ޕާކިސްތާނުގެ ރޭލު ސްޓޭޝަނެއްގައި ބޮމެއް ގޮއްވައިލައިގެން 24 މީހުން މަރައިލައިފިއެވެ. އެ ޤައުމުގެ ހުޅަނގުދެކުނު ބަލޫޗިސްތާން ޕުރޮވިންސުގެ ކުއޭޓާގެ ރޭލު ސްޓޭޝަނަކަށް އަމާޒުކޮށް ދިން ޙަމަލާގައި އިތުރު 33 މީހުން ޒަޚަމުވިއެވެ. ޕަލޫޗިސްތާނުގެ އިތުރުން އެ ޤައުމުގެ ހުޅަނގުއުތުރުގެ ސަރަޙައްދުތަކުގައި ހަރަކާތްތެރިވާ ހަތިޔާރު އެޅި ޖަމާޢަތްތަކުން ދޭ މި ފަދަ ޙަމަލާތައް ފަހަކަށް އައިސް އިތުރުވެފައިވާއިރު, ނިރުބަވެރި ޖަމާޢަތްތަކުގެ ޙަމަލާތައް ހުއްޓުވުމަށް އެ ޤައުމުގެ ފުލުހުންނާއި ސިފައިން ދަނީ އޮޮޕަރޭޝަނެއް ހިންގަމުންނެވެ.
ބަލޫޗިސްތާނުގެ ފުލުހުންގެ އިންސްޕެކްޓަރ ޖެނެރަލް މުޢައްޒަމް ޖާ އަލް-އަންޞާރީ ވިދާޅުވީ, ރޭލު ސްޓޭޝަންގައި ބޮމެއް ގޮއްވައިލައިގެން 24 މީހުން މަރައިލާފައި ވަނީ ކާރޫބާރު ބޮޑު ވަގުތެއްގައި ކަމުގައެވެ. "ޙަމަލާ އަމާޒު ކޮށްފައި ވަނީ އެ ވަގުތު އެ ތަނުގައި ތިބި [އަސްކަރިއްޔާގެ] އިންފެންޓްރީ ސްކޫލްގައި ތަމްރީނު ފުރިހަމަ ކުރަމުންދާ ސިފައިންނަށް،" އޭނާ ވިދާޅުވިއެވެ.
ބަލޫޗިސްތާނުގައި ހަރަކާތްތެރިވާ ހަތިޔާރު އެޅި ޖަމާޢަތެއް ކަމުގައިވާ ބަލޯޖް ލިބެރޭޝަން އާމީ (ބީއެލްއޭ)ން ވަނީ ކުއޭޓާގައި ދިން ޙަމަލާގެ ޒިންމާ އުފުލާ ކަމަށް ބުނެފައެވެ. ބީއެލްއޭއަކީ, ބަލޫޗިސްތާނުގައި ވަކި ސަރުކާރެއް ޤާއިމު ކުރުމަށް ހަަނގުރާމަ ކުރަމުންދާ ހަތިޔާރު އެޅި ޖަމާޢަތެކެވެ. ބަލޫޗިސްތާނަކީ އަފްޣާނިސްތާނުގެ ދެކުނުން އަދި އީރާނުގެ އިރުން އޮތް, 15 މިލިޔަން މީހުންގެ އާބާދީއެއް ދިރިއުޅޭ ސަރަޙައްދެކެވެ. އެއީ, މައުދަނުގެ ގޮތުން މުއްސަނދިކަން ލިބިފައިވާ ސަރަޙައްދަކަށްވާއިރު, ޕާކިސްތާނުގެ ސަރުކާރުން ގޭހާއި މިނަރަލް ފަދަ މައުދަން މައިން ކުރުމަށް ހިންގަމުންދާ މަޝްރޫޢުތަކާ ބީއެލްއޭ ފަދަ ހަތިޔާރު އެޅި ޖަމާޢަތްތަކުން ދެކޮޅެވެ.
"ޙަމަލާގައި ޒަޚަމުވެފައިވާ 44 މީހަކަށް ފަރުވާ ދިނުމަށް ހޮސްޕިޓަލަށް ގެނެސްފައިވޭ،" އެ ސަރަޙައްދުގައި ހުންނަ ހަސްފަތާލެއްގައި މަސައްކަތް ކުރައްވާ ޑރ ވަސީމް ބާއިޖް ވިދާޅުވިއެވެ. ފުލުހުންގެ އިސް އޮފިސަރެއް ކަމުގައިވާ މުޙައްމަދު ބަލޯޖް ވިދާޅުވީ, މިއީ މީހަކު އަމިއްލައަށް ފުރާނަ ނަގައިލައިގެން ދީފައިވާ ޙަމަލާއެއް ކަމަށް ބެލެވޭ ކަމުގައެވެ. އަދި, އެ ކަން ތަޙުޤީޤު ކުރަމުންދާ ކަމުގައެވެ. "ބޮން ގޮއްވައިލާފައި ވަނީ ޕޭޝާވަރަށް ދަތުރު ކުރުމަށް ތައްޔާރަށް އޮތް ރޭލު ފުރުމުގެ ކުޑަ ވަގުތު ކޮޅެއް ކުރިން،" އޭނާ ވިދާޅުވިއެވެ.
އޮގަސްޓު މަހު ވެސް ބަލޫޗިސްތާނުގައި މި ފަދަ ނުރައްކާތެރި ނިރުބަވެރި ޙަމަލާތަކެއް ދީފައިވެއެވެ. އެ ޕުރޮވިންސުގެ ފުލުހުންގެ މަރުކަޒުތަކާއި ރޭލު ސްޓޭޝަންތަކަށް އަމާޒުކޮށް ދިން ޙަމަލާތަކުގައި 73 މަރުވެ, ގިނަ އަދަދެއްގެ ބަޔަކު ޒަޚަމުވިއެވެ. އެއީ, ފާއިތުވި އަހަރުތަކުގެ ތެރޭގައި ބަލޫޗިސްތާނުގައި ހަރަކާތްތެރިވާ ހަތިޔާރު އެޅި ޖަމާޢަތްތަކުން ދީފައިވާ އެންމެ ނުރައްކާތެރި ޙަމަލާތަކެވެ. ޕާކިސްތާނާއި ޗައިނާ ސަރުކާރުން ގުޅިގެން އެ ސަރަޙައްދުގައި ހިންގަމުންދާ ޢުމްރާނީ ތަރައްޤީގެ މަޝްރޫޢުތަކުން, އެ ސަރަޙައްދުގައި ދިރިއުޅޭ ރައްޔިތުންނަށް ނަފާ ނުލިބޭ ކަމަށް އެ ސަރަޙައްދުގައި ހަރަކާތްތެރިވާ ހަތިޔާރު އެޅި ޖަމާޢަތްތަކުން ޤަބޫލު ކުރެއެވެ.