ކޮމިޝަންތަކުގެ ވެރިން ރައީސުލްޖުމްހޫރިއްޔާ ކަނޑައެޅުއްވުމަކީ އެކޮމިޝަންތަކުން އެދޭގޮތް!
-
މިކަމާއި ގުޅޭ ކަރުދާހެއް 2023 ވަނަ އަހަރު ރައީސް އޮފީހަށް ހުށަހަޅާފައިވޭ
-
ރާއްޖޭގެ ބޮޑެތި ހުރިހާ މުޢައްސާސާއަކަށް ވެރިން އައްޔަން ކުރެވެނީ ރައީސުލްޖުމްހޫރިއްޔާ ފޮނުވާ ނަންތަކުގެ ތެރެއިން
މިނިވަން މުއައްސަސާތަކުގެ ރައީސުންނާއި ނައިބު ރައީސުން ރައީސުލްޖުމްހޫރިއްޔާ އައްޔަން ކުރާ ބައެއްގެ ގޮތުގައި ހަމަޖެއްސުމަކީ އެ މުއައްސަސާތަކުން އެންމެ ބޭނުންވާގޮތްކަން ހާމަވެއްޖެއެވެ.
އޭސީސީއާއި އިލެކްޝަންސް ކޮމިޝަނުގެ ރައީސައި ނައިބު ރައީސް ރައީސުލްޖުމްހޫރިއްޔާ އައްޔަންކުރައްވާ ބައެއްގެ ގޮތުގައި ކަނޑައެޅުމަށް ޤާނޫނަށް ވަނީ އިޞްލާޙު ހުށައަޅުއްވާފައެވެ. މިއާއެކު އިދިކޮޅު ފަރާތްތަކުން ވަނީ އެކަމަށް ފާޑުކިޔާފައެވެ. ނަމަވެސް ސަރުކާރުން އެ އިޞްލާހު ޤާނޫނަށް ހުށައަޅާފައިވަނީ މުއައްސަސާތަކުގެ ރައީސާއި ނައިބު ރައީސް އައްޔަންކުރާގޮތް އެއްގޮތް ކުރުމަށްކަމަށެވެ. އެހެނީ އެޗްއާރުސީއެމާއި ސިވިލް ސަރވިސް ކޮމިޝަނަށް ރައީސާއި ނައިބު ރައީސް އައްޔަންކުރަމުން މިހާތަނަށް އައިސްފައިވަނީ ރައީސުލްޖުމްހޫރިއްޔާކަމަށްވެފައި އިލެކްޝަންސް ކޮމިޝަނާއި، އޭސީސީއަށް ރައީސާއި ނައިބު ރައީސް ކަނޑައަޅަމުން އައިސްފައިވަނީ އެތަންތަނުގެ މެންބަރުންގެ މެދުގައި ނަގާ ސިއްރު ވޯޓަކުން ކަމަށްވާތީއެވެ.
މިކަމާއި ގުޅިގެން އިލެކްޝަން ކޮމިޝަންގެ ކުރީގެ ނައިބް ރައީސް އަދި ހިއުމަން ރައިޓްސް ކޮމިޝަންގެ މިހާރުގެ މެންބަރު އިސްމާޢިލް ހަބީބް ވިދާޅުވީ، ޤާނޫނަށް ގެންނަން ހުށައަޅާފައިވާ ބަދަލަކީ މިނިވަން މުއައްސަސާތަކުގެ މެންބަރުން އެދޭ ފަދަ ބަދަލެއް ކަމަށެވެ.
އިލެކްޝަންސް ކޮމިޝަންސް، އީސީއާއި އޭސީސީގެ ރައީސާއި ނާއިބު ރައީސް، ރައީސުލްޖުމްހޫރިއްޔާ ޢައްޔަނު ކުރައްވާގޮތަށް މިހާރު މަޖިލީހަށް ހުށަހަޅުއްވާފައިވާ އިސްލާޙަކީ މިނިވަން މުއައްސަސާތަކުން 2023 ގައި ރައީސުލްޖުމްހޫރިއްޔާގެ އަރިހަށާއި، ބަންޑަރަ ނައިބުގެ އޮފީހުގެ އިތުރުން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީއަށް، އޭސީސީ، އީސީ، އެޗްއާރުސީއެމް އަދި ސިވިލް ސަރވިސް ކޮމިޝަން، ސީއެސްސީގެ މެންބަރުން ހުށަހެޅި ކަރުދާހުގައި ހިމަނާފައިވާކަމެއްކަންވެސް ހަބީބު ފާހަގަކުރެއްވިއެވެ. އަދި އެއީ ދުނިޔޭގެ ކުރިއަރާފައިވާ އެމެރިކާފަދަ ޤައުމުތަކުންވެސް އެކަން ކުރަމުން އަންނަގޮތްކަމަށްވެސް ހަބީބު ވިދާޅުވިއެވެ.
މި ކަރުދާހުގައި މައިގަނޑު ގޮތެއްގައި، ހިމެނެނީ ކޮމިޝަންތަކުން ބޭނުންވާ ކަންކަމެވެ. އެގޮތުން މާލީ މިނިވަންކަން ހޯދައި ދިނުމާއި، މިންތީގެ ހަމަހަމަކަން ގެނައުމާއި، ކޮމިޝަންތަކުގެ މެންބަރުން މަޖިލީހުގެ ސިންގަލް މެޖޯރިޓީއަކުން ވަކިވާ ގޮތަށް އޮތުން މިކަރުދާހުގައި ފާހަގަކޮށްފައިވެއެވެ. މީގެ އިތުރުން ސިވިލް ސާރވިސް ކޮމިޝަން އަދި ހިއުމަން ރައިޓްސް ކޮމިޝަންގެ ރައީސް އަދި ނައިބު ރައީސް އައްޔަންކުރަން ރައީސުލްޖުމްހޫރިއްޔާއަށް ބާރު އޮންނައިރު، އޭސީސީ އާއި އިލެކްޝަން ކޮމިޝަނުގައި މިކަން އޮންނަނީ މެންބަރުންގެ މެދުގައި ނެގޭ ވޯޓަކުން ކުރުމަށެވެ. އެހެން ކަމުން ޤާނޫނުއަސާސީގެ ތެރެއިން އުފައްދާފައިވާ 4 ކޮމިޝަނުގައި އެއް އުސޫލެއްގެ ތެރެއިން މިކަން ކުރުމަށް ކަރުދާހުގައި ހިމަނާފައިވެއެވެ.
ޤާނޫނަށް ގެންނަ އިޞްލާހަށް މަޖިލީހުގައިމިހާރު ބަހުސް ފަށާފައިވާއިރު، ސަރުކާރަށް ނިސްބަތްވާ މެންބަރުން ވަނީ ޤާނޫނަށް ގެނެވޭ މި ބަދަލުގެ ސަބަބުން މިހާރު ކަން ހިނގަމުންދާ ގޮތަށް ބަދަލެއް ނާންނަކަން ފާހަގަކޮށްފައެވެ. އެގޮތުން މިހާރުވެސް ކޮމިޝަންތަކަށް އައްޔަންކުރާ މެންބަރުންނަކީ ރައީސުލްޖުމްހޫރިއްޔާ ހުށަހަޅާ ނަންތަކަށްވުމުން، މިހާރުވެސް ނުސީދާކޮށް އޭސީސީ އަދި އިލެކްޝަންސް ކޮމިޝަންގެ ރައީސް އައްޔަން ކުރައްވަނީ ރައީސުލްޖުމްހޫރިއްޔާކަން މެންބަރުން ފާހަގަކުރެއްވިއެވެ.
މީގެ އިތުރުން މި ބަދަލާއެކު މުއައްސާސާތަކުގެ މަސައްކަތް އިތުރަށް ހަރުދަނާވާނެކަން ބަހުސްގެ ތެރެއިން މެންބަރުން ވަނީ ފާހަގަކުރައްވާފައެވެ. މީގެ އިތުރުން މި މުއައްސާސަތަކުގެ ރައީސުން ކަނޑައެޅުމަށް ރައީސުލްޖުމްހޫރިއްޔާ ފުރިހަމަ އިޙްތިޔާރު ނުލިބޭ ކަމަށާއި، މަޖިލީހުން ނަންތައް ފާސްކުރަންޖެހޭ ކަމަށް މެންބަރުން ފާހަގަކުރެއްވިއެވެ.
ދިވެހިރާއްޖޭގެ ޤާނޫނީ ނިޒާމު ކަނޑައެޅިފައިވާ ގޮތުން، ގިނަ މުއައްސަސާތަކަށް އައްޔަން ކުރެވެނީ ރައީސުލްޖުމްހޫރިއްޔާ ހުށަހަޅުއްވާ ނަންތަކެވެ. އެގޮތުން ސުޕްރީމް ކޯޓު ހިމެނޭހެން ހުރިހާ ސުޕީރިއަރ ކޯޓަކަށް ފަނޑިޔާރުން އައްޔަން ކުރަނީ ރައީސުލްޖުމްހޫރިއްޔާ ހުށަހަޅުއްވާ ފަރާތްތަކެވެ. މީގެ އިތުރުން އެމްއެމްއޭ ފަދަ މުއައްސަސާތަކާއި އަދި ޤާނޫނުގެ ދަށުން ހެދިފައިވާ އެހެނިހެން މުއައްސަސާތަކުގެ ވެރިންނަކީވެސް ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވަވާ ނަންތަކެވެ. އެހެންކަމުން މުޅި ނިޒާމުގައިވެސް މައިގަނޑު ގޮތެއްގައި ޢަމަލުކުރާ އުސޫލަކީ މިއެވެ.