"ގައުމީ ކުޅިވަރު ފަންޑަކީ ރާއްޖޭގެ ކުޅިވަރު ކުރިއެރުވުމަށް ބޭނުންވާ އެންމެ މުހިންމު އެއް ކަންތައް"
ރާއްޖޭގެ ކުޅިވަރުގެ ދިގުރާސްތާ ޕްލޭންގެ ތެރެއިން އެކުލަވާލުވެނު ގައުމީ ކުޅިވަރު ފަންޑަކީ ކުޅިވަރު ކުރިއެރުވުމަށް ބޭނުންވާ އެންމެ މުހިންމު އެއް ކަންތައް ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ. ގައުމީ ކުޅިވަރު ފަންޑުގެ ނަމުގައި ފަންޑެއް ގާއިމުކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާފައިވަނީ މި މަހުގެ ހަތަރުވަނަ ދުވަހު އޮތް ވަޒީރުންގެ މަޖިލީހުގެ ބައްދަލުވުމުގައި ކުރެއްވި މަޝްވަރާތަކަށްފަހު، އެ މަޖިލީހުގެ ލަފާފުޅާއެކުގައެވެ.
"ޕީއެސްއެމް ނިއުސް" އިން ގެނެސްދިން ހަފުތާ 52 ގެ ޚާއްސަ ޕްރޮގްރާމުގައި ވާހަކަދައްކަވަމުން ވަޒީރު ރާފިޢު ވިދާޅުވީ ގައުމީ ކުޅިވަރު ފަންޑުގެ އެންމެ ބޮޑު ބޭނުމަކަށް ވާނީ މެޑެލް ހޯދާނެ އެތުލީޓުން ދެނެގަނެ، އެ އެތުލީޓުންނަށް ކުރާނެ އިންވެސްޓްމަންޓާއި އަދި އެސޯސިއޭޝަންތަކުން ދޭނެ އެހީތެރިކަމާއި، އެކަންކަން ދެނެގަތުން ކަމަށެވެ. އަދި އެ ފަންޑަކީ ޖުމްލަކޮށް އެތުލީޓުންގެ ކުރިއެރުމަށް ކުރާ އިންވެސްޓެއްގެ ގޮތުގައި ވަޒީރު ވަނީ ފާހަގަކުރައްވާފައެވެ.
ވަޒީރު ވިދާޅުވީ ދުރުރާސްތާ ޕްލޭނެއް އެކުލަވާލުމުގެ އެންމެ ބޮޑު ބޭނުމަކީ ހާސިލުކުރަން ބޭނުންވާ ވަކި ލަނޑުދަނޑިތަކެއް ތަފުސީލީ ގޮތެއްގައި ލިޔެެ ކުލަވާލުން ކަމަށެވެ. އެގޮތުން މި މިސައްކަތުގައި ކަމާ ގުޅުންހުރި އިދާރާތަކާއި، ކުޅިވަރު އެސޯސިއޭޝަންތައް ހިމެނޭ ގޮތަށް ޕެލޭން އެކުލަވާލުމަށް މަޝްވަރާކުރެވުނު ކަމަށްވެސް ވިދާޅުވިއެވެ. އަދި އެކަމުގައި ބައިނަލްއުގާވީ މާހިރުންގެ ލަފަޔާއެކު ދުރުރާސްތާ ޕްލޭނުގައި ހިމަނަން ބޭނުންވާ ކަންތައްތައް ފާހަގަކުރެވިފައިވާ ކަމަށްވެސް ވަޒީރު ވަނީ ވިދާޅުވެފައެވެ.
ވަޒީރު ވިދާޅުވީ ކުޅިވަރުގެ ދާއިރާގެ ހިންގުމުގެ ތެރޭގައި ހުންނަޖެހޭ، އެކަމަކު ނެތްކަންތައްތައް ދިގުރާސްތާ ޕްލޭންގައި ހިމެނިފައިވާނެ ކަމަށެވެ. އަދި ފާއިތުވެގެންދިޔަ 52 ހަފުތާގެ ތެރޭގައި ދިގުރާސްތާ ޕްލޭން އެކުލަވާލުމުގައި ބޮޑެތި ކާމިޔާބީތަކެއް ހޯދިފައިވާކަން ވަޒީރު ވާނީ ފާހަގަކުރައްވާފައެވެ.
"އަޅުގަނޑުމެން ކުރަން ކަނޑައެޅި ސިޔާސަތުތައް ތަންފީޒުކުރުމަށްޓަކައި ކުރެވުނު ޑީޓެއިލް މަސައްކަތްތައް، އޭގެތެރޭގައި އަޅުގަނޑުމެން ގަވަރނަންސް ރަނގަޅުކުރުމަށް ކުރެވުނު މަސައްކަތް. އެކަންކަމަކީ ގާނޫނުގައިވެސް ހިމަނަންޖެހޭ ކަންކަމަށް ވުމާއެކު، އެކަން ގާނޫނުގައި ހިމެނުމުގެ މަސައްކަތް މިހާރު ވަނީ އޭޖީ އޮފީހަށް ފޮނުވާފައި. އަޅުގަނޑު އުއްމީދުކުރަނީ މަޖިލީހުގެ މި ދައުރުގައި ތަޅުމަށް ދާނެ ކަމަށް." ރާފިޢު ވިދާޅުވިއެވެ.
ވަޒީރު ވިދާޅުވީ ރާއްޖޭގެ ކުޅިވަރުގެ މުސްތަގުބަލައްޓަކައި ކުރަން އޮތް އެންމެ މުހިންމު ކަމަކީ ހައިޕާފޯމަންސް ސެންޓަރެއް އެޅުން ކަމަށެވެ.
"މިއީ ރާއްޖޭގައި ވަރަށް ގިނަ ޒަމާންވީ ކަމެއް، ކުރަން ބޭނުންވެ ނުވެ އޮންނަތާ. މިހާރު މިވަނީ 2025 ވަނަ އަހަރު ބަޖެޓުގައި ހިމެނި، ހައިޕާފޯމެންސް ސެންޓަރު އެޅުމަށް ކަނޑައެޅި، އެކަން ކުރެވޭ ގޮތަށް" ރާފިޢު ވިދާޅުވިއެވެ.
މީގެ އިތުރުން ކުޅިވަރު އެތުލީޓުންގެ މުސާރަ ބޮޑުކުރުމަކީ ރައީސުލްޖުމްހޫރިއްޔާގެ ވައުދުފުޅެއްކަން ފާހަގަކުރައްވަމުން ވަޒީރު ވިދާޅުވީ އެތުލީޓުންނާއި އެހެނިހެން އޮފިޝަލުންގެ މުސާރަ ހަމަހަމަކުރެވި، މިހާރު ބަޖެޓުގައި ހިމަނާފައިވާނެ ކަމަށެވެ.