ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގައި މިއަދު ހަވީރު ކުޅުނު މެޗުގައި އަލީ ނަސީމް ހެދި ހެޓްރިކާއެކު، ބ. އޭދަފުށިން ބޮޑު މޮޅެއް ހޯދައިފިއެވެ.
ގައުމީ ފުޓްބޯޅަ ދަނޑުގައި ކުޅުނު ގްރޫޕް ބީގެ މެޗުން އޭދަފުށި މޮޅުވީ ބ. ތުޅާދޫ އަތުން 5-1 ގެ ނަތީޖާއަކުންނެވެ.
މި މެޗުގައި އޭދަފުށީގެ ފަރާތުން މޮޅު ކުޅުމެއް ފެނިގެންދިޔައިރު، މެޗު ފަށައިގެން 13 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. މި ލަނޑު ކާމިޔާބުކޮށްދިނީ ޑިފެންޑަރު މުޙައްމަދު އަޖުފާނެވެ. އޭގެ ފަހުން މެޗުގެ ފުރަތަމަ ހާފު ނިމެން ހަތަރު މިނެޓަށް ވެފައި ވަނިކޮށް އޭދަފުށިން ލީޑު ފުޅާކުރިއިރު، މި ލަނޑު ޖަހައިދިނީ ޖައުޝަން މުޙައްމަދެވެ. އަދި ފުރަތަމަ ހާފުގެ އިތުރު ވަގުތުގައި އޭދަފުށީގެ ތިންވަނަ ލަނޑު ޖަހައިދިނީ އަލީ ނަސީމެވެ.
މި މެޗުގެ ދެވަނަ ހާފުގެ ކުޅުން ފަށައިގެން 10 ވަނަ މިނެޓުގައި އޭދަފުށިން އިތުރު ލަނޑެއް ޖެހިއިރު، މި ލަނޑުވެސް ކާމިޔާބުކޮށްދިނީ އަލީ ނަސީމެވެ. އެކަމަކު މެޗުގެ 61 ވަނަ މިނެޓުގައި ތުޅާދޫން ލަނޑެއް ކާމިޔާބުކުރިއިރު، މި ލަނޑު ޖަހައިދިނީ އަޙްމަދު ހުސެއިނެވެ. މި މެޗުގައި އޭދަފުށީގެ އަލީ ނަސީމް ހެޓްރިކް ހަދާފައިވަނީ މެޗުގެ 70 ވަނަ މިނެޓުގައެވެ. މި ލަނޑަކީ ހާފުގެ މެދާ ހިސާބުން ފޮނުވާލި ބާރު ހަމަލާއަކުން އޭނާ ކާމިޔާބުކުރި ލަނޑެކެވެ.
މުޅި ރާއްޖެއަށް ހުޅުވާލައިގެން ބާއްވާ މި މުބާރާތުގައި ޖުމްލަ 17 ޓީމެއް ވާދަކުރާއިރު، މި ޓީމުތައް ވަނީ ހަތަރު ގުރޫޕަކަށް ބަހާލާފައެވެ. މުބާރާތުގެ ގުރޫޕް އޭގައި ހިމެނެނީ ފުވައްމުލައް ސިޓީ އާއި، ދ. ކުޑަހުވަދޫ އާއި، ގދ. ފަރެސްމާތޮޑާ އާއި ދ. މީދޫ އަދި ހއ. ދިއްދޫއެވެ. ގުރޫޕް ބީގައި ހިމެނެނީ މާލެ ސިޓީ އާއި، ތ. ތިމަރަފުއްޓާއި، ބ. އޭދަފުށި އަދި ބ. ތުޅާދޫއެވެ. ގުރޫޕް ސީގައި އައްޑޫ ސިޓީ އާއި، ޅ. ކުރެންދޫ އާއި، ކ. ހުރާ އަދި ކ. ގުރައިދޫ ހިމެނޭއިރު، ގުރޫޕް ޑީގައި ހިމެނެނީ ޅ. ނައިފަރާއި، ކ. މާފުއްޓާއި، ރ. އަލިފުށި ބ. ކެންދޫއެވެ.