ރާއްޖޭގައި މެރިކަލްޗަރ ސިނާޢަތް ތަރައްޤީކުރަން 4 ސަރަޙައްދެއް ކަނޑައަޅައިފި

ރާއްޖޭގައި މެރިކަލްޗަރ ސިނާޢަތް ތަރައްޤީކުރަން 4 ސަރަޙައްދެއް ސަރުކާރުން ކަނޑައަޅުއްވައިފިއެވެ.

މިކަން ހާމަކުރެއްވީ ބޭސިކް މެރިކަލްޗަރ ކޯހުގެ ދެވަނަ ބެޗް ނިންމުމުގެ ރަސްމިއްޔާތު ޝަރަފުވެރިކޮށްދެއްވާ ވާހަކަފުޅުދައްކަވަމުން މަސްވެރިކަމާ ކަނޑުގެ ވަޞީލަތްތަކާ ބެހޭ ވަޒީރު، އަޙްމަދު ޝިޔާމެވެ. ވަޒީރު ވިދާޅުވީ މިހާރު ކުރަމުންދަނީ އެސަރަހައްދުތަކުގައި މެރިކަލްޗަރގެ މަސައްކަތް ކުރަން ބޭނުންވާ ގަވާއިދުތައް އެކުލަވާލުމުގެ މަސައްކަތްކަމަށެވެ.

މަސްވެރިކަމާއި ކަނޑުގެ ވަޞީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވީ، މެރިކަލްޗަރ ސިނާޢަތް ވަކި ސިނާޢަތެއްގެ ގޮތުގައި ތަރައްޤީކުރެވޭނެކަމުގެ ޔަގީންކަން އެބައޮތްކަމަށެވެ. އެގޮތުން ރާއްޖޭގައި މެރިކަލްޗަރ ތަރައްޤީކުރުމަށް 4 ސަރަޙައްދެއް ވަޒީރުންގެ މަޖިލީހުން ކަނޑައަޅުއްވާފައިވާކަމަށެވެ.

އެ 4 ސަރަހައްދަކީ ބޮޑު ތިލަދުންމައްޗާއި، ރ.އަތޮޅާއި މ.އަތޮޅުގެ އިތުރުން ތ. އަތޮޅެވެ. މީގެއިތުރުން މަނިޔަފުއްޓާއި ގާތްގަނޑަކަށް 2 ކިލޯމީޓަރު ދުރުގައި އޮތް ފަޅެއްވެސް މިކަމަށްވަނީ ކަނޑައަޅާފައެވެ. މިކަމަށް ހުޅުވާލުމަށް ތައްޔާރުވަމުންދާއިރު މިހާރު ކުރިއަށްދަނީ މިކަމަށް ބޭނުންވާ އުސޫލުތަކާއި ގަވާއިދުތައް އެކުލަވާލުމުގެ މަސައްކަތެވެ.

ސަރުކާރުގެ ހަފުތާ 14 ގެ ހަރަކާތްތަކުގެ ތެރެއިން އިފްތިތާހު ކުރި މެރިން ހެޗަރީ ސްކިލްސް ޑިވެލޮޕްމަންޓް ޕްރޮގްރާމުގެ ދަށުން ހިންގުނު ދެވަނަ ބޭސިކް މެރިކަލްޗަރ ކޯސް ނިންމުމުގެ ރަސްމިއްޔާތު ވަޒީރު އަޙްމަދު ޝިޔާމް ޝަރަފްވެރިކޮށްދެއްވުން.

ކޯސް ފުރިހަމަކުރި 14 ފަރާތާއެކު މެރިން ހެޗަރީ… pic.twitter.com/ARt6XSAYdU

— Ministry of Fisheries and Ocean Resources (@MFORmv) November 9, 2024

"މިއީ ރާއްޖޭގައި ކުރެވޭނެ ކަމެއްކަން އިންވެސްޓަރުންނަށާއި ދިވެހިންގެ ތެރެއިން މިކަން ކުރަން ޝައުގުވެރިވާ ފަރާތްތަކަށް ދައްކަން އަޅުގަނޑުމެންނަށް ޖެހޭނީ. އެކަން ކުރެވުމުން ހަމަ ޔަގީން މިއީ އާމްދަނީ ލިބޭ ވަރުގަދަ ސިނާޢަތަކަށް ވެގެންދާނެކަން." ވަޒީރު ވިދާޅުވިއެވެ.

މިމަސައްކަތްކުރާ އެހެން ޤައުމުތަކާ ބަލާއިރު މިކަން ކުރުމަށް ބޮޑެތި ލުއިތަކެއް ދިނުމަށް ސަރުކާރުންވަނީ ނިންމަވާފައެވެ. އެގޮތުން މިމަސައްކަތް ކުރުމަށް ރަސްމީކޮށް ކަނޑައަޅާފައިވާ 4 ސަރަޙައްދުން ނަގާ ބިމަށް ލޭންޑް އެކުއިޒިޝަނަށް ފައިސާ ނުނަގާގޮތަށާއި، ފުރަތަމަ 3 އަހަރުގެ ބިމު ކުލި ނުނެގުމަށްވަނީ ނިންމަވާފައެވެ. ހަމައެއާއެކު މިމަސައްކަތަށް ބޭނުންވާ ވަޞީލަތް ރާއްޖެ އެތެރެކުރުމަށް ޑިއުޓީ މާފުކުރުމަށްވެސް ސަރުކާރުންވަނީ ހަމަޖައްސަވާފައެވެ.

ވޯލްޑް ބޭންކްގެ މާލީ އެހީތެރިކަމާއެކު، މޯލްޑިވްސް މެރިން ރިސަރޗް ސެންޓަރުން ކުރިއަށްގެންދިޔަ ބޭސިކް މެރިކަލްޗަރ ކޯހުގެ ދެވަނަ ބެޗްގައި ޖުމްލަ 16 ފަރާތަކުންވަނީ ބައިވެރިވެފައެވެ. މިޕްރޮގްރާމްގެ މަޤުސަދަކީ ރާއްޖޭގައި ރިކަލްޗަރ ސިނާޢަތުގައި މަސައްކަތްކުރާނެ ދިވެހިން ތަމްރީނުކުރުމެވެ. އެގޮތުން އެކުއަކަލްޗަރގެ ނިޒާމުތަކާއި ދިރޭ ކާނާ އާލާކުރުމާއި ފާނައާއި، ހުއިފިލަނޑާއި، ދިވެހި މާކަނޑުމަސް އަދި އިތާމުތް އާލާކުރުމާއި، އާލާކުރާ ބާވަތްތަކަށް ޖެހޭ ބަލިތައް ދެނެގަނެ ބަލިތަކުން ރައްކާތެރިކުރުމާއި، މެރިކަލްޗަރ އާލާކުރުމުގައި ތިމާވެއްޓަށް ގެއްލުން ކުޑަވާގޮތަށް އެމަސައްކަތްކުރުމާއި ގުޅޭގޮތުންވަނީ މަޢުލޫމާތު ދީފައެވެ. މެރިކަލްޗަރ ކޯހުގެ ދަށުން މިހާތަނަށް 26 ފަރާތެއްވަނީ ތަމްރީންކޮށްފައެވެ.