ކާނާގެ ޔަޤީންކަމާއި ވަޒީފާގެ ގިނަ ފުރުސަތުތަކެއްގެ އުއްމީދާއެކު، ކަންނިގިއްލާ ބީލަމަށް

ގދ. ކަންނިގިއްލާގައި ދެމެހެއްޓެނިވި ދަނޑުވެރިކަމުގެ ބިޔަ މަޝްރޫޢެއް ކުރިއަށްގެންދިޔުމަށް ހޯނޑެއްދޫ ކައުންސިލުން ނިންމައިފިއެވެ.

ގދ. ހޯނޑެއްދޫ ކައުންސިލްގެ އިހްތިސާސްގެތެރޭގައި ހިމެނޭ ފަޅުރަށެއް ކަމުގައިވާ ކަންނިގިއްލާގައި ދަނޑުވެރިކަމުގެ މަޝްރޫޢުކުރިއަށް ގެންދިޔުމަށް ޝައުގުވެރިވާ ފަރާތްތަތަކަށް އެފުރުސަތު ކައުންސިލުންވަނީ ހުޅުވާލާފައެވެ.

ކައުންސިލުން ބުނީ ރާއްޖެއާއި ރާއްޖޭން ބޭރުގެ ފަރާތްތަކަށް ބީލަން ހުށަހެޅުމުގެ ފުރުސަތު ހުޅުވާލާފައިވާ ކަމަށެވެ. މިމަޝްރޫޢާ ގުޅޭގޮތުން ވާހަކަދައްކަވަމުން ހޯނޑެއްދޫ ކައުންސިލްގެ ރައީސް ހުސެއިން ވާރިޝް ވިދާޅުވީ ދަނޑުވެރިކަމަށް އެރަށް ދޫކުރަން ނިންމާފައިވަނީ 30 އަހަރުގެ މުއްދަތަކަށް ސިނާއީ ފެންވަރަށް ދަނޑުވެރިކަމުގެ މަސަކަތްކުރުމަށް ކަމަށެވެ. އަދި ދަނޑުވެރިކަމުގެ އިތުރުން ޕޯލްޓްރީ ފާމިން އަދި މެރިކަލްޗަރގެ މަސައްކަތްވެސް ކުރެވޭނެ ކަމަށެވެ.

ވާރިޝް ވިދާޅުވީ އެރަށް ދޫކުރަނީ އަކަފޫޓަކަށް 60 ލާރީގެ ރޭޓުން ކަމަށެވެ. އެހެންކަމުން 30 އަހަރުތެރޭގައި އެރަށުގެ ބިމު ކުލީގެގޮތުގައި ކައުންސިލަށް 12.8 މިލިޔަން ރުފިޔާ ލިބޭނެ ކަމަށެވެ.

އަދި މިއީ އެންމެ ކުޑަ އަގު ކަމަށާއި ބީލަން ހުށަހަޅާ ފަރާތުން އެއަށްވުރެ ބޮޑު އަގެއް ހުށަހެޅުމުގެ ފުރުސަތުވެސް ހުޅުވާލާފައިވާކަމަށް ވާރިޝް ވިދާޅުވިއެވެ.

ކައުންސިލަށް ބޮޑު އާމްދަނީއެއް ލިބުމުގެ އިތުރުން މިމަޝްރޫޢާއެކު އެސަރަހައްދުގެ ރައްޔިތުންނަށް ވަޒީފާގެ ގިނަ ފުރުސަތުތަކެއް ހުޅުވާލެވޭނެ ކަމަށްވެސް ވާރިޝް ވިދާޅުވިއެވެ.

މިއަހަރުގެ ކުރީކޮޅުވެސް އެރަށުގައި ދަނޑުވެރިކަމުގެ މަޝްރޫޢެއް ކުރިއަށް ގެންދިޔުމަށް ބަޔަކު ޝައުގުވެރިކަން ފާޅުކުރި ކަމަށާއި، އެހެންކަމުން މިހާރު އެރަށް ބީލަމަށް ހުޅުވާލާފައިވާއިރު، ރަނގަޅު ތަރުހީބެއް ލިބޭނެކަމުގެ އުއްމީދު ބޮޑުކަމަށް އޭނާ ވިދާޅުވިއެވެ.

ކަންނިގިއްލާގެ ބިމުގެ ބޮޑުމިނަކީ 430،000 އަކަފޫޓެވެ. މިރަށަކީ ދަނޑުވެރިކަމާއި ޕޯލްޓްރީ ފާމިން އަދި މެރިކަލްޗަރއަށް އެކަށީގެންވާ ރަށެއްކަމަށް ކައުންސިލުން ބުނެއެވެ.

ކައުންސިލުން އުއްމީދުކުރަނީ ކަންނިގިއްލާގައި ދެމެހެއްޓެނިވި އަދި ޒަމާނީ ދަނޑުވެރިކަމުގެ މަޝްރޫޢެއް ފެށިގެންދިޔުމެވެ. އަދި މިފަދަ މަޝްރޫޢަކާއެކު އެސަރަހައްދަށްވެސް ކާބޯތަކެތީގެ ޔަޤީންކަން ކަށަވަރުވެގެންދިޔުމަށް އެހީތެރިވެދޭނެކަމަށްވެސް ކައުންސިލުން ދެކެއެވެ.

ކަންނިގިއްލާގައި ދަނޑުވެރިކަމުގެ މަޝްރޫޢު ކުރިއަށްގެންދަން، ޝައުގުވެރިވާ ފަރާތްތަކުން ބީލަން ހުށަހެޅުމުގެ ސުންގަޑިއަކީ އަންނަމަހުގެ 21ވަނަ ދުވަހެވެ.