ފަތުރުވެރިކަމަށް ދޫކޮށް، މަސައްކަތް ކުރިއަށްނުދާ 22 ރަށެއްގެ އެއްބަސްވުން ބާޠިލްކުރަނީ

ފަތުރުވެރިކަން ތަރައްޤީކުރުމަށް ދޫކޮށްފައިވާ ރަށްރަށުގެ ތެރެއިން ނުހެދި ގިނަ ދުވަސްވެފައިވާ ރަށްރަށާ މެދު ޢަމަލުކުރާނެ ގޮތެއް ހޯދުމަށް ފަތުރުވެރިކަމާއި ބެހޭ ޤާނޫނަށް އިސްލާހުތަކެއް ގެނައުމަށް ނިންމާފައިވާކަމަށް ފަތުރުވެރިކަމާ ބެހޭ ވަޒީރު އިބްރާހީމް ފައިޞަލް ވިދާޅުވެއްޖެއެވެ.

ފަތުރުވެރިކަމަށް ދޫކޮށް އަދިވެސް ނުހުޅުވި 20 އަހަރު ނުވަތަ 30 އަހަރުވެފައިވާ ރަށްރަށް ހުރިކަން ފަތުރުވެރިކަމާ ބެހޭ ވުޒާރާއިން ފާހަގަކުރައްވައެވެ.

ރައްޔިތުންގެ މަޖިލީހުގައި މެންބަރުން ކުރެއްވި ސުވާލުތަކަށް ޖަވާބުދެއްވަމުން ފަތުރުވެރިކަމާ ބެހޭ ވަޒީރު އިބްރާހީމް ފައިސަލް ވިދާޅުވީ އެކި ސަބަބުތަކާ ހެދި، ފަތުރުވެރިކަމަށް ނުނެރެވި ހުރި ރަށްތަކުގެ ޢަދަދު 58 އަރާކަމަށެވެ.

ވަޒީރު ވިދާޅުވީ މިރަށްރަށާ މެދު އަމަލުކުރާނެގޮތަކާއި، އަޅާނެ ފިޔަވަޅުތަކާ މެދު އިކޮނޮމިކް ކައުންސިލަށް ހުށަހަޅައި ގޮތްތަކެއް ނިންމަވާފައިވާކަމަށެވެ. އެގޮތުން ފަތުރުވެރިކަމާއި ބެހޭ ޤާނޫނަށް އިސްލާހުތައް ގެނައުމުގެ މަސައްކަތް ބަންޑާރަ ނައިބު ކުރައްވަމުން ގެންދަވާކަން ވަޒީރު ފާހަގަކުރެއްވިއެވެ.

"އެގޮތަށް އިސްލާހު ގެންނަން ނިންމީ، ޓަރމިނޭޓުކުރުމުން އެކަށީގެންނުވާ ބަދަލުތަކެއް ކޯޓަށް ގޮސްގެން ހޯދާކަން ފާހަގަކުރެވިފައިވުމުން. ޤާނޫނަށް އިސްލާހު މިގެންނަނީ އެފުރުސަތު ނުދިނުމަށްޓަކައި،" ފަތުރުވެރިކަމާ ބެހޭ ވަޒީރު އިބްރާހީމް ފައިސަލް ވިދާޅުވިއެވެ.

ފައިސައިލް ވިދާޅުވީ މަސައްކަތް ހުއްޓިފައިހުރި ބައެއް ރަށްރަށުން ދައުލަތަށްވެސް ދައްކަންޖެހޭ ގިނަ ޢަދަދެއްގެ ފައިސާ އެބަހުރިކަމަށެވެ. އެހެންކަމުން ފަތުރުވެރިކަމާ ބެހޭ ވުޒާރާއިން މަސައްކަތްކުރަމުންދަނީ އެފަރާތްތަކަށް ބޭނުންވާ އެހީތެރިކަންދީގެން ލުއިގޮތްތަކެއް ހަމަޖައްސައިދިނުމަށް ކަމަށް ފަތުރުވެރިކަމަބެހޭ ވަޒީރު ވިދާޅުވިއެވެ.

ވަޒީރު ވަނީ، އެއްވެސް ވަރަކަށް މަސައްކަތް ކުރިއަށް ނުދާ ރަށްރަށުގެ އެއްބަސްވުންތައް ބާތިލްކުރުމަށް ބަންޑާރަނައިބުގެ ލަފާފުޅަކަށް އެދިވަޑައިގެންފައިވާކަމަށްވެސް ވިދާޅުވެފައެވެ.

"މީގެދެވޭނެ ލުއިތަކެއްވެސް އެބަ ބަލަން، މަރކެޓަށް އެރަށްތަށް ނެރެން އިންވެސްޓަރުން މަސައްކަތްކުރާނަމަ، އެހެންނަމަވެސް އެއްވެސް މަސައްކަތެއްކޮށްފައި ނުވާ 22 ރަށެއްގެ އެއްބަސްވުން ޓަރމިނޭޓުކުރުމަށް ބަންޑާރަނައިބުގެ ލަފާފުޅަކަށް އެދިފައިވާނީ،" ވަޒީރު ފައިސަލް ވިދާޅުވިއެވެ.

ސަރުކާރުން މަސައްކަތްކުރަމުންދަނީ ފަތުރުވެރިކަން މުޅި ރާއްޖެއަށް ފުޅާކޮށް މި ސިނާއަތުން ލިބޭ ނަފާ އިތުރުކުރުމެވެ. އެގޮތުން ފަތުރުވެރިކަމަށް އިތުރު ރަށްތައް ނެރެ، ފަތުރުވެރިކަމަށް ބޭރުގެ އިންވެސްޓަރުން ގެނައުމަށް ފަތުރުވެރިކަމާއި ބެހޭ ވުޒާރާއިން ދަނީ ގިނަ މަސައްކަތްތަކެއް ކުރަމުންނެވެ.