވޭ މިންވަރަށްވެސް ބަޖެޓުގައި ފައިސާ ހިމަނާފައި ނެތްކަމަށެވެ. އަދި އެޑްވާންސް ފައިސާ ދައްކާފައިވެސް ނެތްކަމަށެވެ.

މި ބަނދަރަކީ 467 މީޓަރު ދިގު، 300 މީޓަރު ފުޅާ ބަނދަރެކެވެ.