މަޖިލީހުގެ ނައިބު ރައީސް ޗައިނާގެ ޝަންޑޮންގ ޕްރޮވިންސްގެ ގަވަރުނަރާ ބައްދަލުކުރައްވައިފި

ރައްޔިތުންގެ މަޖިލީހުގެ ނައިބު ރައީސް، އަޙްމަދު ނާޡިމް ޗައިނާގެ ޝަންޑޮން ޕްރޮވިންސްގެ ގަވަރުނަރު ޒައު ނައުޒިއަންއާ ބައްދަލުކުރައްވައިފިއެވެ.

މަޖިލީހުގެ ނައިބު ރައީސް ޗައިނާގެ ޝަންޑޮން ޕްރޮވިންސުގެ ގަވަރުނަރާ ބައްދަލުކުރެއްވީ ދުނިޔޭގެ ފެންވަރުގައި ކަނޑުގެ ވެށި ޙިމާޔަތްކުރުމުގެ ގޮތުން ޗައިނާގައި މިހާރު ކުރިއަށްދާ ގްލޯބަލް އޯޝަން ޑިވެލޮޕްމެންޓް ފޯރަމްގައި ބައިވެރިވެވަޑައިގަތުމަށް ކުރައްވަމުންގެންދަވާ ދަތުރުފުޅުގެ ތެރެއިންނެވެ.

މި ބައްދަލުކުރެއްވުމުގައި ދުނިޔޭގެ ފެންވަރުގައި ކަނޑުގެ ވެށި ޙިމާޔަތްކުރުމުގެ މުހިންމުކަމާއި އެކަމަށްޓަކައި ޤައުމުތައް ގުޅިގެން މަސައްކަތްކުރުމުގެ މުހިންމުކަމުގެ މައްޗަށް ދެ ބޭފުޅުން މަޝްވަރާކުރެއްވިއެވެ. އަދި ކަނޑުގެ ވެށި ކިލަނބުވުމަށް މެދުވެރިވާ ކަންތައްތަކުން ކަނޑުގެ ވެށި ސަލާމަތްކުރުމަށް ބައިނަލްއަޤްވާމީ ފެންވަރުގައި ގުޅިގެން މަސައްކަތްކުރުމުގެ މުޙިންމުކަންވެސް ދެބޭފުޅުން ފާހަގަކުރެއްވިއެވެ.

މި ބައްދަލުކުރެއްވުމުގައި ގްލޯބަލް އޯޝަން ޑިވެލޮޕްމަންޓް ފޯރަމް ޝަރަފުވެރިކޮށްދެއްވުމަށް ދަޢުވަތު ދެއްވިކަމަށްޓަކައި ގަވަރުނަރާއި ޗައިނާ ސަރުކާރަށް މަޖިލީހުގެ ނައިބު ރައީސް ނާޡިމް ވަނީ ޝުކުރު އަދާކުރައްވާފައެވެ.

މަޖިލީހުގެ ނައިބު ރައީސްގެ އިތުރުން މި ބައްދަލުކުރެއްވުމުގައި މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަޙްމަދު ޝިޔާމްވެސް ބައިވެރިވެވަޑައިގެންނެވިއެވެ.

މި ބައްދަލުކުރެއްވުމަށްފަހު، މި ފޯރަމްގެ ބައިވެރިންނަށް ގަވަރުނަރު ދެއްވި ރޭގަނޑުގެ ފަރިއްކޮޅުގައި، ދިވެހި ވަފުދުގެ މެންބަރުން ބައިވެރިވެވަޑައިގެންނެވިއެވެ.