ހުޅުމާލޭގައި ހިނގި އެކްސިޑެންޓެއްގައި 4 މީހަކަށް އަނިޔާވެއްޖެ

ހުޅުމާލެ ފޭސް އެކެއްގައި ހިންގި އެކްސިޑެންޓެއްގައި 4 މީހަކަށް އަނިޔާވެއްޖެއެވެ.

ފުލުހުން ވިދާޅުވީ، މިއަދު ހެނދުނު 2 ސައިކަލެއް ޖެހި ހިނގި އެކްސިޑެންޓުގައި، 4 މީހަކަށް އަނިޔާވެފައިވާ ކަމަށެވެ. އެގޮތުން އެ 4 މީހުންނަށް އެކި ވަރުގެ އަނިޔާވެފައިވާއިރު، އެ މީހުން ފަރުވާއަށް ހުޅުމާލެ ހޮސްޕިޓަލަށް ގެންދިޔަކަމަށް ފުލުހުން ވިދާޅުވެއެވެ. އަދި އަނިޔާވި މީހުންގެ ތެރޭގައި ކުޑަކުއްޖަކު ހިމެނޭކަމަށް ފުލުހުން ވިދާޅުވެއެވެ.

މިމައްސަލަ ތަހުޤީޤު ކުރަމުންދާ ކަމަށް ފުލުހުން ވިދާޅުވެއެވެ.

ހުޅުމާލޭގެ ހިންގާ އެކްސިޑެންޓުތައް މަދުކުރުމަށް އެޗްޑީސީއާއި ފުލުހުން ގުޅިގެން ވަނީ މަސައްކަތް ފަށާފައެވެ. އެގޮތުން މަގުތަކަށް ބައެއް ބަދަލުތައް މިހާރު ވަނީ ގެނެސްފައެވެ.