ލުބްނާންގެ މުސްލިމުންގެ ނަސްލުހޭދު ކުރަން ޔަހޫދީ ފައުޖުން ހިންގަމުންދާ ލާއިންސާނީ ޖަރީމާގައި ފާއިތުވި ދެ މަހެއްހާ ދުވަހުގެ ތެރޭގައި 200އަށްވުރެ ގިނަ ކުޑަކުދިން ޝަހީދު ކޮށްލާފައިވާ ކަން ކުޑަކުދިންނާ ބެހޭ އދގެ އިދާރާ، ޔުނިސެފުން ހާމަކޮށްފިއެވެ. ޒަޔަނިސްޓު އިސްރާއީލުގެ ހައްދުފަހަނަ އެޅި ބޮޑުވަޒީރު ބެންޖަމިން ނަތަންޔާހޫގެ އަމުރަށް ޔަހޫދީ ފައުޖުން ލުބްނާންގެ ރައްޔިތުން ޝަހީދުކޮށް ނެތިކޮށްލަން ލާއިންސާނީ ޢުދުވާނެއް ފަށާފައި ވަނީ ސެޕްޓެންބަރު 23ވަނަ ދުވަހުއެވެ.
ލުބްނާންގެ މުޖާހިދުންގެ ޖަމާޢަތް، ޙިޒްބުاللهއާއި ޔަހޫދީ ފައުޖުގެ ނިރުބަވެރި ސިފައިންނާ ދެމެދު ޙަމަލާ ބަދަލު ކުރަން ފަށާފައި ވަނީ މީގެ 13 މަސް ކުރިން ފަލަސްޠީނުގެ ޣައްޒާގެ މުސްލިމުންގެ ނަސްލުހޭދު ކުރަން ޔަހޫދީން ލާއިންސާނީ ޢުދުވާނެއް ފެށުމާ ގުޅިގެންނެވެ. ޒަޔަނިސްޓު އިސްރާއީލުގެ ރަށްތަކާއި ޔަހޫދީ ފައުޖުގެ އަސްކަރީ މަރުކަޒުތަކަށް ޙިޒްބުاللهން ޙަމަލާ ދޭން ފަށާފައި ވަނީ ފަލަސްޠީނުގެ ރައްޔިތުންނާއި، އެ ޤައުމުގެ މިނިވަން ކަމަށް ޖިހާދު ކުރާ މުޖާހިދުންނަށް ވާގިވެރިވުމުގެ ގޮތުންނެވެ. އެ ޖަމާޢަތުގެ އަމާޒަކީ ޣައްޒާ ޢުދުވާން ހުއްޓުމަކަށް ގެނައުމަށް ޔަހޫދީންނަށް ބާރު އެޅުމެވެ.
ނަމަވެސް، ސެޕްޓެންބަރު 23ވަނަ ދުވަހުން ފެށިގެން ޔަހޫދީ ފައުޖުން ދަނީ ލުބްނާންގެ ޢާންމުން ދިރިއުޅޭ ރަށްތަކަށް ބޮންއަޅަމުންނެވެ. އެންމެ ނުރައްކާތެރި ޙަމަލާތައް އަމާޒު ކުރަމުން ގޮސްފައި ވަނީ ވެރިރަށް ބައިރޫތާއި ދެކުނުގެ ރަށްތަކުގެ އިތުރުން އަލް-ބިޤާޢު ވާދީގެ ސަރަޙައްދުތަކަށެވެ. އެއަށްފަހު، އޮކްޓޫބަރު 1ވަނަ ދުވަހު ޔަހޫދީ ފައުޖުގެ ނިރުބަވެރި ސިފައިން، ބަރުހަތިޔާރާއި އަސްކަރީ ޓޭންކުފަހަރާ އެކު ލުބްނާންގެ ދެކުނުގެ ރަށްތަކަށް އަރައިގަނެ، ޤަތުލުޢާންމު އިތުރަށް ފުޅާކުރިއެވެ.
ޔަހޫދީންގެ ނިރުބަވެރި ޢުދުވާނީ ޙަމަލާތަކުގައި ޝަހީދު ކޮށްލާފައިވާ ކުޑަކުދިންގެ އަދަދު 200އަށް އުފުލިފައިވާއިރު، އިތުރު 1,100އަށްވުރެ ގިނަ ކުދިން ޒަޚަމު ކޮށްލާފައިވާ ކަން ޔުނިސެފުން ހާމަކުރިއެވެ. "ލުބްނާންގައި ޝަހީދު ކޮށްލާފައިވާ ކުޑަކުދިންގެ އަދަދު 200އަށް އުފުލިފައިވީ ނަމަވެސް ފެންނަމުން ދަނީ ވަރަށް ހިތާމަވެރި މަންޒަރެއް: އެ އަނިޔާވެރިކަން ހުއްޓުވުމުގެ ބާރު އޮތް ފަރާތްތަކުން އެ ކަން ހުއްޓުވަން އެކަށީގެންވާ މަސައްކަތްތަކެއް ކުރަމުންދާ މަންޒަރެއް ނުފެނޭ،" ޔުނިސެފްގެ ތަރުޖަމާނު ޖޭމްސް އެލްޑަރ ވިދާޅުވިއެވެ.
"ލުބްނާންގެ ކުޑަކުދިންގެ ނަޒަރުން ބަލާއިރު ފެންނަމުން ދަނީ އަނިޔާވެރި ކަމަށް އެއްވެސް ފަރުވާލެއް ދެމުން ނުދާ މަންޒަރު،" އޭނާ ވިދާޅުވިއެވެ. ނަމަވެސް، ލުބްނާންގެ ކުޑަކުދިން ޤަތުލު ކުރަމުން ދަނީ ޔަހޫދީ ފައުޖުގެ ނިރުބަވެރި ސިފައިން ކަން، އަދި އެ މީހުން އެ ކުށްތައް ހިންގަމުން ދަނީ ނިރުބަވެރި ނަތަންޔާހޫގެ އަމުރަށް ކަން ސާފުކޮށް ވިދާޅުވާން އެލްޑަރ ވަނީ ދެކޮޅު ހައްދަވާފައެވެ. އޭނާ ވިދާޅުވީ، ލުބްނާންގެ ކުޑަކުދިން ޝަހީދުވަމުން ދަނީ ކޮން ބަޔެއްގެ އަނިޔާވެރި އަމަލުތަކެއްގެ ސަބަބުން ކަން މީޑިޔާ ރިޕޯޓުތަކުން ސާފުވާނެ ކަމުގައެވެ.
ޣައްޒާގެ ކުޑަކުދިންނަށް ޔަހޫދީ ފައުޖުން ޖައްސާފައިވާ ނިކަމެތި ހާލަތާ އެއްފަދަ މަންޒަރުތަކެއް ލުބްނާނުން ފެންނަމުންދާ ކަމުގައި ވެސް އޭނާ ވިދާޅުވިއެވެ. ޣައްޒާ ޢުދުވާނުގައި ޝަހީދު ކޮށްލާފައިވާ މީހުންގެ އަދަދު 43,000އަށް އުފުލިފައިވާއިރު، އޭގެ ތެރޭގައި 17,000އެއްހާ ކުޑަކުދިން ހިމެނެއެވެ. އަދި، ޣައްޒާގެ 2.3 މިލިޔަން މީހުންގެ އާބާދީގެ ބޮޑު އިންސައްތައެއް ވަނީ ގެދޮރު ނެތިކޮށްލާފައެވެ.
ލުބްނާންގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޖަރީމާއާ އެކު ގެދޮރު ނެތިފައިވާ ކުޑަކުދިންނަށް އެހީތެރިކަން ފޯރުކޮށްދޭން ޔުނިސެފުން ދަނީ މަސައްކަތް ކުރަމުންނެވެ. މި ގޮތުން، އެ ކުދިންނަށް ނަފުސާނީ ފަރުވާގެ ޚިދުމަތްތަކާއި، ބޭސްފަރުވާއަށް ބޭނުންވާނެ ސާމާނުގެ އިތުރުން ކާބޯތަކެއްޗާއި ނިދުމަށް ބޭނުން ކުރާނެ ސާމާނު ދަނީ ފޯރުކޮށްދެމުންނެވެ. "ލުބްނާންގައި، ޣައްޒާއެކޭ އެއް ފަދައިން، ބަލައިނުގަނެވޭނެ ކަންކަން މަޑުމަޑުން އެ ދަނީ ޢާންމުވެ ވަރިހަމަވަމުން،" އެލްޑަރ ވިދާޅުވިއެވެ.
ލުބްނާނުގެ މުސްލިމުންނާ ދެކޮޅަށް ހިންގަމުންދާ ޢުދުވާނުގައި ޝަހީދު ކޮށްލާފައިވާ ޢާންމުންގެ ޢަދަދު ވަނީ 3,516އަށް އުފުލިފައެވެ. އޭގެ ތެރޭގައި ގިނަ ޢަދަދެއްގެ އަންހެނުންނާއި ކުޑަކުދިން ހިމެނޭ ކަމުގައި ލުބްނާނުގެ ޞިއްޙަތާ ބެހޭ ވުޒާރާއިން ބުންޏެވެ. އަދި, ޒަޚަމު ކޮށްލާފައިވާ މީހުންގެ ޢަދަދު 14,929އަށް އަރައެވެ. ޔަހޫދީންގެ ޢުދުވާނުގައި ގެދޮރު ނެތިކޮށްލާފައިވާ މީހުންގެ ޢަދަދު 1.2 މިލިޔަނަށް އުފުލިފައިވާއިރު, އދން ބުނީ އޭގެ ތެރެއިން ގިނަ ޢަދަދެއްގެ ބަޔަކު މި ވަގުތު ދިރިއުޅެމުން ދަނީ މަގުތަކުގެ މަތީގައި ކަމުގައެވެ.