ނަޞްރުގެ ދުވަހުގެ މަޢުރަޒު ރައީސުލްޖުމްހޫރިއްޔާ ހުޅުއްވައިދެއްވައިފި

3 ނޮވެންބަރު 1988 ގެ ހަމަލާއާ ގުޅޭ ތަކެތި ދައްކުވައިދޭ މަޢުރަޒު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުޅުއްވައި ދެއްވައިފއެވެ.

ނަޞްރުގެ ދުވަހުގެ މަޢުރަޒު ހުޅުއްވައި ދެއްވުމަށްފަހު، ރައީސުލްޖުމްހޫރިއްޔާގެ ދެކަނބަލުން ވަނީ މިމަޢުރަޒު ބައްލަވާލައްވާފައެވެ. މިމަޢުރަޒުގައި ފެންނަން ހުރި ތަކެއްޗާއި އެދުވަހުގެ ވާހަކަތައް ދިވެހި ސިފައިން އިސްބޭކަލުން އެމަނިކުފާނާ ހިއްސާކޮށްދެއްވިއެވެ.

ނޭޝަނަލް އާޓް ގެލަރީގައި ހުޅުވި މިމަޢުރަޒުގައި އެދުވަހުގެ ހަމަލާއާ ގުޅޭ ހުރިހާ މައުލޫމާތެއް ލިބޭނެ އިންތިޒާމު ވަނީ ހަމަޖައްސާފައެވެ.

މިމަޢުރަޒަކީ ޒުވާނުން ބާރުވެރިކުރުވުމާއި، މައުލޫމާތާއި ފަންނާ ބެހޭ ވުޒާރާއާއި ޤައުމީ ދިފާޢީ ބާރު ގުޅިގެން ބާއްވާ މިފަދަ ފުރަތަމަ މަޢުރަޒެވެ. އެގޮތުން މިމަޢުރަޒުގައި ޒަމާނީ ވަސީލަތްތައް ބޭނުންކޮށްގެން އެދުވަހުގެ ޢުދުވާނީ ހަމަލާ ހިނގިގޮތާއި އެދުވަހާއި ގުޅޭ ހުރިހާ މައުލޫމާތެއް ލިބޭނެ އިންތިޒާމްވަނީ ހަމަޖައްސާފައެވެ.

މިމަޢުރަޒުގައި ކުރެހުމާއި ފޮޓޯއާއި އަޑާއި، މަންޒަރުގެ އިތުރުން އެ ދުވަހާއި ގުޅޭ ތަކެއްޗާއި އެދުވަހު ބޭނުން ކުރި ބައެއް އާލާތްތައް ދައްކާލަން ބަހައްޓާފައިވެއެވެ. އެގޮތުން ޝަހީދު ހުސެއިން އާދަމް އެދުވަހު ގެންގުޅުއްވި ބަޑި ފުރަތަމަ ފަހަރަށް އާންމުންނަށް ދައްކާލާ ފޮޓޯ ނެގުމުގެ ފުރުސަތު ދޭނެއެވެ. އަދި މީގެ އިތުރުން ދިވެހި ސިފައިން ހަމަލާތަކުން ދިފާޢުވުމަށް ބޭނުން ކުރި ހަތިޔާރުތަކާއި، ދުޝްމިނުން ބޭނުންކުރި ހަތިޔާރުތައްވެސް މިމަޢުރަޒުގައި ބަހައްޓާފައިވެއެވެ.

މިމަޢުރަޒު ތައްޔާރުކޮށްފައިވަނީ 9 ސެގްމެންޓަކަށް ބަހާލައިގެންނެވެ. މިއިން ކޮންމެ ސެގްމެންޓެއްގައި ސެންޓަރ ޕީސްތަކެއްގެ ގޮތުގައި ތަކެތި ބަހައްޓާފައިވާއިރު، އެދުވަހުގެ ކަން ހިންގާދިޔަ ގޮތް ތަރުތީބުން ކިޔައިދީ ދައްކުވައިދޭނެއެވެ. މިމަޢުރަޒް ތައްޔާރުކޮށްފައިވަނީ ހަމަލާ ދޭން ފެށި ހިސާބުން ފެށިގެން ނަޞްރު ލިބުނުކަން އޭރުގެ ރައީސް މައުމޫން އިޢުލާން ކުރެއްވުމާ ހަމައަށް ކިޔައިދޭގޮތަށެވެ.

ޤައުމީ ދިފާޢީ ބާރުން ވިދާޅުވީ މިގޮތަށް މި މަޢުރަޒު ބޭއްވުމުން ޤައުމު ދެކެ ލޯބިވާ ޤައުމީ ޒުވާން ޖީލެއް ބިނާކުރުމަށް، މަގުފަހިވެ ޒުވާނުންނަށް އެދުވަހުގެ ހަމަލާއާއި ގުޅޭ އެންމެ ފުރިހަމަ މައުލޫމާތު ލިބި ދިވެހިން ނަޞްރު ހޯދުމަށް ކުރި މަސައްކަތް ކިޔައިދެވޭނެ ކަމަށެވެ.

9 ވަނަ ދުވަހާއި ހަމައަށް އޮންނަ މިމަޢުރަޒު ކޮންމެ ދުވަހަކު ހެނދުނު 9 އަކުން 12 އަށް، މެންދުރު ފަހު 2:00 އިން 6:00އަށް އަދި ރޭގަނޑު 8:00 އިން 10:00 އަށް ހުޅުވިފައި ހުންނާނެއެވެ.

ނަސްރުގެ ދުވަހާއި ގުޅުވައިގެން 1992 ވަނަ އަހަރުން ފެށިގެން ދިވެހި ސިފައިން ދަނީ ފޮޓޯ މަޢުރަޒުތައް މެދުކެނޑުމެއް ނެތި ބާއްވަމުންނެވެ.