ތަރައްޤީގެ މުހިންމު މަޝްރޫޢުތަކަށް އަންނަ އަހަރުގެ ބަޖެޓުގައި އިސްކަންދޭނެ: މެންބަރު އަޒާން

އަންނަ އަހަރުގެ ބަޖެޓު އެކުލަވާލާއިރު ކޮންމެ ރަށަކަށްވެސް ބޭނުންވާ ތަރައްޤީގެ މުހިންމު މަޝްރޫޢުތައް ހިންގުމަށް ބޭނުންވާ ފައިސާ ހިމެނުމަށް ޚާއްސަ އިސްކަމެއްދެއްވާނެކަމަށް ރައްޔިތުންގެ މަޖިލީހުގެ ހިތަދޫ މެދު ދާއިރާގެ މެންބަރު އަޙްމަދު އަޒާން މަރްޒޫޤު ވިދާޅުވެއްޖެއެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގުރާމުގައި ވާހަކަދައްކަވަމުން ރައްޔިތުންގެ މަޖިލީހުގެ ހިތަދޫ މެދު ދާއިރާގެ މެންބަރު އަޙްމަދު އަޒާން މަރްޒޫޤު ވިދާޅުވީ ރާއްޖެއަށް ދިމާވެފައިވާ މާލީ ދަތިކަމުން އަރައިގަތުމަށް ސަރުކާރުން އެންމެ ބޮޑު އިސްކަމެއްދެނީ ޚަރަދުތައް ކުޑަކޮށް، އާމްދަނީ އިތުރުކުރެވޭނެ ގޮތްތައް ހޯދުމަށް ކަމަށެވެ. އަދި އަންނަ އަހަރުގެ ބަޖެޓު އެކުލަވާލާއިރުވެސް އެންމެ ބޮޑު އިސްކަމެއް ދޭނީ ޚަރަދުތައް ކުޑަ ކުރަންކަމަށް މެންބަރު ވިދާޅުވިއެވެ.

"ހުރިހާ އިދާރާއަކަށްވެސް ބަޖެޓުގައި ކަނޑައަޅާނީ ކޮންމެހެން ކުރަންޖެހޭ ޚަރަދުތައް ހަމަޖައްސާލެވޭވަރަށް. މަޝްރޫޢުތައްވެސް ދެމެހެއްޓެނިވި ގޮތެއްގައި ކުރިއަށްގެންދެވޭނެ ގޮތަކަށް ބަޖެޓު އެކުލަވާލެވޭނީ. އަދި ކޮންމެ ރަށެއްގައިވެސް ތަރައްޤީގެ އެންމެ މުހިންމު މަޝްރޫޢުތަކަށް ފައިސާ ހިމެނުމަށް އިސްކަންދޭނީ." މެންބަރު އަޒާން ވިދާޅުވިއެވެ.

މެންބަރު އަޒާން ވިދާޅުވީ ބަޖެޓު އެކުލަވާލުމުގެ ކުރިން ކޮންމެ ރަށަކަށްވެސް އެންމެ ބޮޑަށް ބޭނުންވާ ތަރައްޤީގެ މަޝްރޫޢަކީ ކޮބައިތޯ ބެލޭނެ ކަމަށެވެ. އަދި ބަޖެޓުގައި ހިމެނުނަށް ބޮޑަށް އިސްކަންދެވޭނީ އެ މަޝްރޫޢެއް ހިންގަން ބޭނުންވާ ފައިސާކަން މެންބަރު ފާހަގަކުރެއްވިއެވެ.

ރާއްޖެ މިއަދު ޕްރޮގުރާމްގައި ވާހަކަދައްކަވަމުން ރައްޔިތުންގެ މަޖިލީހުގެ ފުނަދޫ ދާއިރާގެ މެންބަރު މުޙައްމަދު މަމްދޫޙް ވިދާޅުވީ ބަޖެޓު އެކުލަވާލާއިރު، މަޝްރޫޢުތަކަށް ބޭކާރުގޮތުގައި ފައިސާ ނުހިމަނަން ޚާއްސަ އިސްކަމެއް ދެއްވާނެކަމަށެވެ. އަދި މިދިޔަ ސަރުކާރުގައި ބައެއް މަޝްރޫޢުތައް ހިންގުމަށް ބޭނުންވާ ފައިސާއަށްވުރެ ބޮޑު އަދަދުތައް ބަޖެޓުގައި ޖަހައި، މަސައްކަތްކުރާ ވަކި ކުންފުންޏަކަށް މާލީ މަންފާ ހޯދައިދިނުމުގެ ގޮތުން މަޝްރޫޢުތައް އަހަރުތަކަށް ދަންމާލާފައިވާކަމަށް މެންބަރު ތުހުމަތު ކުރެއްވިއެވެ.

މަމްދޫޙް ވިދާޅުވީ އަންނަ އަހަރުގެ ބަޖެޓު އެކުލަވާލާނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުތައް ފުއްދޭނެގޮތަށް، ސީދާ އެ މަޝްރޫޢެއް ހިންގުމަށް އަންނަ އަހަރަށް ފައިސާ ބޭނުންވާ މިންވަރަށް ބަޖެޓުގައި ހިމަނައިގެން ކަމަށެވެ.

"ބަޖެޓު އެކުލަވާ މިލަނީ ރަށްރަށުގައި ހުރި ތަރައްޤީގެ އެކި މަޝްރޫޢުތައްވެސް ހިންގޭނެ ގޮތަށް. އަދި ރާއްޖޭގެ މާލީ ޙާލަތު ރަނގަޅުކުރުމަށް ސަރުކާރުން އަޅުއްވަމުން ގެންދަވާ އިސްލާޙީ ފިޔަވަޅުތަކާވެސް އެއްގޮތަށް އަންނަ އަހަރުގެ ބަޖެޓު އެކުލަވާލެވޭނީ." މެންބަރު ވިދާޅުވިއެވެ.

މި ހިނގާ 2024 ވަނަ އަހަރު ޢަމަލުކުރަމުންދަނީ ނިމިދިޔަ އެމްޑީޕީ ސަރުކާރުގެ މެޖޯރިޓީ އޮތް ރައްޔިތުންގެ މަޖިލީހުން އެކުލަވާލާފައިވާ ބަޖެޓަށެވެ. މިއަހަރަށް ކަނޑައެޅި ބަޖެޓުގައި ސަރުކާރުން ބޭނުންވާ މަޝްރޫޢުތައް ހިންގަން ފައިސާ ހިމަނާފައިނުވާކަން 20 ވަނަ މަޖިލީހުގެ މެންބަރުން ފާހަކުރައްވާފައިވެއެވެ.

އަދި މިއަހަރު ސަޕްލިމެންޓަރީ ބަޖެޓެއް ހުށައަޅަންޖެހުނީ ޒިންމާދާރުކަން ކުޑަ ގޮތަކަށް ނިމުނު 19 ވަނަ މަޖިލީހުން މިއަހަރުގެ ބަޖެޓު ފާސްކުރުމުންކަމަށްވެސް މެންބަރުން ފާހަގަކުރެއްވިއެވެ.