ވެހިކަލް ގެންގުޅެވޭނެ މުއްދަތު ކަނޑައަޅާ ޚާއްސަ ނިޒާމެއް ރާއްޖޭގައި ތަޢާރަފުކުރަނީ

އުޅަނދެއްގެ ވެރިފަރާތަށް އެ އުޅަނދެއް ގެންގުޅެވޭނެ މުއްދަތު ކަނޑައެޅުމަށް "ސެޓްފިކެޓް އޮފް އެންޓައިޓަލްމަންޓް" ނިޒާމެއް ތަޢާރަފުކޮށް އެކުލަވާލުމުގެ މަސައްކަތް ދަތުރުފަތުރާ މަދަނީ އުދުހުންތަކާ ބެހޭ ވުޒާރާއިން ފަށްޓަވައިފިއެވެ.

މި ނިޒާމަކީ ވެހިކަލްތަކުގެ އަދަދު ކޮންޓްރޯލްކުރުމަށް، ކުރިއަރާފައިވާ ޤައުމުތަކުގައި ބޭނުންކުރާ ނިޒާމެކެވެ. ދަތުރުފަތުރާ މަދަނީ އުދުހުންތަކާ ބެހޭ ވުޒާރާއިން އެމަސައްކަތް ފަށާފައިވާކަން ހާމަކުރެއްވީ އަންނަ އަހަރަށް އެވުޒާރާއިން ރާވާފައިވާ މަސައްކަތްތަކާ ގުޅޭގޮތުން ޙިއްސާކޮށްފައިވާ މަޢުލޫމާތުގައެވެ.

ދަތުރުފަތުރާ ބެހޭ ވުޒާރާއިން ހާމަކުރާގޮތުގައި މިދިޔަ 5 އަހަރުދުވަހުގެ ތެރޭގައި ރާއްޖޭގައި 69،780 އުޅަނދު ރަޖިސްޓްރީކޮށްފައިވެއެވެ. އޭގެ ތެރެއިން 42،000 އުޅަނދު ރަޖިސްޓްރީކޮށްފައިވަނީ މާލެއަށެވެ. ކަސްޓަމްސްގެ ތަފާސްހިސާބުން ދައްކާގޮތުގައި މިދިޔަ އަހަރު އެކަނި 16000އަށްވުރެ ގިނަ އުޅަނދު އެތެރެކުރިއެވެ.


މިއާއެކު މާލެ ސަރަޙައްދަށް އެއްވެސް ކޮންޓްރޯލެއް ނެތި އުޅަނދު ރެޖިސްޓްރީކުރުމާއި ތޮއްޖެހޭ މައްސަލަ ހައްލުކުރުމަށް ސަރުކާރުން ވަނީ ގިނަ މަސައްކަތްތަކެއް ފައްޓަވާފައެވެ.

އެއްވެސް ކޮންޓްރޯލެއް ނެތި އުޅަނދު އެތެރެކުރާ މައްސަލަ ޙައްލުކުރުމަށް، މާލޭގެ އިތުރުން ކޮންމެ ރަށެއްގައި އެންމެ ގިނައިން ވެހިކަލް ދުއްވޭ ކެރީންގ ކެޕޭސިޓި ކަނޑައެޅުމުގެ ފަސޭހަ އުސޫލެއް މިއަހަރުގެ މަރޗް މަހު ވަނީ އާއްމުކޮށްފައެވެ. ލާމަރުކަޒީ ޤާނޫނު ބުނާގޮތުން ކޮންމެ ސިޓީއެއްގައި ގެންގުޅޭ އުޅަނދުގެ ބާވަތާއި ޢަދަދާއި ޢުމުރު ކަނޑައެޅުމަކީ އެ ކައުންސިލްގެ ޤާނޫނީ ޒިންމާއެކެވެ. މިހާރު ގެނެސްފައިވާ އިސްލާހުތަކާއެކު، މާލެ ސަރަހައްދުގައި އުޅަނދު ގިނަވެ ތޮއްޖެހުމުގެ މައްސަލައަށް ދާއިމީ ޙައްލެއް ގެނެވޭނެކަމަށް ސަރުކާރުން ވިދާޅުވެއެވެ.

މި ދާއިރާއިން އަންނަ އަހަރު ކުރިއަށްގެންދިއުމަށް ރާވާފައިވާ މަސައްކަތްތަކުގެ ތެރޭގައި، ކެރީން ކެޕޭސިޓީ ކަނޑައެޅުމާއެކު މާލެ ސަރަޙައްދަށް ވެހިކަލް ގެންނަން ބޭނުންވާ ފަރާތްތަކަށް އެއްހަމައަކުން އޯޕަން ބިޑިންގ ސިސްޓަމެއްގެ ތެރެއިން ފުރުޞަތު ދިނުމަށް "ސެޓްފިކެޓް އޮފް އެންޓައިޓަލްމަންޓް" ނިޒާމް ތަޢާރަފުކުރުމަށް ވަނީ ހަމަޖެހިފައެވެ. މިއީ ވެހިކަލްގެ ހާލަތަށް ބަލާ، އުޅަނދުތައް ބޭނުންކުރެވޭނެ މުއްދަތު ކަނޑައަޅައި ހުއްދަ ދެވޭ ޚާއްސަ ނިޒާމެކެވެ. މި އޫސޫލަށް ޢަމަލުކުރަން ފެށުމުން، އުޅަނދުގެ ވެރިފަރާތަށް، އެ ވެހިކަމެއް ބޭނުންކުރުމަށް ވަކި މުއްދަތެއް ކަނޑައަޅާ ލައިސަންސެއް ދޭނެއެވެ.

އަދި އެ މުއްދަތު ހަމަވުމުން ވެހިކަލްގެ ޙާލަތަށް ބަލައި ލައިސަންސް އާ ކުރުން ނުވަތަ، ކަނޑައެޅޭ އުސޫލަކުން ވެހިކަލް ވިއްކާލުން ނުވަތަ ނައްތާލުމުގެ ފުރުޞަދު ލިބިގެންދާނެއެވެ. މިއީ ވެހިކަލް ގިނަވުމުގެ މައްސަލަ ޙައްލުކުރުމަށް ސިންގަޕޫރު ފަދަ ކުރިއަރާފައިވާ ޤައުމުތަކުގައި އަމަލުކުރާ ނިޒާމެކެވެ.

މީގެއިތުރުން ވެހިކަލް ވިއްކަން ބޭނުންވާ ފަރާތްތަކަށް ފަސޭހަކަމާއެކު ވިއްކުމުގެ ފުރުޞަތު ހުޅުވާލުމުގެ ގޮތުން ފަންޑެއް (ބައިބެކް ޕްރޮގްރާމް) އެކުލަވާލާ، އުޅަނދުގެ ވެރިފަރާތުގެ އަތުން އުޅަނދުތައް ގަނެ ރީސައިކަލް ކުރުން ނުވަތަ ރީ އެކްސްޕޯޓް ކުރުމުގެ މަސައްކަތް ފެށުމަށްވެސް އަންނަ އަހަރަށް ވަނީ ރާވާފައެވެ.

އަދި ވެހިކަލް ދުއްވުމުގައި ނަގަންޖެހޭ ރޯޑްވަރދިނަސް ދޫކުރުމުގެ ހަރުދަނާ ނިޒާމެއް އެކަށައެޅުމުގެ މަސައްކަތް ދަނީ ކުރަމުންނެވެ.