ފައިދާއަށް ނުބަލައި ޕީއެސްއައިޕީގެ ބޮޑެތި މަޝްރޫޢުތައް ބަޖެޓުގައި ނުހިމަނާ ގޮތަށް ހަދަނީ

ސަރުކާރުން ހިންގާ މަޝްރޫޢުތަކަކީ ބެޖެޓުގައި ހިމަނާއިރު، ޢަމަލީ މަސައްކަތް ފަށޭނެ މަޝްރޫޢުތަކަށް ހެދުމަށް ޕްރޮޖެކްޓް ޕްރިޕަރޭޓަރީ ފަންޑެއް ޤާއިމްކުރުމަށް ސަރުކާރުން ނިންމައިފިއެވެ. މީގެ ސަބަބުން މަޝްރޫޢުތަކުގެ ފެށުން އަވަސްވެ، ކުރިން މަޝްރޫޢުތަކާއި ގުޅޭ އިދާރީ ހުރިހާ މަސައްކަތެއް ކުރެވޭނެއެވެ.

އަންނަ އަހަރަށް ލަފާކުރާ ދައުލަތުގެ ބަޖެޓާއި ގުޅޭ ބަޖެޓް ޕޮޒިޝަން ރިޕޯޓުގައި ސަރުކާރުން ހިންގާ ޕަބްލިކް ސެކްޓަރ އިންވެސްޓްމެންޓް ޕްރޮގްރާމް މަޝްރޫޢުތައް ތަރުތީބުކޮށް ހިންގުން ހަރުދަނާ ކުރުމަށް ޕްރޮޖެކްޓް ޕްރިޕަރޭޓަރީ ފަންޑެއް ޤާއިމް ކުރުމަށް ހިމަނާފައިވެއެވެ. މިއީ 2021 ވަނަ އަހަރުގެ ފަބްލިކް އެކްސްޕެންޑިޗަރ އެސެސްމަންޓް އަދި ފައިނޭންޝަލް އެކައުންޓަބިލިޓީ (ޕެޕާ) އެސެސްމެންޓް، އަދި 2023 ވަނަ އަހަރުގެ ޕަބްލިކް އިންވެސްޓްމެންޓް މެނޭޖްމެންޓް އެސެސްމެންޓު(ޕީމާ) ގައި ލާފާ އަރުވާފައިވާ ކަމަކެވެ. އަންނަ އަހަރު ޤާއިމް މި ފަންޑް ޤާއިމް ކުރުމަށް ބަޖެޓުގައި 50 މިލިޔަން ރުފިޔާ ހިމަނާފައިވެއެވެ.

ބަޖެޓް ޕޮޒިޝަން ރިޕޯޓުގައި މާލީ ވުޒާރާއިން ވިދާޅުވީ، ކޮންމެ އަހަރަކުވެސް އެކި ވުޒާރާތަކާއި މުޢައްސަސާތަކުން ޖެހިގެން އަންނަ އަހަރު ހިންގުމަށް ރާވަފައިވާ މަޝްރޫޢުތައް އެ އިދާރާއަކަށް ކަނޑައެޅިފައިވާ ބަޖެޓުގެ ތެރެއިން ހުށަހަޅާ ކަމަށެވެ. ނަމަވެސް ނިއު ޕޮލިސީ އިނީޝިއޭޓިވް ނުވަތަ އަލަށް ފަށާ މަޝްރޫއުތަކަކީ އެކަށީގެންވާ ދިރާސާތައް އެންމެ ފުރިހަމައަށް ކުރެވިގެން ހުށަހަޅާ މަޝްރޫޢުތަކެއް ނޫން ކަމަށެވެ. އެހެންކަމުން މަޝްރޫޢުތައް ހިންގުން ހަރުދާނާކުރުމަށް ބަޖެޓުގައި ޕްރޮޖެކްޓް ހިމެނުމުގެ ކުރިން ހަދަން ޖެހޭ ދިރާސީ މަސައްކަތް ކުރުމަށް، ޚާއްސަ ފަންޑެއް ޤާއިމްކުރުމަށް ވަނީ ނިންމާފައެވެ.

މިކަމުގެ ސަބަބުން މަޝްރޫޢުތައް އަވަހަށް ފެށި، މަޝްރޫޢުތަކުގެ، ސްކޯޕް ރަނގަޅަށް ދެނެގެނެވި ވޭރިއޭޝަން ނުވަތަ މަޝްރޫއުތައް ފެށުމަށް ފަހު ގެންނަން ޖެހޭ ބަދަލުތައް މަދުކުރެވިގެންދާނެއެވެ. މިއާއެކު މަޝްރޫޢުތަކުގެ ޖުމްލަ ޚަރަދު ދެނެގަނެވި މެދުރާސްތާ ބަޖެޓް ތައްޔާރުކުރުމުގައި މަޝްރޫޢު ހަލުއިކަމާއެކު ކުރިއަށް ގެންދިއުމަށް ބޭނުންވާ ޚަރަދު ހިމެނުމަށް ފަސޭހަވެގެންދާނެ ކަމަށްވެސް މާލީ ވުޒާރާއިން ވިދާޅުވެއެވެ. މީގެ އިތުރުން މިކަމުގެ ސަބަބުން މަޝްރޫޢުތައް ތަންފީޒުކުރުމަށް ބޭރުގެ އެހީ ހޯދުމަށްވެސް ފަސޭހަވެގެންދާނެ ކަމަށް ސަރުކާރުން ޤަބޫލުކުރައްވައެވެ.

މި ފަންޑު މެދުވެރިކޮށް މަޝްރޫޢުއެއް ހިންގުމަށް ބޭނުންވާ ދިރާސާ ހެދުމަށް ހުށަހަޅަން ޖެހެނީ މާލީ ވުޒާރާއަށެވެ. އަދި އެހާ ހިސާބުން ސަރުކާރުގެ ތަރައްޤީގެ ޕްލޭނާއި ސިޔާސަތުތަކާއި ގުޅިފައި އޮތް މިންވަރު އިވެލުއޭޓްކޮށް ކުރިއަށް ގެންދަން ފެނޭތޯ ނުވަތަ ނޫންތޯ އެއިދާރާއަކަށް އަންގާނެއެވެ. އެގޮތުން ކުރިއަށް ގެންދަން ފެންނަ މަޝްރޫޢުތަކަށް 5 އެސެސްމެންޓެއް ހަދަން ޖެހެއެވެ.

މަޝްރޫޢުތައް ފެށުމަށް ތައްޔާރުކުރަން ޖެހޭ ރިޕޯޓުތައް

• ނީޑް އެސެސްމެންޓް ރިޕޯޓް
• ޕްރީ ފީސިބިލިޓީ އަދި ޕްރޮޖެކްޓް ފީސިބިލިޓީ
• އެންވައިރޮމެންޓް އިމްޕެކްޓް އެސެސްމެންޓް
• މަޝްރޫޢު ކޮންސެޕްޓް އަދި ޑިޒައިން ތައްޔާރުކުރުން
• ސޯޝިއޯ އިކޮނޮމިކް ބެނެފިޓް ރިޕޯޓް ތައްޔާރުކުރުން

މިގޮތަށް ޢަމަލުކުރާއިރު މަޝްރޫޢުތައް 4 ގިންތިއަކަށް ބަހަލާއެވެ. އަދި ކޮންމެ މަޝްރޫޢުކަށް ބޭނުންވާ ދިރާސާތައް ހެދުމަށް 500،000 ރުފިޔާއާއި ހަމައަށް، ފައިސާ ދޫކުރާނެއެވެ. މި ފަންޑުގެ އެހީ ހޯދުމަށް މާލީ ވުޒާރާއަށް ހުށަހެޅޭނީ 70 މިލިއަން ރުފިޔާއަށްވުރެ ބޮޑެތި މަޝްރޫޢުތަކަށެވެ.

މަޝްރޫޢުތައް ގިންތިކުރާ ގޮތް

• ކުދި މަޝްރޫޢުތައް - 5 މިލިޔަން ރުފިޔާއަށްވުރެ ދަށް މަޝްރޫޢުތައް
• މެދު މަޝްރޫޢުތައް - 5 މިލިޔަން ރުފިޔާ - 70 މިލިޔަން ރުފިޔާ
• ބޮޑެތި މަޝްރޫޢުތައް - 70 މިލިޔަން ރުފިޔާ - 200 މިލިޔަން ރުފިޔާ
• މެގަ މަޝްރޫޢުތައް - 200 މިލިޔަން ރުފިޔާ އަށްވުރެ މަތީ

މިގޮތަށް މަޝްރޫޢުތައް ގިންތި ކުރުމާއެކު 70 މިލިޔަން ރުފިޔާއަށްވުރެ ބޮޑު ޚަރަދެއް ހިންގާ މަޝްރޫޢުތައް ފެށޭނީ، ދިރާސާގެ މަސައްކަތް ނިންމައި މާލީ ވުޒާރާއަށް ހުށަހަޅައިގެންނެވެ.

މީގެ އިތުރުން ދައުލަތުގެ ޚަރަދުގައި ހިންގާ މަޝްރޫޢުތައް ހިންގުމަށް ޚާއްސަ ޤަވާއިދަށް އެކުލަވާލުމަށް ވަނީ ނިންމާފައެވެ. މިއީ މިހާރު ރައްޔިތުންގެ މަޖިލީހަށް ހުށަހަޅާފައިވާ ދައުލަތުގެ ފިސްކަލް ޒިންމާގެ ޤާނޫނު ދަށުން ހަދަން އެ ވުޒާރައިން ނިންމާފައިވާ ޤަވާދެކެވެ. މި ޤަވާއިދުގައި މިނިސްޓްރީތަކާއި މިނިވަން މުޢައްސަސާތަކާއި ކައުންސިލްތަކުން އަލަށް ފަށާ މަޝްރޫޢުތައް ބައިނަލްއަޤްވާމީ ރަނގަޅު އުސޫލުތަކާއި އެއްގޮތަށް އެކުލަވާލައި ނިންމުމަށް ކުރިއަށް ގެންދަންޖެހޭ މަރުހަލާތައް ތަފްސީލްކޮށް ބަޔާންކޮށްފައިވާނެއެވެ.

މިއާއެކު ދައުލަތުގެ ޚަރަދުގައި ހިންގާ މަޝްރޫޢޫތަކުގެ ފުރިހަމަ މައުލޫމާތު އެއް ޕްލެޓްފޯމެއްގެ ތެރެއިން މާލީ ވުޒާރާއަށް ލިބި، މަޝްރޫޢުތަކުގެ ސައްޙަކަން ކަށަވަރުކުރެވިގެންދާނެ ކަމަށް މާލީ ވުޒާރާއިން ވިދާޅުވެއެވެ.

ސަރުކާރުން ޕީއެސްއައިޕީ މަޝްރޫޢުތައް ހިންގުން ހަރުދަނާ ކުރުމަށް ނިންމާފައިވާއިރު، މިއަންނަ އަހަރަށް ލަފާ ކުރާ ބަޖެޓުތައި ޕީއެސްއައިޕީ މަޝްރޫޢުތަކަށް 12.3 ބިލިޔަން ރުފިޔާ ވަނީ ކަނޑައަޅާފައެވެ. މިއީ ބަޖެޓުގެ 21.9 އިންސައްތައެވެ.