އިނގިރޭސި ޕްރިމިއަރ ލީގުގައި މިއަދު ހަވީރު ރަށުން ބޭރުގައި ނިއުކާސަލް ޔުނައިޓެޑާ ދެކޮޅަށް އެންމެ ފަހުގެ ޗެމްޕިއަން މެންޗެސްޓާ ސިޓީން ކުޅުނު މެޗު 1-1 ގެ ނަތީޖާއަކުން އެއްވަރުވެއްޖެއެވެ.
މިއީ ލީގުގައި ޖެހިޖެހިގެން ސިޓީ އެއްވަރުވި ދެވަނަ ފަހަރެވެ. އެ ޓީމު އެންމެ ފަހުން އަމިއްލަ ދަނޑުގައި ވާދަވެރި އާސެނަލްއާ ދެކޮޅަށް ކުޅުނު މެޗު ނިމުނީ 2-2 އިން އެއްވަރުވެގެންނެވެ.
މި ނަތީޖާއާއެކު ސިޓީ އަދިވެސް އޮތީ އެއްވަނައިގައެވެ. އެ ޓީމަށް މިހާތަނަށް ކުޅުނު ހަ މެޗުން 14 ޕޮއިންޓް ލިބިފައިވާއިރު، މިވަގުތު ދެވަނައިގައި އޮތް ލިވަޕޫލަށް ފަސް މެޗުން ލިބިފައިވަނީ 12 ޕޮއިންޓެވެ. ލިވަޕޫލަށް ކުރިއަށް އޮތް މެޗު ކާމިޔާބުކޮށްގެން ތާވަލްގެ އެއްވަނައަށް އެރޭނެ އެވެ. ތިނެއްގައި އޮތް އެސްޓަން ވިލާ އަށް ވެސް މިއަދަދަށް ޕޮއިންޓް ލިބިފައިވާއިރު، ލިވަޕޫލަށް ކުރިލިބެނީ ފައިދާގޯލްގެ ތަފާތުންނެވެ. ހަތަރުވަނައިގައި އާސެނަލް އޮތީ ފަސް މެޗުން 11 ޕޮއިންޓް ހޯދައިގެންނެވެ.
ސިޓީން މި މެޗަށް ނިކުތްއިރު އަނިޔާގެ ސަބަބުން އެ ޓީމުގެ އެންމެ މުހިއްމު ދެ މިޑްފީލްޑަރުން ކަމަށްވާ، ރޮޑްރީ އާއި ކެވިން ޑި ބްރޭނާ އަށް ނުކުޅެވެއެވެ. މި މެޗުގައި ނިއުކާސަލްގެ ފޯވާޑްލައިންގެ އެންމެ މުހިއްމު ކުޅުންތެރިޔާ ކަމަށްވާ، ސްވިޑެންގެ ފޯވާޑް، އަލެކްސެންޑާ އިސާކް ވެސް އަނިޔާގެ ސަބަބުން ނުކުޅެއެވެ.
ސެއިންޓް ޖޭމްސް ޕާކްގައި ކުޅުނު މި މެޗުގެ ފުރަތަމަ ހާފުގައި ސިޓީ އަށް ލީޑްނަގައިދިނީ ކްރޮއޭޝިއާ ޑިފެންޑަރު، ޔޮޝްކޯ ގްވާޑިއޯލް އެވެ. އޭނާ މި ލަނޑުޖެހީ އެ ޓީމުގެ އިނގިރޭސި ވިންގް، ޖެކް ގްރީލިޝް ދިން ބޯޅައަކުންނެވެ.
ސިޓީން ލީޑްނެގުމުގެ ކުރީން، މެޗު ފެށިގެން ފަސްވަނަ މިނެޓުގައި އެ ޓީމުގެ ސްވިޒަލޭންޑް ޑިފެންޑަރު، މެނުއަލް އަކާންޖީ ވަނީ ލަނޑެއްޖެހުމާ ގާތަށް ޖެހިލައިފައެވެ. ގްރީލިޝް ދިން ޕާހަކުން އަކާންޖީ ފޮނުވާލި މި ބޯޅަ ދިޔައީ ދަނޑިކައިރިން ބޭރަށެވެ.
އޭގެފަހުން، ސިޓީގެ މިޑްފީލްޑަރު، އިލްކާއީ ގުންޑޮގާން އަށް ލިބުނު ފުރުޞަތުގައި ފޮނުވާލި ބޯޅަ އުނދަގުލެއްނެތި ނިއުކާސަލްގެ ކީޕަރު، ނިކް ޕޯޕް ވަނީ މަތަކޮށްފައެވެ. އަދި އޭގެފަހުން، ފުރަތަމަ ހާފު ނިމެންދަނިކޮށް ނިއުކާސަލްގެ ޖޮއެލިންޓަން ފޮނުވާލި ބޯޅައެއް ސިޓީގެ ކީޕަރު، އެޑަސަން މޮރައެސް ހުއްޓުވިއިރު، ހާވީ ބާންސް ފޮނުވާލި ބޯޅަ ދިޔައީ ދަނޑިކައިރިން ބޭރަށެވެ.
ދެވަނަ ހާފުގެ ކުޅުން ފެށިގެން 13 ވަރަކަށް މިނެޓުގެ ތެރޭގައި ނިއުކާސަލުން އެއްވަރުކުރީ ލިބުނު ޕެނަލްޓީއަކުން އެންތަނީ ގޯޑަން ކާމިޔާބުކޮށްދިން ލަނޑުންނެވެ. މިއީ ޕެނަލްޓީއޭރިޔާ ތެރެއިން ގޯޑަން އަށް ސިޓީގެ ކީޕަރު، އެޑަސަން ކުރި ފައުލަށް ރެފްރީ ދިން ޕެނަލްޓީއެކެވެ.
ސިޓީން އަލުން ލީޑްނަގަން ކުރި މަސައްކަތުގެ ތެރެއިން އެ ޓީމުގެ ނޯވޭ ފޯވާޑް، އާލިން ބްރައުޓް ހާލަންޑް އާއި ބެނާޑޯ ސިލްވާގެ އިތުރުން ފަހު ހާފުގައި ކުޅެން ނިކުތް ފިލް ފޯޑެން އަށް ލިބުނު ފުރުޞަތުތަކުގެ ވެސް ބޭނުމެއްނުހިފުނެވެ. ފޯޑެން އާއި ސިލްވާ ފޮނުވާލި ހަމަލާތައް ނިއުކާސަލްގެ ކީޕަރު، ޕޯޕް ސަލާމަތްކުރިއިރު، ހާލަންޑް ބޮލުން ފޮނުވާލި ބޯޅަ ދިޔައީ ދަނޑިކައިރިން ބޭރަށެވެ.
ލީގުގައި ސިޓީ ދެން ކުޅޭ މެޗުގައި އަންނަ އޮކްޓޫބަރު މަހުގެ 5 ވަނަ ދުވަހު އަމިއްލަ ދަނޑުގައި ނިކުންނާނީ ފުލަމްއާ ދެކޮޅަށެވެ.