ފަތުރުވެރިކަމުގެ ދާއިރާގައި ދެވޭ އެންމެ ޝަރަފުވެރި އެވޯޑް، ޖެހިޖެހިގެން 5 ފަހަރު ރާއްޖެއިން ކާމިޔާބުކޮށްފިއެވެ.
ވޯލްޑް ލީޑިން ޓުއަރިޒަމް ޑެސްޓިނޭޝަން، ނުވަތަ ފަތުރުވެރިކަމުގެ މަންޒިލްގެ އެވޯޑަކީ ވޯލްޑް ޓްރެވަލް އެވޯޑްސްގައި ދެވޭ އެންމެ ޝަރަފުވެރި އެއް އެވޯޑެވެ.
ޕޯޗުގަލްގެ މަދީރާގައި ބޭއްވި މިއަހަރުގެ ވޯލްޑް ޓްރެވަލް އެވޯޑްސްގައި ވޯލްޑް ލީޑިން ޓުއަރިޒަމް ޑެސްޓިނޭޝަންގެ އެވޯޑް ރާއްޖެއިން ހާސިލުކޮށްފައިވާއިރު، 2020 ވަނަ އަހަރުން ފެށިގެން ރާއްޖެއިން އަންނަނީ ދުނިޔޭގެ މަޤްބޫލް މަންޒިލްތަކާއި ވާދަކޮށް މި އެވޯޑް ހާސިލުކުރަމުންނެވެ. މިގޮތުން މިއަހަރުވެސް ރާއްޖެއިން މި އެވޯޑް ހާސިލުކުރީ 18 ޤައުމަކާއި ވާދަކޮށްގެނެވެ.
ވޯލްޑް ޓްރެވަލް އެވޯޑްސްގެ އިތުރުން، މިއަހަރު ރާއްޖެއިން ވަނީ ތިމާވެއްޓާއި ރަށްޓެހި ދެމެހެއްޓެނިވި ފަތުރުވެރިކަމުގެ މަންޒިލް ނުވަތަ ވޯލްޑް ލީޑިން ގްރީން ޑެސްޓިނޭޝަންގެ އެވޯޑްވެސް ހާސިލުކޮށްފައެވެ. މިއީ މި އެވޯޑް ރާއްޖެއިން ހާސިލުކުރި ފުރަތަމަ ފަހަރެވެ. މި ދެ އެވޯޑްގެ އިތުރުންވެސް ރާއްޖެއިން ވަނީ ގިނަ އެވޯޑްތަކެއް މި އަހަރު ހޯދާފައެވެ. އޭގެތެރޭގައި ރާއްޖޭގެ ރިސޯޓްތަކަށް ލިބުނު އެވޯޑްތައްވެސް ހިމެނެއެވެ.
ފަތުރުވެރިކަމުގެ އޮސްކާގެ ގޮތުގައި ފާހަގަކޮށްލެވޭ ވޯލްޑް ޓްރެވަލް އެވޯޑްސްގައި ރާއްޖެއިން ކޮންމެ އަހަރަކުވެސް ފަޚުރުވެރި ކާމިޔާބީތައް ދަނީ ހާސިލުކުރަމުންނެވެ.