ރައީސް ނިންމެވީ އެހެން ލީޑަރުންނަށް ކެރިވަޑައިނުގަތް ނިންމެވުމެއް: ވަޒީރު ޝިޔާމް
-
ރައީސް ވެރިކަމާ ހަވާލުވެވަޑައިގެންނެވީ މާލީ ޙަލަތު ގޯސް ދުވަސްވަރެއްގައި
-
ރައީސްގެ ނިންމެވުންތަކުން ސާބިތުކޮށްދެއްވީ ރައީސް ވެރިކަންކުރައްވަނީ ދިވެހިންނަށްޓަކައިކަން
ޚަރަދު ކުޑަކުރަން ރައީސް ނިންމެވީ، މީގެ ކުރިން އެއްވެސް ލީޑަރަކަށް ނިންމެވުމަށް ކެރިވަޑައިނުގަތް ނިންމެވުންތަކެއްކަމަށް މަސްވެރިކަމާއި ކަނޑުގެ ވަޞީލަތްތަކާބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.
ސޯޝަލް މީޑިޔާގައި ޙިއްސާކުރެއްވި ޕޯސްޓެއްގައި މަސްވެރިކަމާއި ކަނޑުގެ ވަޞީލަތްތަކާބެހޭ ވަޒީރު އަޙްމަދު ޝިޔާމް ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރާއްޖޭގެ ވެރިކަމާ ހަވާލުވެވަޑައިގެންނެވީ ރާއްޖޭގެ އިޖުތިމާޢީ ފޭރާން ވީދި، މާލީ ޙާލަތު ގޯސްވެފައިވާ ދުވަސްވަރެއްގައި ކަމަށެވެ. އަދި މި ހާލަތުން އަރައިގަތުމަށް ރައީސުލްޖުމްހޫރިއްޔާ ގިނަ މަސައްކަތްތަކެއް ކުރައްވަމުން ގެންދަވާ ކަމަށާއި އުނދަގޫ އެތައް ނިންމެވުންތަކެއް އެމަނިކުފާނު ނިންމަވާފައިވާކަން ވަޒީރު ފާހަގަކުރެއްވިއެވެ.
ވަޒީރު ޝިޔާމް ވިދާޅުވީ ޤައުމީ ނިސްބަތުން ބަލާއިރު ޙައްލު ކުރަންޖެހޭ ގިނަ ކަންކަން ރާއްޖޭގައި އެބަހުރި ކަމަށެވެ. އަދި އެކަންކަން ހައްލުކުރުމަށް ތެދުވެރި ނިޔަތަކާއެކު އެކަންކަމަށް ކުރިމަތިލައްވަނީ މަދު ވެރިޔެއްކަމަށް ވަޒީރު ވިދާޅުވިއެވެ. އަދި ރައީސް ޑރ. މުޢިއްޒަކީ އެފަދަ މަދު ވެރިންގެ ތެރޭގައި ހިމެނޭ ބޭފުޅެއް ކަމަށާއި، އެމަނިކުފާނުގެ ފަރާތްޕުޅުން ފެންނަނީ އެހެން ސިޔާސީ ލީޑަރުންގެ ކިބައިން ނުފެންނަ ތަފާތު މަންޒަރެއްކަމަށް ވަޒީރު ވިދާޅުވިއެވެ.
ރާއްޖޭގެ މާލީ ޙާލަތު ރަނގަޅުކުރުމަށް ދައުލަތުގެ ޚަރަދު ކުޑަ ކުރަން މުހިންމު ނިންމެވުންތަކެއް ރައީސުލްޖުމްހޫރިއްޔާ އިއްޔެ ނިންމެވިއެވެ. އެގޮތުން ދައުލަތުގައި މަސައްކަތްކުރާ ގިނަ އަދަދެއްގެ މުވައްޒަފުންގެ މުސާރައިން 10 އިންސައްތަ އުނި ކުރެއްވުމަށް ވަނީ ނިންމަވާފައެވެ.
ވަޒީރު ވިދާޅުވީ ރާއްޖޭގެ މާލީ ޙާލަތު ރަނގަޅުކުރުމަށް ރައީސުލްޖުމްހޫރިއްޔާ ނިންމަވާފައިވަނީ، ނިންމަން ފަސޭހަ ނިންމުންތަކެއް ނޫން ކަމަށެވެ.
ދިވެހިރާއްޖޭގެ ވީދެމުންދާ ޢިޖްތިމާއީ ފޭރާން ހެޔޮކޮށް ދިވެހިރާއްޖޭގެ މާލީހާލަތު ރަނގަޅުކޮށް ދިވެހީންނަށް ދިވެހީންގެރާއްޖެ އަނބުރާ ހޯއްދަވައިދެއްވުގެ ބުރަ އުނދަގޫ މަސައްކަތްޕުޅު ރައީސުލް ޖުމްޙޫރިއްޔާ ޑރ. މުޙައްމަދު މުޢިއްޒު އެމަނިކުފާނުގެ ޒަޢާމަތުގެ އެންމެފުރަތަމަ ދުވަހުވެސް ވަނީ… https://t.co/n5UXH8YsuW
— Ahmed Shiyam (@Shiyamaldives) October 24, 2024
މަސްވެރިކަމާބެހޭ ވަޒީރު ވިދާޅުވީ މާލީ ޙާލަތު ރަނގަޅުކުރަން ރައީސުލްޖުމްހޫރިއްޔާ ނިންމެވި ބައެއް ނިންމެވުންތަކަކީ ނުފޫޒުގަދަ ވިޔަފާރިވެރިންގެވެސް ނުރުހުން އަމާޒުވާފަދަ ނިންމެވުންތަކެއް ކަމަށެވެ. އެހެންނަމަވެސް ދިވެހި ޤައުމަކީ ދިވެހި ރައްޔިތުންގެ ތަނެއްކަން މިއަދު އެމަނިކުފާނު ސާބިތުކޮށްދީފިކަމަށް ވަޒީރު ވިދާޅުވިއެވެ.
ވަޒީރު ވިދާޅުވީ، ރައީސުލްޖުމްހޫރިއްޔާ މިހާރު ކުރައްވަމުން ގެންދަވާ މަސައްކަތްޕުޅަކީ އަންނަން އޮތް ޖީލުތަކަށް ސަލާމަތްތެރިކަމާއި މާލީ ޙާލަތު ރަނގަޅު، އިޖުތިމާޢީ ފޭރާން ވަރުގަދަ ޤައުމެއްގެ ގޮތުގައި ފޯރުކޮށްދިނުމުގެ މަސައްކަތްޕުޅު ކަމަށެވެ.
ސޯޝަލް މީޑިއާގައި ކުރެއްވި ޕޯސްޓުގައި ވަޒީރު ވަނީ، ޤައުމުގެ މާދަމާއަށްޓަކައި ރައީސްގެ ނިންމެވުންތަކަށް ކޮންމެ ދިވެހި ރައްޔިތަކުވެސް އެއްބާރުލުން ދެއްވުމަށް އެދިވަޑައިގެންފައެވެ.
ސިވިލް ސަރވިސް ނުހިމެނޭގޮތަށް ދައުލަތުން މުސާރަ ދޭ ފަރާތްތަކުގެ ތެރެއިން 12،000 ރުފިޔާއިން މަތީގެ މުސާރަތައް ކުޑަކުރުމަށް ރައީސުލްޖުމްހޫރިއްޔާ ވަނީ ނިންމަވާފައެވެ. އަދި ރައީސްގެ އަމިއްލަފުޅު މުސާރައިން 50 އިންސައްތަ ނުނަންގަވާގޮތަށްވެސް އެމަނިކުފާނު ވަނީ ނިންމަވާފައެވެ.