އަރތު ލީކް ސަރކެޓް ބްރޭކަރ ހަރުކޮށްފައިވާ މިންވަރު ބަލަން ފެނަކައިން ސާވޭއެއް ކުރަނީ
-
މިސަރވޭ ކުރިއަށްގެންދާނީ މިމަހުގެ ރީޑިންގ ނެގުމަށްދާ ޓީމުތަކުން
-
މިމަސައްކަތް ޢާއްމު ގޭބިސީތަކާއި އޮފީސްތަކާއި ޢާއްމު ސަރަހައްދުތަކުގައިވެސް ކުރިއަށްގެންދާނެ
ފެނަކައިން ކަރަންޓުގެ ޚިދުމަތްދޭ ތަންތަނުގައި އަރތު ލީކް ސަރކެޓް ބްރޭކަރ ހަރުކޮށްފައި ހުރިކަން ކަށަވަރުކުރުމަށް މިމަހު ސަރވޭއެއް ކުރިއަށްގެންދިޔުމަށް ހަމަޖެހިފައިވާކަމަށް ފެނަކަ ކޯޕަރޭޝަނުން ވިދާޅުވެއްޖެއެވެ.
ފެނަކައިން ވިދާޅުވީ އަރތު ލީކް ސަރކެޓް ބްރޭކަރ ހަރުކުރުމަކީ ޔޫޓިލިޓީ ރެގިއުލޭޓަރީ އޮތޯރިޓީގެ ޤަވާއިދުތަކުގައި، ސަލާމަތީ މިންގަނޑުގައި އަސާސީގޮތުން ފުރިހަމަވާންޖެހޭ ކަމެއްކަމަށެވެ. އެހެންކަމުން އީއެލްސީބީ ބަރުކޮށްފައި ހުރިކަން ޔަޤީންކުރުމަށް މިމަހުގެ މީޓަރު ރީޑިންގ ނެގުމަށް ފެނަކައިގެ ފަންނީ މުވައްޒަފުންދާއިރު ބަލާނެކަމަށް ފެނަކައިން ވިދާޅުވެއެވެ.
ކަރަންޓުގެ ޚިދުމަތް ދޭ ހުރިހާ ތަނެއްގައި އީ.އެލް.ސީ.ބީ ހަރުކޮށްފައި ހުރިކަން ކަށަވަރު ކުރުމާއި ގުޅޭ:https://t.co/bREvsz6IaG
— Fenaka Corporation Ltd (@TeamFenaka) October 29, 2024
ފެނަކައިން ވިދާޅުވީ، އެކަން ޔަގީންކުރުމަށް ޢާއްމު މީހުން ދިރިއުޅޭ ގޭބިސީތަކާއި އޮފީސްތަކާއި ވިޔަފާރިކުރާ ތަންތަނުގެ އިތުރުން ޢައްމު ސަރަޙައްދުތަކުގައިވެސް ފެނަކައިގެން މުވައްޒަފުން ޙަރަކާތްތެރިވާނެކަމަށް އެކޯޕަރޭޝަނުން ވިދާޅުވެއެވެ. އެހެންކަމުން މިކަމުގައި ޢާއްމުންގެ އެހީތެރިކަމާއި އެއްބާރުލުން ދެއްވުމަށް ފެނަކައިން އެދެއެވެ.
ފެނަކަ ކޯޕަރޭޝަނުން ރަންޓުގެ ޚިދުމަތް ފޯރުކޮށްދޭ ރަށްރަށުގެ މަގު ބައްތި ތަކުގެ ސަލާމަތީ ކަންތައްތައް ހުރިގޮތް ބެލުމަށްވެސް އެކޯޕަރޭޝަނުންވަނީ ޚިދުމަތްދޭ ހުރިހާ ރަށެއްގައި ހުރި މަގުބައްތިތައްވެސް އިންސްޕެކްޓްކޮށްފައެވެ. އަދި ކޯޕަރޭޝަނުން ވަނީ ގިނަ ރަށްތަކުގައި އީއެލްސީބީ މެދުވެރިނުކޮށް މަގުބައްތިތަކަށް ކަރަންޓް ދީފައިވާކަން ފާހަގަކޮށް އެކަން ރަނގަޅުކުރުމަށް މުއްދަތެއްދީ، އީއެލްސީބީ ހަރުނުކުރާ މަގު ބައްތިތަކަށް ކަރަންޓު ދިނުން ހުއްޓާލަނެކަން އަންގާފައެވެ.
ފެނަކައިން 154 ރަށެއްގައި ކަރަންޓުގެ ޚިދުމަތް ފޯރުކޮށްދެއެވެ.