ލ.އަތޮޅުގައި ހުރި ފަތުރުވެރިކަމުގެ އިންވެސްޓްމަންޓުތަކުގެ މައުލޫމާތު އިންޑިއާ ސަފީރާ ހިއްސާކޮށްފި

ލ.ބަރެސްދޫ އާއި ގާދޫގައި ފަތުރުވެރިކަން ތަރައްޤީކުރުމަށް ހުރި ފުރުސަތުތަކާއި ގުޅޭގޮތުން ފަތުރުވެރިކަމާއި ބެހޭ ވަޒީރު އިބްރާހީމް ފައިސަލް އިންޑިއާ ސަފީރާއެކު މަޝްވަރާކުރައްވައިފިއެވެ.

އިންޑިއާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރާއި ފަތުރުވެރިކަމާ ބެހޭ ވަޒީރު އިބްރާހީމް ފައިސަލް ވަނީ ލ. އަތޮޅަށް ޒިޔާރަތްކުރައްވާފައެވެ. މިދަތުރުގައިވަނީ ލ. އަތޮޅުގައި ހުރި ފަތުރުވެރިކަމުގެ ފުރުސަތުތައް ދެނެގަނެ ގުޅިގެން ކުރެވިދާނެ މަސައްކަތްތަކާއި ގުޅޭގޮތުން މަޝްވަރާކުރައްވާފައެވެ.

މިދަތުރާއި ގުޅޭގޮތުން ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ފަތުރުވެރިކަމާ ބެހޭ ވަޒީރު އިބްރާހީމް ފައިސަލް ވިދާޅުވީ ލ. ބަރެސްދޫ އާއި ގާދޫއަށް ޒިޔާރަތްކުރައްވައި މި ރަށްރަށުގައި ފަތުރުވެރިކަން ތަރައްޤީކުރުމަށް ހުރި ފުރުސަތުތަކާއި ގުޅޭގޮތުން މަޝްވަރާކުރައްވާފައިވާ ކަމަށެވެ. ވަޒީރު ފައިސަލް ވިދާޅުވީ މި ރަށްރަށުގައި ފަތުރުވެރިކަން ތަރައްޤީކުރުމުގައި އެރަށެއްގެ ގުދުރަތީ ރީތި ކަމަށާއި ސަޤާފީ ތަރިކަތައް ރައްކާތެރިކުރުމަށް އިސްކަން ދިނުމާއި ގުޅޭގޮތުންވެސް މަޝްވަރާކުރައްވާފައިވާ ކަމަށެވެ.

Visited Baresdhoo and Gaadhoo today as part of our tour in Laamu Atoll. Discussed its potential as a key site for tourism development and how we can unlock new opportunities for growth, while preserving the island’s natural beauty and heritage. pic.twitter.com/jyQ1WgdQ5X

— Ibrahim Faisal (@ifaisalofficial) October 24, 2024

އިންޑިއާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރް ލ.އަތޮޅަށް ދަތުރުފުޅެއްކުރައްވާފައިވާއިރު، ރާއްޖެއާއި އިންޑިއާއާ ދެމެދު އޮންނަ ވިޔަފާރީގެ ގުޅުންތައް ދަނީ ބަދަހިވަމުންނެވެ.

ރާއްޖޭގެ ރައީސުލްޖުމްހުރިއްޔާ ޑރ. މުޙައްމަދު މުޢިއްޒުވެސް ދާދިފަހުން ވަނީ އިންޑިއާއަށް ރަސްމީ ދަތުރުފުޅެއްކުރައްވާފައެވެ. މިދަތުރުފުޅުގައި ރައީސުލްޖުމްހޫރިއްޔާވަނީ އިންޑިއާގެ ރައީސް ދްރޫޕަތީ މުރުމޫ އާއި ބޮޑުވަޒީރު ނަރެންދްރަ މޯދީއާ ބައްދަލުކުރައްވާފައެވެ. އަދި ދިވެހިރާއްޖެ އާއި އިންޑިއާއާ ދެމެދު މުހިންމު މަޝްވަރާތައް ކުރިއަށްގެންދަވާ މުހިންމު ދާއިރާތަކުން އެއްބަސްވުންތައްވެސްވަނީ ޤާއިމުކުރައްވާފައެވެ. އެގޮތުން ރާއްޖެއާއި އިންޑިއާ ދެމެދު ކަރަންސީ ސްވޮޕް އެގްރީމަންޓް ހިމެނޭހެން އެކި ދާއިރާތަކުން ގުޅުން ބަދަހިކުރުމަށް 5 އެއްބަސްވުމެއް އެކުލަވާލައްވާފައިވެއެވެ. މީގެއިތުރުން އިންޑިއާގެ ދިއްލީ، އާގްރާ، މުންބާއީ އަދި ބެންގަލޫރުގައި ވިޔަފާރީގެ ފޯރަމްތައް ރާއްޖޭން ވަނީ ބާއްވާފައެވެ.

މުޅި ރާއްޖެއަށް ފަތުރުވެރިކަން ފުޅާކޮށް، ފަތުރުވެރިކަމުން ލިބޭ ނަފާ އިތުރުކުރުމަކީ މި ސަރުކާރުގެ އަމާޒެކެވެ. އެގޮތުން ފަތުރުވެރިކަން ކުޑަކޮށް ތަރައްޤީވެފައިވާ ހިސާބުތަކަށް އިންވެސްޓަރުން ހޯދުމަށްވެސް ގިނަ މަސައްކަތްތަކެއް ކުރުމަށްވަނީ ރާވާފައެވެ. ފަތުރުވެރިކަމާއި ބެހޭ ވަޒީރު އިބްރާހީމް ފައިސަލް މީގެކުރިން ވިދާޅުވެފައިވަނީ އިންވެސްޓަރުން ހޯދުމަށްޓަކައި ދުނިޔޭގެ އެކި ޤައުމުތަކުގައި އިންވެސްޓަރ ފޯރަމްތައް ބޭއްވުމަށް ރާވާފައިވާ ކަމަށެވެ. އެގޮތުން ސިންގަޕޫރު، ތައިލެންޑު އަދި ދުބާއީގައި އިންވެސްޓަރ ފޯރަމުތައް ބޭއްވުމަށް ނިންމާފައިވާ ކަމަށް ވަޒީރު ވަނީ މީގެކުރިން ވިދާޅުވެފައެވެ.