ދައުރުވަމުންދާ ވީޑިއޯގައި ފެންނަނީ އުސޫލުގެ ތެރެއިން ނައްތާލާފައިވާ އުޅަނދުތަކެއް: ފުލުހުން

ސޯޝަލް މީޑިއާގައި މިހާރު ދައުރުވަމުންދާ ވީޑިއޯގައި ފެންނަނީ އުސޫލާއި އެއްގޮތަށް ނައްތާލާފައިވާ އުޅަނދުތަކެއް ކަމަށް ދިވެހި ފުލުހުންގެ ޚިދުމަތުން ވިދާޅުވެއްޖެއެވެ.

ސޯޝަލް މީޑިއާގައި މިހާރު އާންމުވެފައިވާ ވީޑިއޯއެއްގައި، މޭރީބްރައުން ކައިރީ ހުންނަ ޓޯވް ޔާޑުގައި ފުލުހުން ސައިކަލުތަކެއް، ޓްރަކަކުން ވައްޓާލާ މަންޒަރު ފެނެއެވެ. މިކަމާއި ގުޅިގެން ގިނަ ބަޔަކު ކަންބޮޑުވުން ފާޅުކޮށްފައިވެއެވެ.

މިކަމުގައި ކަން ހިނގިގޮތް ސާފުކޮށްދޭން ފުލުުހުން ނެރުނު ބަޔާނެއްގައި ވިދާޅުވީ، އާންމުވެފައިވާ ވީޑިއޯގައި ފެންނަނީ، އޮންނަ އުސޫލުގެ ތެރެއިން މިދިޔަ ހުކުރު ދުވަހު ނައްތާލާފައިވާ އުޅަނދުތަކެއް ކަމަށެވެ.

އެގޮތުން ސޯޝަލް މީޑިއާގައި އާންމުވެފައިވާ ވީޑިއޯގައި ފެންނަ އުޅަނދުތަކަކީ ނައްތާލުމަށް ހަމަޖެހިފައިވާ އުޅަނދުތަކެއްކަމަށް ފުލުހުން ވިދާޅުވިއެވެ. އަދި މިހާރު މި އުޅަނދުތައް އޮންނަ އުސޫލުގެ ތެރެއިން ނައްތާލެވިފައިވާކަން ފުލުހުން ފާހަގަކުރެއެވެ.

ނައްތާލާފައިވާ އުޅަނދުތައް:

• ދެ ފުރޮޅުލީ - 247 އުޅަނދު
• ހަތަރު ފުރޮޅުލީ - 29 އުޅަނދު
• ބައިސިކަލް - 223
• އެމްބިއުލާންސް - 1

ފުލުހުން ވަނީ ހުކުރު ދުވަހު ނައްތާލި އުޅަނދުތަކުގެ ތަފްޞީލު ހާމަކުރައްވާފައެވެ. އެގޮތުން އެ އުޅަނދުތަކަކީ އެކި ދުވަސްމަތިން ހުޅުމާލެއާއި މާލެއިން ޓޯ ކޮށްފައިވާ އުޅަނދުތަކެއްކަން ފުލުހުން ފާހަގަކުރެއެވެ.

މި ވީޑިއޯއާއި ގުޅިގެން ސޯޝަލް މީޑިއާގައި ދަނީ ފުލުހުންގެ މައްޗަށް އެކި ތުހުމަތުތައް ކުރަމުންނެވެ. ނަމަވެސް ދައުލަތުގެ މުއައްސަސާތަކުގެ މައްޗަށް ކުރާ އިތުބާރާއި، މުޖްތަމަޢުގެ އެއްބައިވަންތަކަން ގެއްލޭގޮތަށް މިފަދަ މައުލޫމާތު ނުފެތުރުމަށް ފުލުހުން ވަނީ އެދިލައްވާފައެވެ.