ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގައި މިރޭ. ބ. ކެންދޫ އަތުން 5-1 ގެ ނަތީޖާއަކުން ރ. އަލިފުށި މޮޅުވެއްޖެއެވެ.
ގައުމީ ފުޓްބޯޅަ ދަނޑުގައި ކުޅުނު ގްރޫޕް ޑީގެ މި މެޗުން އަލިފުށި މޮޅުވިއިރު، މި މެޗު ބަލާލުމަށް އެ ރަށުގެ ގިނަ އަދަދެއްގެ ސަޕޯޓަރުން ވަނީ ދަނޑަށް ވަދެފައެވެ. އެކަމަކު މެޗުގެ ދެވަނަ ހާފުގައި ދަނޑުގެ ލައިޓުތަކަށް މައްސަލަ ދިމާވެ، ނިވުމާ ގުޅިގެން މެޗު ވަނީ ގާތްގަނޑަކަށް 20 ވަރަކަށް މިނެޓަށް މެދުކަނޑާލާފައެވެ.
އަލިފުށީގެ ފަރާތުން މޮޅު ކުޅުމެއް ފެނިގެންދިޔަ މި މެޗުގެ ވަރަށް ކުރީކޮޅު އެ ޓީމުން ވަނީ ލީޑު ނަގާފައެވެ. މެޗު ފަށައިގެން ތިންވަނަ މިނެޓުގައި މި ލަނޑު ޖަހައިދިނީ ގައުމީ ޓީމުގެ މިޑްފީލްޑަރު ހުސެއިން ނިހާން (ނިހާޓް) އެވެ. އަދި މެޗުގެ 28 ވަނަ މިނެޓުގައި އަލިފުށީ ކައުންސިލްގެ ރައީސް އާދަމް އިމްރާން ވަނީ ލަނޑެއް ޖަހައި، އެ ޓީމަށް ލީޑު ފުޅާކޮށްދީފައެވެ. މި މެޗުގެ ފުރަތަމަ ހާފު ނިމުމުގެ ކުރިން އަލިފުށިން ތިންވަނަ ލަނޑެއް ޖެހިއިރު، މި ލަނޑު އެ ޓީމަށް ކާމިޔާބުކޮށްދިނީ އަޙްމަދު ހުސާމެވެ.
ދަނޑުގެ ލައިޓުތައް ނިވުމާ ގުޅިގެން ގިނަ އިރުތަކެއް ވަންދެން މެޗުގެ ކުޅުން މެދުކަނޑާލިއިރު، ރެފުރީ ވަނީ ދެވަނަ ހާފިގެ އިތުރު ވަގުތުގެ ގޮތުގައި 25 މިނެޓު ދައްކާފައެވެ. އެއާއެކު އިތުރު ވަގުތުގެ ހަތްވަނަ މިނެޓުގައި އަލިފުށިން ވަނީ ހަތަރުވަނަ ލަނޑެއް ކާމިޔާބުކޮށްފައެވެ. މި ލަނޑު ޖަހައިދިނީ ފުރަތަމަ ލަނޑުވެސް ކާމިޔާބުކޮށްދިން ނިހާނެވެ. އަދި އިތުރު ވަގުތުގެ 12 ވަނަ މިނެޓުގައި އިމްރާން ވަނީ އަލިފުށީގެ ފަސްވަނަ ލަނޑު ޖަހައިދީފައެވެ. އެކަމަކު އޭގެ ހަ މިނެޓު ފަހުން ކެންދޫން ލަނޑެއް ކާމިޔާބުކުރިއިރު، މި ލަނޑު ޖަހައިދިނީ ރަޝާދު އަބްދުލް މަތީނެވެ.
މުޅި ރާއްޖެއަށް ހުޅުވާލައިގެން ބާއްވާ މި މުބާރާތުގައި ޖުމްލަ 17 ޓީމެއް ވާދަކުރާއިރު، މި ޓީމުތައް ވަނީ ހަތަރު ގުރޫޕަކަށް ބަހާލާފައެވެ. މުބާރާތުގެ ގުރޫޕް އޭގައި ހިމެނެނީ ފުވައްމުލައް ސިޓީ އާއި، ދ. ކުޑަހުވަދޫ އާއި، ގދ. ފަރެސްމާތޮޑާ އަދި ހއ. ދިއްދޫ އެވެ. ގުރޫޕް ބީގައި ހިމެނެނީ މާލެ ސިޓީ އާއި، ތ. ތިމަރަފުއްޓާއި، ބ. އޭދަފުށި އަދި ބ. ތުޅާދޫއެވެ. ގުރޫޕް ސީގައި އައްޑޫ ސިޓީ އާއި، ޅ. ކުރެންދޫ އާއި، ކ. ހުރާ އަދި ކ. ގުރައިދޫ ހިމެނޭއިރު، ގުރޫޕް ޑީގައި ހިމެނެނީ ޅ. ނައިފަރާއި، ކ. މާފުއްޓާއި، ރ. އަލިފުށި ބ. ކެންދޫއެވެ.