ލުބްނާންގެ މުސްލިމުންގެ ނަސްލުހޭދު ކުރަން ޔަހޫދީ ފައުޖުން ހިންގަމުންދާ ލާއިންސާނީ ޖަރީމާތައް ހުއްޓުމަކަށް ގެނައުމާ ގުޅޭ އެއްވެސް ހުށަހެޅުމެއް ލިބިފައި ނުވާ ކަމުގައި އެ ޤައުމުގެ މުޖާހިދުންގެ ޖަމާޢަތް، ޙިޒްބުاللهން ހާމަކޮށްފިއެވެ. އެ ޖަމާޢަތުން މި ކަން ހާމަކޮށްފައި މި ވަނީ، ލުބްނާން ޢުދުވާން ހުއްޓުމަކަށް ގެނައުމާ ގުޅޭ މަޝްވަރާތަކުގައި ކުރިއެރުންތަކެއް ހޯދިފައިވާ ކަމުގައި ޒަޔަނިސްޓުންގެ ޚާރިޖީ ވަޒީރު ބުނެފައިވާ ދަނޑިވަޅެއްގައެވެ. އަދި، ލުބްނާން ޢުދުވާން ހުއްޓުމަކަށް ގެނައުމާ ގުޅޭ އެއްބަސްވުމަކަށް ޒަޔަނިސްޓުންގެ ކެބިނެޓުން ރުހުން ދީފައިވާ ކަމުގެ މީޑިޔާ ރިޕޯޓުތައް ފެތުރެމުންދާ ދަނޑިވަޅެއްގައެވެ.
"މިހާތަނަށް، އަޅުގަނޑަށް ލިބިފައިވާ މަޢުލޫމާތަށް ބަލާއިރު، ލުބްނާނަށް ވެސް އަޅުގަނޑުމެންނަށް ވެސް [ޙިޒްބުاللهއަށް] އެއްވެސް ހުށަހެޅުމެއް ލިބިފައެއް ނެތް،" ޙިޒްބުاللهގެ މީޑިޔާ އޮފީހުގެ އިސް އޮފިޝަލެއް ކަމުގައިވާ މުޙައްމަދު އަފީފް ވިދާޅުވިއެވެ. "އަޅުގަނޑަށް ޤަބޫލު ކުރެވޭ ގޮތުގައި މިހާރު ވެސް ކުރިއަށް ދަނީ އެކި ޚިޔާލުތައް ހުށަހަޅައި މަޝްވަރާ ކުރުމުގެ މަރުހަލާ، ނަމަވެސް އެއްވެސް ހަރުދަނާ ނިންމުމެއް ނިންމާފައެއް ނެތް."
ނަމަވެސް، ޒަޔަނިސްޓު އިސްރާއީލުގެ ޚާރިޖީ ވަޒީރު ގިދިއޮން ސާރު ބުނީ ލުބްނާން ޢުދުވާން ހުއްޓުމަކަށް ގެނައުމާ ގުޅޭގޮތުން ކުރަމުންދާ މަޝްވަރާތަކުގައި ކުރިއެރުންތަކެއް ހޯދިފައިވާ ކަމުގައެވެ. އަދި، މި ވަގުތު މަޝްވަރާ ކުރަމުން ދަނީ، ޙަމަލާ ބަދަލު ކުރުން ހުއްޓައިލުން ތަންފީޒު ކުރާނެ ގޮތަކާ މެދުގައި ކަމުގައެވެ. އަދި، އެންމެ ބޮޑު ގޮންޖެހުމަކީ ވެސް އެ ކަން ތަންފީޒު ކުރުން ކަމުގައި އޭނާ ބުންޏެވެ.
ޒަޔަނިސްޓު އިސްރާއީލުގެ މީޑިޔާތަކުން ވަނީ، ސާރު އިޝާރާތް ކޮށްފައިވާ އެއްބަސްވުމާ ގުޅޭ އިތުރު މަޢުލޫމާތު ހާމަކޮށްފައެެވެ. ޔަހޫދީންގެ މީޑިޔާތަކުން ބުނީ، އެއްބަސްވުމުގެ ދަށުން އިސްރާއީލާއި ލުބްނާން ގުޅޭ ސަރަޙައްދީ ރޮނގު ކައިރީގައި ޙިޒްބުاللهގެ މުޖާހިދުން ހަރަކާތްތެރިވުން މަނާ ވާނެއެވެ. އަދި، އެ ސަރަޙައްދުގައި ތިބި ޙިޒްބުاللهގެ މުޖާހިދުން އަލް-ލަޔިޠާނީ ކޯރުގެ އުތުރަށް ފަހަތަށް ޖެހޭނެއެވެ. އެއަށް ފަހު، އިސްރާއީލް-ލުބްނާން ސަރަޙައްދީ ރޮނގު ބަލަހައްޓާނީ ޔަހޫދީ ފައުޖުން ކަމުގައި ވެސް ޒަޔަނިސްޓު މީޑިޔާތަކުން ރިޕޯޓު ކުރިއެވެ.
ލުބްނާންގެ އިތުރުން ފަލަސްޠީނުގެ ޣައްޒާގެ މުސްލިމުންގެ ނަސްލުހޭދު ކުރުމަށް ވެސް ޔަހޫދީ ފައުޖުން ދަނީ ލާއިންސާނީ ޖަރީމާތަކެއް ހިންގަމުންނެވެ. ޣައްޒާ ޢުދުވާން ފަށާފައި ވަނީ މީގެ 13 މަސް ކުރިންނެވެ. އެ ޢުދުވާން ހުއްޓައިލުމަށް ބާރު އެޅުމުގެ ގޮތުން ޙިޒްބުاللهން ވަނީ ޒަޔަނިސްޓުންގެ ރަށްތަކާއި ޔަހޫދީ ފައުޖުގެ އަމާޒުތަކަށް ޙަމަލާ ދޭން ފަށާފައެވެ. އަދި, ޙިޒްބުاللهގެ ޙަމަލާތައް ހުއްޓުވުމުގެ ނަމުގައި ޔަހޫދީ ފައުޖުން ލުބްނާންގެ ރަށްތަކާއި ޢާންމުންގެ ގެދޮރަށް ބޮން އަޅަން ފަށާފައި ވަނީ ސެޕްޓެންބަރު 23ވަނަ ދުވަހުއެވެ. އެއަށްފަހު, އޮކްޓޫބަރު 1ވަނަ ދުވަހު ޔަހޫދީ ފައުޖުގެ ނިރުބަވެރި ސިފައިން ވަނީ ލުބްނާންގެ ދެކުނުގެ ރަށްތަކަށް ބަރުހަތިޔާރާ އެކު އެއްގަމު މަގުން އަރައިގަނެ, ޤަތުލުޢާންމުތައް އިތުރުކޮށް ފުޅާކޮށްފައެވެ.
ލުބްނާނުގެ މުސްލިމުންނާ ދެކޮޅަށް ހިންގަމުންދާ ޢުދުވާނުގައި ޝަހީދު ކޮށްލާފައިވާ ޢާންމުންގެ ޢަދަދު ވަނީ 3,189އަށް އުފުލިފައެވެ. އޭގެ ތެރޭގައި ގިނަ ޢަދަދެއްގެ އަންހެނުންނާއި ކުޑަކުދިން ހިމެނޭ ކަމުގައި ލުބްނާނުގެ ޞިއްޙަތާ ބެހޭ ވުޒާރާއިން ބުންޏެވެ. އަދި, ޒަޚަމު ކޮށްލާފައިވާ މީހުންގެ ޢަދަދު 14,078އަށް އަރައެވެ. ޔަހޫދީންގެ ޢުދުވާނުގައި ގެދޮރު ނެތިކޮށްލާފައިވާ މީހުންގެ ޢަދަދު 1.2 މިލިޔަނަށް އުފުލިފައިވާއިރު, އދން ބުނީ އޭގެ ތެރެއިން ގިނަ ޢަދަދެއްގެ ބަޔަކު މި ވަގުތު ދިރިއުޅެމުން ދަނީ މަގުތަކުގެ މަތީގައި ކަމުގައެވެ.