ސަޢުދި ޢަރަބިއްޔާގައި ހުންނަވާ ސަފީރަކަށް ސަރީރު އައްޔަންކުރަން ފާސްކޮށްފި

ދިވެހިރާއްޖެއިން ސަޢުދިޢަރަބިއްޔާއަށް ކަނޑައަޅުއްވާ ސަފީރުގެ މަގާމަށް އަޙްމަދު ސަރީރު އައްޔަން ކުރެއްވުމަށް ރައްޔިތުންގެ މަޖިލީހުން ފާސްކުރައްވައިފިއެވެ. ސަޢުދިޢަރަބިއްޔާއަށް ކަނޑައަޅުއްވާ ސަފީރަކަށް ސަރީރު ހަމަޖެއްސުވުމަށް ފާސްވީ ވޯޓުގައި ބައިވެރިވެވަޑައިގެންނެވި 86 މެންބަރުންގެ ވޯޓުންނެވެ.

ދިވެހިރާއްޖެއިން ސަޢުދިއަރަބިއްޔާއަށް ކަނޑައަޅުއްވާފައި ހުންނަވާ ސަފީރުގެ މަގާމަށް އަޙްމަދު ސަރީރު އައްޔަން ކުރެއްވުމަށް ރައްޔިތުންގެ މަޖިލީހަށް ރައީސުލްޖުމްހޫރިއްޔާ ނަން ފޮނުއްވާފައިވަނީ މިމަހުގެ 15 ވަނަ ދުވަހުއެވެ. އަދި ސަރީރުގެ ނަންފުޅު ދިރާސާކުރެއްވި ޚާރިޖީ ގުޅުންތަކުގެ ކޮމިޓީންވެސް ވަނީ ސަރީރަކީ އެ މަޤާމަށް ޤާބިލު ބޭފުޅެއްގެ ގޮތުގައި ފާހަގަކުރައްވާފައެވެ.

އަހުމަދު ސަރީރު މިހާރު ހުންނެވީ ދިވެހި ޚާރިޖިއްޔާގެ އެމްބެސެޑަރ އެޓް ލާޖުގެ މަޤާމުގައެވެ.

އަޙްމަދު ސަރީރު ގެންދަވަނީ 1986 ވަނަ އަހަރުން ފެށިގެން ޚާރިޖީ ދާއިރާގައި މަސައްކަތްކުރައްވަމުންނެވެ. އެގޮތުން ދިވެހި ޚާރިޖިއްޔާގެ އިސް ގިނަ މަޤާމުތަކެއް ސަރީރު ފުރުއްވާފައިވެއެވެ. އަދި ރާއްޖޭގެ ޑިޕްލޮމެޓިކް މިޝަންތަކުގެ އެކި ފެންވަރުގެ މަޤާމުތަކުގައި އަގުހުރި ޚިދުމަތްތަކެއްވެސް ކުރައްވާފައިވެއެވެ.

މިއަހަރުގެ އޮކްޓޫބަރު މަހުގެ 1 ވަނަ ދުވަހު އެމްބެސެޑަރ އެޓް ލާޖުގެ މަޤާމަށް އައްޔަންކުރެއްވުމުގެ ކުރިުން ސަރީރު ހުންނެވީ އޯގަނައިޒޭޝަން އިފް އިސްލާމިކް ކޮންފަރެންސް، އޯއައިސީގެ ޑިރެކްޓަރ އޮފް އޭޝިއަން އެފެއަރސްގެ މަޤާމުގައެވެ.

ސަރީރު ވަނީ ޚާރިޖީ ވުޒާރާގެ ފޮރިން ސެކްރެޓަރީގެ މަޤާމާއި، އ.ދ. އަށް ރާއްޖެއިން ކަނޑައަޅުއްވާފައި ހުންނަވާ ޕަރމަނަންޓް ރެޕްރެޒެންޓެޓިވްގެ މަޤާމާއި، އެމެރިކާއަށް ރާއްޖެއިން ކަނޑައަޅުއްވާފައި ހުންނަވާ ސަފީރުގެ މަޤާމުވެސް ފުރުއްވާފައެވެ.

މީގެއިތުރުން ބަންގްލަދޭޝަށް ކަނޑައަޅުއްވާފައި ހުންނަވާ ދިވެހިރާއްޖޭގެ ސަފީރުކަމާއި، އދ.ގައި ހުންނަވާ ރާއްޖޭގެ ދާއިމީ މަންދޫބުކަމުގެ މަޤާމާއި، އެމެރިކާ، ބަންގްލަދޭޝްއަށް ކަނޑައަޅުއްވާފައި ހުންނަވާ ސަފީރުކަމުގެ މަޤާމާއި، ސާކްގެ އިސް މަޤާމުތަކުގެ އިތުރުންވެސް ޚާރިޖިއްޔާގެ އެހެނިހެން އިސް ގިނަ މަޤާމުތަކެއް ފުރުއްވާފައިވެއެވެ.

ސަރީރު ވަނީ އޮސްޓްރޭލިއާގެ ކެންބެރާ ޔުނިވަރސިޓީން ސޯޝަލް ސައިންސަސްގެ ދާއިރާއިން ފުރަތަމަ ޑިގްރީ ހާސިލުކުރައްވާފައެވެ. އަދި އޮސްޓްރޭލިއާގެ މޮނާޝް ޔުނިވަރސިޓީން ފޮރިން އެފެއާޒް އެންޑް ޓްރޭޑްގެ ދާއިރާއިން މާސްޓަރސް ޑިގްރީ ހާސިލުކުރައްވާފައިވެއެވެ. މީގެ އިތުރުންވެސް ޚާރިޖީ ދާއިރާގެ ގިނަ ތަމްރީން ޕްރޮގްރާމްތައްވެސް ފުރިހަމަކުރައްވާފައިވެއެވެ.