ދަނޑުވެރިކަމުގެ އިޤްތިޞާދީ ސަރަޙައްދުގެ ޢަމަލީ މަސައްކަތް 2026ގެ ކުރީކޮޅު ފެށޭނެ: ޝިމާދު
-
ދަނޑުވެރިކަމުގެ އިޤްތިޞާދީ ސަރަޙައްދެއް ޤާއިމްކުރުމަށް ހަވާލުކޮށްފައިވަނީ ޗައިނާގެ ކުންފުންޏަކާ
-
މިކަމާ ގުޅޭ އެއްބަސްވުމުގައި ސޮއިކޮށްފައިވަނީ މަރިޗު މަހު
-
100 ހެކްޓަރުގެ ބިމެއް ހިއްކުމަށްވަނީ ހަމަޖެހިފައި
ދަނޑުވެރިކަމުގެ އިޤްތިޞާދީ ސަރަހައްދުގެ ޢަމަލީ މަސައްކަތްތައް 2026ވަނަ އަހަރުގެ ކުރީކޮޅު ފެށޭނެކަމަށް ސްޓޭޓު ޓްރޭޑިންގ އޮގަނައިޒޭޝަން، އެސްޓީއޯގެ މެނޭޖިންގ ޑިރެކްޓަރ ޝިމާދު އިބްރާހީމް ވިދާޅުވެއްޖެއެވެ. އެސްޓީއޯގެ މެނޭޖިންގ ޑިރެކްޓަރ ޝިމާދު އިބްރާހީމްއަކީ މި މަޝްރޫޢު ކުރިއަށްގެންދާ މޯލްޑިވްސް އިންޑަސްޓްރިއަލް ޑިވެލޮޕްމެންޓް ފްރީޒޯން ކުންފުނީގެވެސް މެނޭޖިންގ ޑިރެކްޓަރެވެ.
ދިވެހިރާއްޖޭގެ ކާބޯތަކެތީގެ ރައްކާތެރިކަން ކަށަވަރު ކުރުމުގެގޮތުން ދަނޑުވެރިކަމުގެ އިޤްތިޞާދީ ސަރަޙައްދެއް ޤާއިމްކުރުމަށް މޯލްޑިވްސް އިންޑަސްޓްރިއަލް ޑިވެލޮޕްމެންޓް ފްރީޒޯން ކުންފުނިން، ޗައިނާގެ ހާބަރ އިންޖިނިއަރިންގް ކޮމްޕެނީ ލިމިޓެޑާއެކު އެއްބަސްވުމެއްގައި ސޮއިކޮށްފައިވަނީ މިއަހަރުގެ މާރިޗު މަހުއެވެ.
ދަނޑުވެރިކަމުގެ އިޤްތިޞާދީ ސަރަހައްދު ގާއިމްކުރުމަށް 100 ހެކްޓަރުގެ ބިމެއް ހިއްކުމަށް ވަނީ ނިންމާފައެވެ. އެސްޓީއޯގެ މެނޭޖިންގ ޑިރެކްޓަރ ޝިމާދު އިބްރާހީމް ވިދާޅުވީ މި މަޝްރޫޢަށް ބިން ހިއްކުމަށް ނިންމާފައިވަނީ މިމަޝްރޫޢު ކުރިއަށްގެންދިއުމަށް ބޮޑު ބިމެއް ބޭނުންވާތީ ކަމަށެވެ. އަދިއެއީ މި މަޝްރޫޢު ކުރިއަށްގެންދިއުމަށް އެންމެ ފައިދާހުރިގޮތްކަމަށްވެސް ޝިމާދު ވިދާޅުވިއެވެ.
"ރާއްޖޭގައި ހުންނަނީ ކުދި ކުދި ރަށްތައް. އެހެން ނަމަވެސް ބޮޑު އެއް ލޮކޭޝަންއެއްގައި މި މަޝްރޫޢު ހިންގައިގެން އެންމެ ފައިދާވާނެ ކަމަށް ބެލެވޭތީ ބިން ހިއްކަނީ. މިތަނުގައި ދަނޑުހެއްދުމުގެ އިތުރުން، ޓްރެއިނިންގ ސެންޓަރާއި، އެކްމޮޑޭޝަން ބްލޮކްތައްވެސް ހުންނާނެ." އެސްޓީއޯގެ މެނޭޖިންގ ޑިރެކްޓަރ ޝިމާދު އިބްރާހީމް ވިދާޅުވިއެވެ.
ޝިމާދު ވިދާޅުވީ އިޤްތިޞާދީ ޚާއްޞަ ސަރަޙައްދުގައި ތަރުކާރީއާއި މޭވާގެ ވަރަށް ގިނަ ބަވަތްތައް ހައްދާނެ ކަމަށެވެ. އަދި އެއްގަމު މަގާއި ކުކުޅު ބިސްވެސްއެތަނުން ބާޒާރަށް ނެރުމަށް ނިންމާފައިވާ ކަމަށާއި، މިއާއެކު ރާއްޖޭގެ އިމްޕޯޓަށް ވަރަށް ބޮޑު އަސަރެއް މި މަޝްރޫއާއެކު ކުރާނެކަމަށްވެސް ޝިމާދު ވިދާޅުވިއެވެ.
"މި މަޝްރޫޢާއި އެކު ރާއްޖެއަށް ބޭނުންވާ ކާބޯތަކެތީގެ ވަރަށް ބޮޑު ބައި މީގެން ކަވާ ކުރާނެ، ތަކެތީގެ އަގުތައްވެސް މި މަޝްރޫޢާއި އެކު ހެޔޮވެގެންދާނެ،" ޝިމާދު ވިދާޅުވިއެވެ.
މި މަޝްރޫޢާއި ބެހޭގޮތުން އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސަޢީދު މީގެކުރިން ވިދާޅުވެފައިވަނީ ގާތްގަނޑަކަށް 10 ބާވަތެއްގެ 80 އިންސައްތަ ރާއްޖޭގައި ހައްދާނެ ކަމަށާއި މިއީ ރާއްޖޭގައި ވަޒީރާގެ ގިނަ ފުރުސަތުތަކެއް އެފެދި ވިޔަފާރިތަކަށްވެސް ގިނަ ފައިދާތަކެއް ކުރާނެ މަޝްރޫއެއް ކަމަށެވެ.
ދަނޑުވެރިކަމުގެ އިޤްތިޞާދީ ސަރަޙައްދުގައި ހައްދާނެ ތަކެތި ކަނޑައަޅާފައިވާކަމަށާއި، އެތަކެތި ހައްދައިގެން އިމްޕޯޓު މަދުކުރެވޭނެ ނިސްބަތްވެސް މިހާރު ދެނެގަނެވިފައިވާކަމަށް ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. ޢާއިޝަތު ރަމީލާވެސް ވަނީ ވިދާޅުވެފައެވެ.