އަންނަ އަހަރުގެ ބަޖެޓަކީ ތަންފީޒީ އަދި ތަރައްޤީ ގެނެސްދޭނެ ބަޖެޓެއް: މެންބަރުން

އަންނަ އަހަރަށް ސަރުކާރުން ލަފާކުރާ ބަޖެޓަކީ ރައްޔިތުން ބޭނުންވާ ތަރައްގީ ގެނެސްދޭނެ އަދި ތަންފީޒު ކުރެވޭނެ ބަޖެޓެއް ކަމަށް ރައްޔިތުންގެ މަޖިލީހުގެ މެންބަރުން ވިދާޅުވެއްޖެއެވެ.

ސަރުކާރުގެ ފަރާތުން ހުށަހަޅުއްވާފައިވާ 2025ވަނަ އަހަރަށް ލަފާ ކުރާ ބަޖެޓުގެ ބަހުސް މަޖިލީހުގައި މިއަދު ވަނީ ފަށްޓަވާފައެވެ. ބަޖެޓަށް ވާހަކަދެއްކުމަށް ހުޅުވާލި ފުރުޞަތުގައިގިނަ މެންބަރުން ވަނީ އަންނަ އަހަރުގެ ބަޖެޓަކީ ރާއްޖޭގައި ހުރި މައްސަލަތަކަށް ހައްލު ލިބިގެންދާނެ ބަޖެޓެއްކަން ފާހަގަކުރައްވާފައެވެ.

ބަޖެޓަށް ވާހަކަދައްކަވަމުން ނިލަންދޫ ދާއިރާގެ މެންބަރު ޙަސަން މުފީދު ޢަބްދުލްގާދިރު ވިދާޅުވީ 2025ވަނަ އަހަރުގެ ބަޖެޓަކީ ޒިންމާދާރު އަދި ތަންފީޒީ ބަޖެޓެއް ކަމަށެވެ. މި ބަޖެޓުގެ ސަބަބުން ރައްޔިތުންގެ އެންމެ ބޮޑު ކަންބޮޑުވުން ކަމަށްވާ ގެދޮރުވެރިކަމުގެ މައްސަލައަށާއި އިޖުތިމާޢީ ގޮތުންނާއި އިގްތިސާދީގޮތުން ހުރި މައްސަލަތަކަށް ހައްލު ލިބިގެންދާނެ ކަމަށް މެންބަރު ވިދާޅުވިއެވެ.

ނިލަންދޫ ދާއިރާގެ މެންބަރު ވިދާޅުވީ މި ބަޖެޓުގެ ސަބަބުން ރާއްޖޭގެ ހުރިހާ ރައްޔިތުންނަށްވެސް ފައިދާވާނެކަމަށެވެ.

"މި ބަޖެޓަކީ ވަރަށް ފުރިހަމަ ކާމިޔާބީތަކެއް ލިބިގެންދާނެ، އަޅުގަނޑުމެންގެ ހަމަލޮލަށް ތަރައްގީއާއި ބޯހިޔާވަހިކަމާއި ތަހުޒީބުގެ ތެރެއަށް އަޅުގަނޑުމެން ގެނުވާނެ ބަޖެޓެއް ގޮތުގައި އަޅުގަނޑަށް މި ބަޖެޓް ފާހަގަކޮށްލެވޭ،" ޙަސަން މުފީދު ވިދާޅުވިއެވެ.

ހެންވޭރު އުތުރު ދާއިރާގެ މެންބަރު އަޙުމަދު އައިފާން ވިދާޅުވީ ކުރީ ސަރުކާރުތަކުން ބަޖެޓް ހުށަހަޅާއިރު މަޝްރޫއުތައް ހިމެނި ނަމަވެސް އެ މަޝްރޫއުތަކަށް ފައިސާ ކަނޑައަޅާފައި ހުންނަނީ ރައްޔިތުންނަށް އޮޅުވާލާ ގޮތަށް ކަމަށެވެ. އޭގެ ސަބަބުން މަޝްރޫއުތައް ހުއްޓި ރައްޔިތުންނަށް އޭގެ ސަބަބުން ގެއްލުން ލިބިގެންދާއިރު މި ސަރުކާރުގެ ފުރަތަމަ ބަޖެޓުންވެސް ފެނިގެންދަނީ ރައްޔިތުން ބޭނުންވާ ކަންކަން ހާސިލްވެގެންދާނެކަންކަމަށް އައިފާން ވިދާޅުވިއެވެ.

އައިފާން ވިދާޅުވީ އަންނަ އަހަރުގެ ބަޖެޓުގައި ހުރި ކަންކަން ތަންފީޒުވެގެން ދިއުމުން އިގްތިޞާދީ ގޮތުންނާއި އިޖުތިމާޢީ ގޮތުން ރާއްޖޭގައި ދިމާވެފައިވާ އެކި ކަންކަމަށް ހައްލު ލިބިގެންދާނެ ކަމަށެވެ.

"މި ބަޖެޓަކީ ދިވެހިރާއްޖޭގެ ރައްޔިތުން މި ބޭނުންވާ ތަރައްގީ ގެނެސްދޭނެ ބަޖެޓެއް. މި ބަޖެޓަކީ ދިވެހިރާއްޖޭގެ ރައްޔިތުންގެ ބޯހިޔާވަހިކަން ކަށަވަރުކޮށްދޭނެ ބަޖެޓަކަށް. ދިވެހި ރައްޔިތުންގެ ސިއްޙީ ނިޒާމް ހަރުދަނާކުރުމަށް މި ބަޖެޓުގައި ލިޔެވިފައި އެބަހުރި. ދިވެހިރާއްޖޭގެ ރައްޔިތުންނަށް އިގްތިސާދީ ފުދުންތެރިކަން ގެނެސްދޭން މި ބަޖެޓުގައި އެބަހުރި ލިޔެވިފައި. އެހެންވީމަ ހަގީގަތަކީ މި ބަޖެޓަކީ ވަރަށް ފުރިހަމަ ބަޖެޓެއް،" އައިފާން ވިދާޅުވިއެވެ.

މާފަންނު ދެކުނު ދާއިރާގެ މެންބަރު ޢަބްދުﷲ ރިފާޢު ވިދާޅުވީ ސަރުކާރުން ހުށަހަޅާފައިވާ ބަޖެޓަކީ ފުރިހަމަ ދިރާސާތަކެއް ކުރެވި ރައްޔިތުން އެދޭ ކަންކަން ފުރިހަމަވެގެންދާނެ ބަޖެޓަކަށްކަމަށެވެ. އަދި ރައީސުލްޖުމްހޫރިއްޔާ ވަކިވަކި ރަށްރަށް ވެވަޑައިގެންފައިވާ ވަޢުދުތައް މިހާރުވެސް މެނިފެސްޓޯއިން ފެންނަންހުރިއިރު ބަޖެޓުގައި ވަކި ރަށްތައް ހިމަނާފައިނުވިނަމަވެސް އެމަނިކުފާނު ވެވަޑައިގެންނެވި ވަޢުދުތައް ފުއްދޭނެކަމުގެ ފުރިހަމަ ޔަގީންކަން ބަޖެޓުން އެބައޮތް ކަމަށްވެސް އަބްދުﷲ ރިފާޢު ވިދާޅުވިއެވެ.

"ހުރިހާ ކަމެއް ފުރިހަމަކޮށް، އަދި ރައީސުލްޖުމްހޫރިއްޔާގެ މެނިފެސްޓޯގައި ލިޔެވިފައި ހުރި ކަންކަން ފުރިހަމަކޮށް ނިންމާލެވޭނެ ގޮތަކަށް މި ބަޖެޓް ތައްޔާރުކޮށްފައި އޮތްކަމީ އަޅުގަނޑުމެން މި ބަޖެޓަށް އެންމެ ބޮޑަށް ތާއީދު ކުރަންޖެހޭކަން. އިރާދަކުރެއްވިއްޔާ 2025ވަނަ އަހަރު ވެގެންދާނީ ރައްޔިތުންނަށް އުފާ ފާގަތި އަހަރަކަށް. ރައްޔިތުންނަށް ދައުލަތަށްދޭ ޚިދުމަތްތަކުގެ ފައިސާ ދުވަހުން ދުވަހަށް ރައްޔިތުންނަށް ލިބިގެންދާނެ އަހަރަކަށް،" ޢަބްދުﷲ ރިފާޢު ވިދާޅުވިއެވެ.

ސަރުކާރުގެ ފަރާތުން އަންނަ އަހަރަށް ލަފާ ކުރާ ބަޖެޓުގެ ގޮތުގައި ރައްޔިތުންގެ މަޖިލީހަށް ހުށަހަޅުއްވާފައިވަނީ 56.6 ބިލިޔަން ރުފިޔާގެ ބަޖެޓެކެވެ. މިއީ މި ސަރުކާރުން ހުށަހަޅާ ފުރަތަމަ ބަޖެޓަށްވާއިރު މި ބަޖެޓަކީ ފަހުގެ ތާރީހެއްގައި ހުށަހަޅާފައިވާ އެންމެ ޑެފިސިޓް ކުޑަ ބަޖެޓެވެ.