އޮޕަރޭޝަން ކުރަނގި ފުވައްމުލައް ސިޓީއަށް، ކައުންސިލުން އެދެނީ ރައްޔިތުންގެ އެއްބާރުލުން

ބިދޭސީންގެ މަޢުލޫމާތު އެއްކުރުމަށް ކުރިއަށްގެންދާ "އޮޕަރޭޝަން ކުރަނގި" ފުވައްމުލައް ސިޓީގައި ފެށުމަށް ތައްޔާރުވެއްޖެއެވެ.

ގަވާއިދާ ޚިލާފަށް އުޅޭ ބިދޭސީންގެ މައްސަލަތައް ޙައްލުކުރުމަށް ސަރުކާރުގެ ކަމާބެހޭ ހުރިހާ އިދާރާއެއް ގުޅިގެންދަނީ މަސައްކަތްކުރަމުންނެވެ. އެގޮތުން ދާޚިލީ ސަލާމަތާއި ފަންނިއްޔަތާ ބެހޭ ވުޒާރާއިން ރަށްރަށުގެ ކައުންސިލްތަކާއި ގުޅިގެން ކުރިއަށްގެންދާ "އޮޕަރޭޝަން ކުރަނގި" ފުވައްމުލައް ސިޓީގައި ކުރިއަށްގެންދަން ނިންމާފައިވަނީ މިމަހުގެ 5 އިން 20 އަށެވެ.

ފުވައްމުލައް ސިޓީ ކައުންސިލުން ވިދާޅުވީ، އެ ސިޓީގައި މަސައްކަތް ކުރަމުންދާ ބިދޭސީ މަސައްކަތްތެރިންގެ މަޢުލޫމާތު އަދާހަމަކުރުމުގެ ގޮތުން އެ ސިޓީގައި ދިރިއުޅޭ ހުރިހާ ބިދޭސީ މަސައްކަތްތެރިންގެ ބަޔޯމެޓްރިކްސް ނެގުމުގެ މަސައްކަތް އެ މުއްދަތުގައި ކުރައަށްދާނެ ކަމަށެވެ.

ބިދޭސީ މަސައްކަތްތެރިން، ގެންގުޅުއްވާ ފަރާތްތަކުން މިކަމުގައި ސަރުކާރަށާއި ކައުންސިލަށް ފުރިހަމަ އެއްބާރުލުން ދިނުމަށްވެސް ކައުންސިލުންވަނީ އިލްތިމާސްކޮށްފައެވެ.

ޖޫން މަހުގެ 3 ވަނަ ދުވަހު ފެށި އޮޕަރޭޝަން ކުރަނގީގައި މިހާތަނަށް 8385 ބިދޭސީއެއްގެ ބަޔޯމެޓްރިކް ޑޭޓާ އެއްކޮށްފައިވާކަމަށާއި، މިހާތަނަށް 96 ރަށެއްގައި މި މަސައްކަތް ފަށައި 21 ރަށެއްގައި އެމަސައްކަތް ނިންމާފައިވާކަމަށް ދާޚިލީ ސަލާމަތާއި ފަންނިއްޔަތާ ބެހޭ ވުޒާރާއިން ވިދާޅުވެއެވެ.

އޮޕަރޭޝަން ކުރަނގީގެ މައިގަނޑު މަޤްޞަދަކީ ދިވެހިރާއްޖޭގައި ގަވާއިދާ ޚިލާފަށް ދިރިއުޅެމުންދާ ބިދޭސީ މަސައްކަތްތެރިންގެ މައްސަލައަށް ދާއިމީ ހައްލެއް ހޯދުމެވެ. އެގޮތުން ރާއްޖޭގައި ވަޒީފާ އަދާކުރާ ބިދޭސީންގެ އިނގިލީގެ ނިޝާން ނެގުމާއި އެ ބިދޭސީ މީހާ ވަޒީފާ އަދާކުރަނީ ރާއްޖޭގައި ހެދިފައިހުރި ގާނޫނާއި ގަވާއިދުގެ ދަށުންތޯ މި އޮޕަރޭޝަނުގެ ތެރެއިން ޔަގީންކުރާނެއެވެ.

މި އޮޕަރޭޝަނަށް ބޭނުންވާ މަޢުލޫމާތު އެއްކުރަނީ ކައުންސިލް އިދާރާތަކުގައި ބިދޭސީންގެ ބަޔޯ މެޓްރިކްސް ނެގުމުގެ އިންތިޒާމު ޤާއިމްކުރުމަށްފަހުއެވެ. އެ މައުލޫމާތުގެ އަލީގައި ބިދޭސީންގެ މައި ދަފްތަރެއް އެކުލަވާލާނެކަމަށް ދާޚިލީ ސަލާމާތައި ފަންނިއްޔާތާ ބެހޭ ވުޒާރާއިން ވިދާޅުވެއެވެ.