ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގައި މިއަދު ހަވީރު ކުޅުނު މެޗުގައި ފުވައްމުލައް ސިޓީން ހއ. ދިއްދޫ ބަލިކޮށްފިއެވެ.
ގައުމީ ފުޓްބޯޅަ ދަނޑުގައި ކުޅުނު ގްރޫޕް އޭގެ މެޗުން ފުވައްމުލައް މޮޅުވީ ދިއްދޫ އަތުން 7-3 ގެ ނަތީޖާއަކުންނެވެ. މި މެޗުން ފުވައްމުލައް މޮޅުވިއިރު، އެ ޓީމުން ވަނީ މުބާރާތުގައި ކުޅުނު ފުރަތަމަ މެޗުން ދ. ކުޑަހުވަދޫ އަތުން 3-1 ގެ ނަތީޖާއަކުން މޮޅުވެފައެވެ.
މިއަދު ހަވީރު ކުޅުނު މެޗުގައި ގިނަ ލަނޑުތަކެއް ފެނިގެންދިޔައިރު، މެޗު ފަށައިގެން 10 ވަނަ މިނެޓުގައި ފުވައްމުލަކުން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ އަލީ ޝަމާލް އަބްދުﷲ އެވެ. އަދި މެޗުގެ 30 ވަނަ މިނެޓުގައި އޭނާ ވަނީ އިތުރު ލަނޑެއް ޖަހާފައެވެ. އެކަމަކު އޭގެ ތިން މިނެޓު ފަހުން ދިއްދޫން ފަރަގު ކުޑަކުރިއިރު، މި ލަނޑު އެ ޓީމަށް ކާމިޔާބުކޮށްދިނީ އާދަމް އާޒިމެވެ.
މި ފުރަތަމަ ހާފު ނިމެން ތިން މިނެޓަށް ވެފައި ވަނިކޮށް ފުވައްމުލަކުން އަލުން ލީޑު ފުޅާކުރީ ބިދޭސީ ފޯވާޑް ކޯފީ އޮވޫސޫ ޖަހައިދިން ލަނޑުންނެވެ. ނަމަވެސް މި ހާފުގެ އިތުރު ވަގުތުގައި ދިއްދޫން ވަނީ އަނެއްކާވެސް ފަރަގު ކުޑަކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ ހުސައިން ޝިފާހެވެ.
މި މެޗުގެ ދެވަނަ ހާފު ފަށައިގެން 11 ވަނަ މިނެޓުގައި ފުވައްމުލަކުގެ ކޯފީ އިތުރު ލަނޑެއް ޖެހިއިރު، މެޗުގެ 81 ވަނަ މިނެޓުގައި އޭނާ ވަނީ ހެޓްރިކް ފުރިހަމަކޮށްފައެވެ. އަދި އޭގެ ހަތަރު މިނެޓު ފަހުން ފުވައްމުލަކުގެ ހަވަނަ ލަނޑު ޖަހައިދިނީ މުޙައްމަދު އިޔާޝް އަޙްމަދެވެ. މި މެޗުގައި ދިއްދޫން ކާމިޔާބުކުރި ތިންވަނަ ލަނޑު މެޗު ނިމެން މިނެޓަކަށް ވެފައި ވަނިކޮށް ލިބުނު ޕެނަލްޓީއަކުން ޖަހައިދިނީ ހުސައިން ޝިފާހެވެ. އެކަމަކު މެޗުގެ އިތުރު ވަގުތުގައި ހުސައިން ޝަރީފް މުޙައްމަދު ވަނީ ފުވައްމުލަކުގެ ހަތްވަނަ ލަނޑު ކާމިޔާބުކޮށްދީފައެވެ.
މުޅި ރާއްޖެއަށް ހުޅުވާލައިގެން ބާއްވާ މި މުބާރާތުގައި ޖުމްލަ 17 ޓީމެއް ވާދަކުރާއިރު، މި ޓީމުތައް ވަނީ ހަތަރު ގުރޫޕަކަށް ބަހާލާފައެވެ. މުބާރާތުގެ ގުރޫޕް އޭގައި ހިމެނެނީ ފުވައްމުލައް ސިޓީ އާއި، ދ. ކުޑަހުވަދޫ އާއި، ގދ. ފަރެސްމާތޮޑާ އަދި ހއ. ދިއްދޫ އެވެ. ގުރޫޕް ބީގައި ހިމެނެނީ މާލެ ސިޓީ އާއި، ތ. ތިމަރަފުއްޓާއި، ބ. އޭދަފުށި އަދި ބ. ތުޅާދޫއެވެ. ގުރޫޕް ސީގައި އައްޑޫ ސިޓީ އާއި، ޅ. ކުރެންދޫ އާއި، ކ. ހުރާ އަދި ކ. ގުރައިދޫ ހިމެނޭއިރު، ގުރޫޕް ޑީގައި ހިމެނެނީ ޅ. ނައިފަރާއި، ކ. މާފުއްޓާއި، ރ. އަލިފުށި ބ. ކެންދޫއެވެ.