ގާފަރު ކައުންސިލް ކަޕުގެ ޗެމްޕިއަންކަން އެކްސް ބޯއިޒްއިން ހޯދައިފި

ކ. ގާފަރު ކައުންސިލުން އިންތިޒާމުކޮށްގެން ބޭއްވި ހަވަނަ ފުޓްސަލް މުބާރާތުގެ ޗެމްޕިއަންކަން ހަތަރުވަނަ ފަހަރަށް އެކްސް ބޯއިޒްއިން ހޯދައިފިއެވެ.

މުބާރާތުގެ ޗެމްޕިއަންކަން އެކްސް ބޯއިސް ހޯދީ ރޭ ކުޅުނު ފައިނަލް މެޗުގައި އޯކޭ ބޯއިޒް އާއި ވާދަކޮށް 2-0 ގެ ނަތީޖާއަކުން މެޗު ކާމިޔާބުކޮށްގެންނެވެ. މެޗުގައި އެކްސް ބޯއިސްގެ ދެ ލަނޑު ކާމިޔާބުކޮށްދިނީ ޝަނާން ރަޝާދު އާއި ފައިނަލް މެޗުގެ މޮޅު ކުޅުންތެރިއަކަށް ހޮވުނު އަބްދުﷲ ޝާފިއު އެވެ.

ފައިނަލް މެޗަށްފަހު ވަނަވަނައަށް ދިޔަ ކުޅުންތެރިންނާއި ޓީމުތަކަށް ވަނީ އިނާމުދީފައެވެ. މި ރަސްމިއްޔާތު ޝަރަފްވެރިކޮށްދެއްވީ ކުޅިވަރާއި ހަށިހެޔޮކަމާ ބެހޭ ވުޒާރާގެ ސްޓޭޓް މިނިސްޓަރ މުޙައްމަދު ރިޔާޒެވެ.

މުބާރާތުގެ އެންމެ ގިނަ ލަނޑުޖެހި ކުޅުންތެރިއަކަށް އެކްސް ބޯއިސްގެ އައްޒާމް ނިޔާޒް ހޮވުނުއިރު މުޅި މުބާރާތުގެ ފެއާޕްލޭ ޓީމަކަށް ހޮވުނީވެސް އެކްސް ބޯއިސް އެވެ. ފެއާ ޕްލޭ ކުޅުންތެރިއަކަށް އެކްސް ބޯއީޒްގެ ޚަމީސް ރަޝީދު ހޮވުނުއިރު އެންމެ އުންމީދީ ކުޅުންތެރިއަކަށް ހޮވުނީ ޕްރިޑޭޓާރސް ޖޫނިއާސްގެ ޝަޔާން އުމަރެވެ. މުބާރާތުގެ އެންމެ މޮޅު ކުޅުންތެރިއަކަށް ޗެމްޕިއަން އެކްސް ބޯއިސްގެ އަބްދުﷲ ޝާފިޢު ހޮވުނުއިރު އެންމެމޮޅު ކޯޗަކީ އޯކޭ ބޯއިޒްގެ މުޙައްމަދު ވާސިފެވެ.

މުބާރާތުގެ އެންމެ މޮޅު ފަސް ކުޅުންތެރިންވެސް ވަނީ ހޮވާފައެވެ.

1. އޯކޭ ޔުނައިޓެޑްގެ ޖާރޒީ ނަންބަރު 10، އަޙްމަދު އަފްލާޒް
2. އޯކޭ ބޯއިޒްގެ ޖާރޒީ ނަންބަރު 10، އިބްރާހިމް ރިމާހް
3 އޯކޭ ބޯއިޒްގެ ޖާރޒީ ނަންބަރު 21، ނާއިހް މުފީދު
4. އެކްސް ބޯއިޒްގެ ޖަރޒީ ނަންބަރު 97، ޢަބްދުﷲ ޝާފިއު
5. އޯކޭ ބޯއީސްގެ ޖަރޒީ ނަންބަރު 03، މުޙައްމަދު ސަމްޢާން

ގާފަރު ކައުންސިލުން 2019 ވަނަ އަހަރުން ފެށިގެން ބާއްވަމުން އަންނަ މި މުބާރާތުގެ މިއަހަރުގެ ޗެމްޕިއަންކަން އެކްސް ބޯއިސް ހޯދިއިރު އެ ޓީމު ވަނީ 2020، 2021، 2023 ވަނަ އަހަރުވެސް މި މުބާރާތުގެ ޗެމްޕިއަންކަން ހޯދާފައެވެ.