އިމާމުން ތާޒާކުރުމުގެ ޕްރޮގުރާމުގެ ދަށުން 6 އަތޮޅެއްގެ 272 އިމާމުން ތަމްރީނުކުރަނީ
-
ޕްރޮގުރާމް ފަށާފައިވަނީ ނ، ރ، ފ، ދ، ތ އަދި ލ އަތޮޅުގެ އިމާމުންނަށް
-
އިމާމުން ތާޒާކުރުމުގެ ޕްރޮގުރާމްގެ ދަށުން މިހާތަނަށް 157 އިމާމުން ތަމްރީންކޮށްފައިވޭ
އިސްލާމީ ކަންތައްތަކާ ބެހޭ ވުޒާރާއިން ކުރިއަށްގެންދާ އިމާމުން ތާޒާކުރުމުގެ ޕްރޮގުރާމްގެ ދަށުން 6 އަތޮޅެއްގެ 272 އިމާމުން ތަމްރީންކުރަން ފަށައިފިއެވެ.
ސޯޝަލް މީޑިޔާގައި ހިއްސާކުރެއްވި ޕޯސްޓެއްގައި އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވީ މިއަދު ފެށި އިމާމުން ތާޒާކުރުމުގެ ޕްރޮގުރާމް ޚާއްސަކޮށްފައިވަނީ ނ، ރ، ފ، ދ، ތ އަދި ލ އަތޮޅަށް ކަމަށާއި މިޕްރޮގްރާމުގައި ޖުމްލަ 272 އިމާމުން ބައިވެރިވާ ކަމަށެވެ. އަދި އަމާޒަކީ ރާއްޖޭގެ މިސްކިތްތަކުގައި ދާއިމީ ގޮތެއްގައި އިމާމްވެ ނަމާދުކުރާ ހުރިހާ އިމާމުންވެސް ތާޒާކޮށް ނިންމުންކަމަށް ވަޒީރު ވިދާޅުވިއެވެ.
އަތޮޅުތަކަށް ( ނ،ރ، ފ، ދ، ތ އަދި ލ އަތޮޅުގެ އިމާމުންނާއި ޚަޠީބުނަށް) އަމާޒުކޮށްގެން ބޭއްވޭ އިމާމުންނާއި ޚަޠީބުން ތާޒާކުރުމުގެ އޮންލައިން ޕްރޮގްރާމް ފެށުމުގެ ރަސްމިއްޔާތު މިއަދު ބާއްވައިފިއެވެ. pic.twitter.com/EkoPZHYzXP
— Ministry of Islamic Affairs (@MVIaffairs) September 11, 2024
އިމާމުން ތާޒާކުރުމުގެ ގައުމީ މަޝްރޫއުގެ ދަށުން މިހާތަނަށް 157 އިމާމުން ވަނީ ތަމްރީންކޮށްފައެވެ. އަދި މިހާތަނަށް އިމާމުން ތާޒާކުރުމުގެ ޕްރޮގްރާމް ފުރިހަމަކޮށްފައިވަނީ ގއ، ގދ އަތޮޅުން 77 އިމާމުންނާއި، ފުވައްމުލަކުން 40 އިމާމުންނާއި، މ، އަދި ވ އަތޮޅުން 40 އިމާމުންނެވެ.
އިމާމުން ތާޒާކުރުމުގެ ޕްރޮގްރާމުގައި ޖުމްލަ 9 މާއްދާއެއް ކިޔަވައިދޭކަމަށް އިސްލާމީ ކަންތައްތަކާބެހޭ ވުޒާރާއިން ވިދާޅުވެއެވެ. އެގޮތުން ޤުރްއާނާއި ތަޖުވީދުގެ ޢިލްމާއި ތަފްސީރާއި ފިޤުހާއި ޙަދީޘްގެ އިތުރުން އަޤީދާގެ ޢިލްމުގެ ދާއިރާއިން އިމާމުންނަށް ބޭނުންވާ މުހިއްމު ކަންކަން އުނގަންނައިދޭނެކަމަށް އެ ވުޒާރާއިން ވިދާޅުވެއެވެ.
ރާއްޖޭގައި ގާތްގަނޑަކަށް 700 އެއްހާ ދާއިމީ އިމާމުން އުޅެއެވެ.