ނުރައްކާތެރިކޮށް ލޯންޗު ދުއްވި މީހުންގެ ލައިސެންސް ހިފަހައްޓައިފި

ނުރައްކާތެރިކޮށް ލޯންޗު ދުއްވި ތިން ފަރާތެއްގެ ކަނޑުއުޅަނދު ދުއްވުމުގެ ލައިސެންސް ހިފަހައްޓާފައިވާ ކަމަށް ދިވެހި ފުލުހުންގެ ޚިދުމަތުން ވިދާޅުވެއްޖެއެވެ.

ފުލުހުން ވިދާޅުވި މިމައްސަލާގައި 3 މީހުންގެ ލައިސެންސް ވަގުތީ ގޮތުން ހިފަހައްޓާފައިވަނީ އޮކްޓޫބަރ މަހުގެ 5 ވަނަ ދުވަހު ކަމަށެވެ. އަދި އެ މައްސަލައާ ގުޅޭ ލިއެކިއުންތައް ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއަށް މިހާރު ފޮނުވާފައިވާ ކަމަށް ފުލުހުން ވިދާޅުވެއެވެ. މިމައްސަލާގައި ދައިމީ ފިޔަވަޅެއް އަޅާނީ އެ ވުޒާރާއިން ކަމަށް ފުލުހުން ވިދާޅުވެއެވެ.

ފުލުހުން މިމައްސަލަ ތަހުޤީޤުކުރަން ފަށާފައިވަނީ ރަށެއްގެ ފަޅުތެރެއަށް ނުރައްކާތެރިގޮތަކަށް 3 ލޯންޗެއް ދުއްވާފައި ވަންނަ ވީޑިއޯއެއް މީސްމީޑީއާގައި ދައުރުވާން ފެށުމާއެކުއެވެ. މި ވިޑީއޯއާއި ގުޅިގެން ގިނަ ބަޔަކު ވަނީ ކަންބޮޑުވުން ފާޅުކޮށްފައެވެ.

ފުލުހުން ވަނީ މީސް މީޑިއާގައި ދައުރުވާ ވީޑިއޯއިން ފެންނަ ލޯންޗުތަކަކީ މިދިޔަ އޮގަސްޓް މަހުގެ 13 ވަނަ ދުވަހު އއ. އަތޮޅަށް ދަތުރު ކުރި ލޯންޗުތަކެއް ކަމަށް ފުލުހުން ވިދާޅުވެއެވެ.

ބަލަންޖެހޭ ވަރަށް ނުބެލުމުގެ ސަބަބުން ކަނޑުމަތީގެ ނުރައްކާތެރި ބައެއް ޙާދިސާތައް މީގެކުިރިން ހިނގާފައިވެއެވެ.