ސީއޭ މޯލްޑިވްސް ސީއީއޯ އަކަށް ޑރ. މާހިދު ޝަރީފް
-
ޑރ. މާހިދު އަކީ ތައުލީމީ ދައިރާގައި 20 އަހަރުގެ ތަޖުރިބާ ލިބިފައިވާ ފަރާތެއް
ޗާރޓަޑް އެކައުންޓެންޓް އޮފް ދަ މޯލްޑިވްސް (ސީއޭ މޯލްޑިވްސް) ގެ ސީއީއޯ މަޤާމަށް ޑރ. މުޙައްމަދު މާހިދް ޝަރީފް ޢައްޔަންކުރައްވައިފިއެވެ. ޑރ. މާހިދް މިމަޤާމަށް ޢައްޔަން ކުރައްވާފައިވަނީ އާދީއްތަ ދުވަހުއެވެ.
ސީއޭ މޯލްޑިވްސް ސީއީއޯކަމަށް ޢައްޔަންކުރި ޑރ. މާހިދަކީ، ޕަބްލިކް އެޑްމިނިސްޓްރޭޝަން، ސްޓްރެޓެޖިކް ޑިވެލޮޕްމަންޓް، އަދި މަތީ ތައުލީމުގެ ދާއިރާގައި މަސައްކަތްކޮށް، 20 އަހަރަށްވުރެ ގިނަ ދުވަހުގެ ތަޖުރިބާ ހޯދާފައިވާ ބޭފުޅެކެވެ. ޑރ. މާހިދު ވަނީ ސަރުކާރުގެ ދެ ވުޒާރާއެއްގައި ޕާމަނަންޓް ސެކްރެޓަރީކަން ކުރައްވާފައެވެ. އަދި އިސްލާމިކް ޔުނިވާސިޓީ އޮފް މޯލްޑިވްސްގެ ޑެޕިއުޓީ ވައިސް ޗާންސެލާ ފަދަ މުހިންމު މަގާމުތަކެއް އޭނާ އަދާކުރައްވާފައިވެއެވެ.
މި ދާއިރާތަކުގައި މަސައްކަތްކުރެއްވިއިރު، ޑރ. މާހިދު ވަނީ ގަވަރނަންސް، ފައިނޭންސް، އަދި އިންފްރާސްޓްރަކްޗާ މެނޭޖްމަންޓްގެ ދާއިރާއިން ފާހަގަކޮށްލެވޭ ޚިދުމަތްތައް ކުރައްވާފައިވާ ކަމަށް ސީއޭ މޯލްޑިވްސް އިން ވިދާޅުވެއެވެ.
ޑރ. މާހިދަކީ ޑޮކްޓަރ އޮފް ބިޒްނަސް އެޑްމިނިސްޓްރޭޝަން، މާސްޓާސް އިން ޕަބްލިކް ސެކްޓަރ މެނޭޖްމަންޓް، އަދި އެގްޒެކެޓިވް މާސްޓާސް އިން ސްޕޯޓްސް އޮގަނައިޒޭޝަން މެނޭޖްމަންޓް (މެމޮސް) ހާސިލް ކުރައްވާފައިވާ ބޭފުޅެކެވެ. އަދި ތައުލީމީ ދާއިރާއިން ބެޗްލަރ އޮފް އިންޖިނިއަރިން (އިންފޮމޭޝަން އެންޑް އިލެކްޓްރޯނިކްސް) ހާސިލްކުރުމުގެ އިތުރުން ބިޒްނަސް މެނޭޖްމަންޓް/އެޑްމިނިސްޓްރޭޝަން، އަދި އެކައުންޓިން އިން ބިޒްނަސް އެންޑް މެނޭޖްމަންޓްގެ ދާއިރާއިން ގިނަ ޑިޕްލޮމާތަކެއް ހާސިލްކޮށްފައިވެއެވެ.
އިންސްޓިޓިއުޓް އޮފް ޗާޓަޑް އެކައުންޓެންޓްސް އޮފް ދަ މޯލްޑިވްސްއަކީ ދިވެހިރާއްޖޭގެ އެކައުންޓެންސީ ޕްރޮފެޝަންއާ ގުޅޭ ކަންތައްތައް ބައިނަލްއަގުވާމީ އުސޫލުތަކާއި ހަމަތަކާ އެއްގޮތްވާ ގޮތުގެމަތިން ތަންޒީމުކޮށް، ދިވެހިރާއްޖޭގައި އެކައުންޓަންސީ ޕްރޮފެޝަނެއް ގާއިމުކޮށް، އެ ޕްރޮފެޝަން ކުރިއެރުވުމަށް މަގުފަހިކުރުމަށްޓަކައި، ރާއްޖޭގެ ޗާޓަޑް އެކައުންޓެންޓުގެ ގާނޫނުގެ ދަށުން އުފައްދަވާފައިވާ އިންސްޓިޓިއުޓްއެކެވެ.
އެ މުއައްސަސާ ޤާއިމްކޮށްފައިވަނީ 2020 ވަނަ އަހަރު ސެޕްޓެމްބަރ މަހުއެވެ.