މަރާމާތަށް ފަހު ކޫއްޑޫ އެއަރޕޯޓު އަލުން އޮޕަރޭޝަނަށް

ކޫއްޑޫ އެއަރޕޯޓުގެ ރަންވޭ މަރާމާތުކުރުމުގެ މަސައްކަތް ނިންމާ، އަލުން ހުޅުވާލައިފިއެވެ. މިއާއެކު މޯލްޑިވިއަންގެ ޝެޑިއުލް ދަތުރުތައް އެ އެއަރޕޯޓަށް ވަނީ ފަށާފައެވެ.

ގއ. އަތޮޅުގައި ހިންގާ ކޫއްޑޫ އެއަރޕޯޓަށް މޯލްޑިވިއަންގެ ދަތުރުތައް ހުއްޓާލަން ނިންމީ އެއަރޕޯޓް މަރާމާތުނުކޮށް ދިގު މުއްދަތެއް ވޭތުވުމާއި ގުޅިގެންނެވެ. މިކަމާއި ގުޅޭގޮތުން ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން އޭރު ވިދާޅުވެފައިވަނީ ކޫއްޑޫ އެއަރޕޯޓުގެ ރަންވޭ މަރާމާތުނުކޮށް ގިނަ ދުވަސްވުމުން، އެ އެއަރޕޯޓަށް ދަތުރުކުރި މޯލްޑިވިއަންގެ ދެ ބޯޓަކަށް ގެއްލުން ލިބި، ގްރައުންޑް ކުރަންޖެހުނުކަމަށެވެ.

މޯލްޑިވިއަނުން ކޫއްޑޫއަށް ދަތުރުތައް ހުއްޓާލީ މިދިޔަމަހުގެ ކުރީ ކޮޅުއެވެ.

ދަތުރުފަތުރާއި މަދަނީ އުދުހުންތަކާ ބެހޭ ވަޒީރު ވިދާޅުވީ އެވުޒާރާގެ އިސްނެގުމާއެކު ސިވިލް އޭވިއޭޝަން އޮތޯރިޓީއާއި، އެއަރޕޯޓް އޮޕަރޭޓަރާއި އަދި ގުޅުންހުރި ފަރާތްތަކާ ގުޅިގެން މައްސަލަ ހައްލުކުރުމުގެ މަސައްކަތް ފަށާފައިވާކަމަށެވެ.

ކޫއްޑޫ ރަންވޭ މަރާމާތުކުރުމުގެ މަސައްކަތް ނިމިފައިވާއިރު، މޯލްޑިވިއަނުން އެ އެއަރޕޯޓަށް ދުވާލަކު 2 ދަތުރުކުރާނެއެވެ.

ކުއްޑޫ އެއަރޕޯޓު ހުޅުވީ 2012 ވަނަ އަހަރުއެވެ. އެއަށްފަހު ބޮޑެތި ބޯޓުފަހަރާއި ޖެޓްތައް ޖެއްސޭ ފެންވަރުގެ ބޮޑު ރަންވޭއަކާއެކު އެއަރޕޯޓް ތަރައްގީކޮށް އަލުން ކޫއްޑޫ އެއަރޕޯޓު ހުޅުވީ 2017 ވަނަ އަހަރުއެވެ.