4428 ބިދޭސީން ފޮނުވާލައިފި، އެތައް ވިޔަފާރިއެއް ދިވެހިންގެ އަތަށް

ރާއްޖޭގައި ޤަވާއިދާ ޚިލާފަށް އުޅެމުންދިޔަ ގިނަ ޢަދަދެއްގެ ބިދޭސީން ފޮނުވާލަމުގެ ސަބަބުން އެމީހުން ކޮންޓްރޯލް ކުރަމުންދިޔަ އެތައް ވިޔަފާރިއެއް ދިވެހިންގެ އަތްމައްޗަށް ލިބިފައިވާކަމަށާއި، ރާއްޖޭގެ އިޤްތިޞާދަށް އޭގެ ފައިދާ ކުރާނެކަމަށް ދާޚިލީ ސަލާމަތައި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ. ވަޒީރު މިހެން ވިދާޅުވީ ރައްޔިތުންގެ މަޖިލީހުގައި މެންބަރުން ކުރެއްވި ސުވާލުތަކަށް ޖަވާބުދެއްވަމުންނެވެ.

ރާއްޖޭގައި ގަވާއިދާ ޚިލާފަށް އުޅެމުންދާ ބިދޭސީންގެ މައްސަލަ ހައްލުކުރުމަށް ސަރުކާރުން ދަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން މިދިޔަމަހުގެ ނިޔަލަށް 4428 ބިދޭސީން ޑީޕޯޓް ކޮށްލާފައިވާކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވިއެވެ. ވަޒީރު ވިދާޅުވީ ޤަވާއިދާ ޚިލާފަށް އުޅޭ ބިދޭސީން އަނބުރާ ޤައުމަށް ފޮނުވާލުމުން އޭގެ ފައިދާ އިޤްތިޞާދަށް ކުރާނެކަމަށެވެ. އެގޮތުން ބިދޭސީން ހިންގަމުންދިޔަ އެތައް ވިޔަފާރިއެއް ހުއްޓުވައި، އެ ވިޔަފާރިކުރުމުގެ ފުރުޞަތު ދިވެހިންނަށް ލިބެނުންދާކަމަށްވެސް ދާޚިލީ ސަލާމަތާބެހޭ ވަޒީރު ވިދާޅުވިއެވެ.

"މީގެތެރެއިން އުފެދިގެން އަންނާނީ ދިވެހި ވިޔަފާރިތަކަށް ފުރުސަތު. މިކަންކަމަށް ޖާގަ ލިބި ދިވެހި އިޤްތިސާދުގެތެރޭގައި ހިފެހެއްޓެން ޖެހޭ ފައިސާ ހިފެހެއްޓުމަށް މިހާރު ކުރިއަށްވުރެ ރަނގަޅުވާނެ."ވަޒީރު ވިދާޅުވިއެވެ.

ދާޚިލީ ވަޒީރު އިޙްސާން ވިދާޅުވީ ރާއްޖޭގައި ވަޒީފާ އަދާ ކުރާ ބިދޭސީންނަށް ވަޒީފާ ދޭ ފަރާތުން، ދައުލަތަށް ދައްކަންޖެހޭ 1.7 ބިލިޔަން ރުފިޔާގެ ތެރެއިން 1 ބިލިޔަނަށްވުރެ ގިނަ ރުފިޔާ ދައުލަތަށް ހޯދާފައިވާކަމަށެވެ.

ވަޒީރު ވިދާޅުވީ ޤަވާއިދާ ޚިލާފަށް އުޅޭ ބިދޭސީންގެ މައްސަލަ ޙައްލުކުރުމަށް ކުރިއަށްގެންދާ "އޮޕަރޭޝަން ކުރަނގި" މުޅި ރާއްޖެއަށް ފުޅާކޮށްފައިވާކަމަށެވެ. ޖޫން މަހުގެ 3 ވަނަ ދުވަހު ފެށި މި އޮޕަރޭޝަނުގައި މިހާތަނަށް 8385 ބިދޭސީއެއްގެ ބަޔޯމެޓްރިކް ޑޭޓާ އެއްކޮށްފައިވާކަމަށާއި، މިހާތަނަށް 96 ރަށެއްގައި މި މަސައްކަތް ފަށައި 21 ރަށެއްގައި އެމަސައްކަތް ނިންމާފައިވާކަމަށްވެސް ވަޒީރު ވިދާޅުވިއެވެ.

"ޓާގެޓު މިކުރީ އަންނަ އަހަރުގެ އޭޕްރީލަށް މިމަސައްކަތް ނިންމަން. އެހެންނަމަވެސް އަންނަ އަހަރުގެ ފެބްރުއަރީއަށް މިހާރު މިފެންނަ ގޮތުންނަމަ މި މަސައްކަތް ނިންމާލެވޭނެ." ވަޒީރު އިޙްސާން ވިދާޅުވިއެވެ.

ދާޚިލީ ސަލާމަތާބެހޭ ވަޒީރު ޢަލީ އިޙްސާން ވިދާޅުވީ މި އޮޕަރޭޝަން އަންނަ މަހުގެ އެއްވަނަ ދުވަހު މާލޭ ސަރަޙައްދުގައިވެސް ފަށްޓަވާނެކަމަށެވެ. އަދި ޢަމާޒަކީ، ޤަވާއިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލައަށް 3 އަހަރު ދުވަހުގެ ތެރޭގައި ޖުމްލަ ހައްލެއް ގެނައުންކަމަށް ވަޒީރު ވިދާޅުވިއެވެ.

އޮޕަރޭޝަން ކުރަނގީގެ މައިގަނޑު މަގްސަދަކީ ދިވެހިރާއްޖޭގައި ގަވާއިދާ ޚިލާފަށް ދިރިއުޅެމުންދާ ބިދޭސީ މަސައްކަތްތެރިންގެ މައްސަލައަށް ދާއިމީ ހައްލެއް ހޯދުމެވެ. އެގޮތުން ރާއްޖޭގައި ވަޒީފާ އަދާކުރާ ބިދޭސީންގެ އިނގިލީގެ ނިޝާން ނެގުމާއި އެ ބިދޭސީ މީހާ ވަޒީފާ އަދާކުރަނީ ރާއްޖޭގައި ހެދިފައިހުރި ގާނޫނާއި ގަވާއިދުގެ ދަށުންތޯ މި އޮޕަރޭޝަނުގެ ތެރެއިން ޔަގީންކުރާނެއެވެ.

މި އޮޕަރޭޝަނަށް ބޭނުންވާ މަޢުލޫމާތު އެއްކުރަނީ ކައުންސިލް އިދާރާތަކުގައި ބިދޭސީންގެ ބަޔޯ މެޓްރިކްސް ނެގުމުގެ އިންތިޒާމު ޤާއިމްކުރުމަށްފަހުއެވެ. އެ މައުލޫމާތުގެ އަލީގައި ބިދޭސީންގެ މައި ދަފްތަރެއް އެކުލަވާލާނެކަމަށް ދާޚިލީ ސަލާމާތައި ފަންނިއްޔާތާ ބެހޭ ވުޒާރާއިން ވިދާޅުވެއެވެ.