ރާއްޖޭގެ ނޫސްވެރިކަމުގެ ދާއިރާގެ އަލިގަދަ ތަރިންގެ ތެރެއިން ފާހަގަކޮށްލެއްވޭ އެކަކީ ދައުރު ނޫހުގެ މިހާރުގެ އެޑިޓަރ މޫސާ ލަތީފެވެ. އަބަދުވެސް ލިޔުންތެރިކަމަށް ޝައުޤުވެރިކަން ހުންނަ މޫސާ ލަތީފް ޚަބަރާއި މައުލޫމާތު ފެތުރުމުގެ ދާއިރާއިން ޝަރަފުވެރިކަމުގެ ޤައުމީ އިނާމު ހާސިލްކުރިއިރު، މިދާއިރާގައި 35 އަހަރު އޭނާ ހޭދަކޮށްފައިވެއެވެ.
މިދާއިރާއަށް ނިކުތުމުގެ ކުރިންވެސް މޫސާ ލަތީފަކީ ލިއުންތެރިކަމަށް ލޯބިކުރާ މީހެކެވެ. ލިއުންތެރިކަމަށް އުފެދުނު ލޯއްބެއްގެ ސަބަބުން 1987ގައި އޭނާގެ ނަން "ހަވީރު"ގެ ސަފުހާތަކަށް އެރިއެވެ. އޭގެ ފަހުން ދޭތެރެ ދޭތެރެއިން މޫސާ ލަތީފްގެ މަޒުމޫންތައް "ހަވީރު"ގައި ޖަހާފައިވެއެވެ.
މިއާއެކު ހަވީރު ނިއުސްރޫމަށް ވަނުމުގެ ޝައުގުވެރިކަން އުފެދި 1989ގެ ކުރީކޮޅު "ހަވީރު"ގައި މަސައްކަތްކުރުމުގެ ފުރުސަތު ހޯދިއެވެ. މި ފުރުސަތާޢެކު ހަވީރުގެ ފުލްޓައިމް މުވައްޒަފެއްގެ ހައިސިއްޔަތުން ތަޖުރިބާކާރު ނޫސްވެރިންގެ ކިބައިން އެތައްކަމެއް ދަސްކުރިއެވެ.
ހަވީރުގެ ކުޅިވަރު ރިޕޯޓަރުގެ ވަޒީފާއިން ފެށިގެން ސީނިއަރ ރިޕޯޓަރުކަން, ސަބް އެޑިޓަރުކަން, އެސިސްޓެންޓް އެޑިޓަރުކަން, ސީނިއަރ އެސިސްޓެންޓް އެޑިޓަރުކަން, އެކްޓިން އެޑިޓަރުކަން އަދި 2006ގައި ހަވީރު ވަގުތީގޮތުން ހުއްޓާލުމާ ހަމައަށް އެޑިޓަރުކަން ކުރީވެސް މޫސާ ލަތީފެވެ.
މިދިއަ 35 އަހަރުގެ ތެރޭގައި މޫސާ ލަތީފްވަނީ ހުރިހާ ސްޓައިލްތަކުގެ ލިއުންތައް ލިޔެފައެވެ. އޭގެ ތެރޭގައި ހަބަރު, ފީޗާ ނިއުސް, ބްރޭކިން ނިއުސް, ރިޕޯޓް, ފީޗާ ރިޕޯޓް, ތަހުގީގީ ރިޕޯޓް, ޕްރޮފައިލް, ކޮލަމް ހިމެނެ އެވެ. މަދު ބާވަތެއްގެ ލިއުންތައް ލިޔަމުން އައި ރާއްޖޭގެ ނޫސްވެރިކަމަށް ޒަމާނީ ލިއުންތެރިކަމުގެ ކުލަވަރު ގެނައުމުގައި މޫސާ ލަތީފްގެ ހިއްސާ ބޮޑުކަން ޔަޤީނެވެ. އޭގެ ކުރިން ރާއްޖޭގައި ލިއަމުން އައީ ޚަބަރާއި މަޒުމޫނާއި ޕްރޮފައިލް އަދި ކޮލަމް ފަދަ ނޫސްވެރިކަމުގެ މަދު ސްޓައިލްތަކެއްގެ ލިއުންތަކެވެ.
މޫސާ ލަތީފަށްވަނީ 2001 ވަނަ އަހަރުވަނީ ނޫސްވެރިކަމުގެ ރޮނގުން ގައުމީ އިނާމުވެސް ލިބިފައެވެ.
މީގެ އިތުރުން 2010 އިން ފެށިގެން 2018އާ ހަމައަށް ހަވީރާއި މިހާރުން ކޮންމެ ވޯލްޑް ކަޕް ފުޓްބޯޅަ މުބާރާތަކާ ދިމާކޮށް ނެރުނު ޚާއްސަ ފޮތުގެ އެޑިޓަރަކީ ވެސް މޫސާ ލަތީފެވެ. މިއީ އޭރުގެ ވޯލްޑް ކަޕް މުބާރާތާ ދިމާކޮށް ދިވެހިންނާ ހަމައަށް ގެނެސްދިން މައުލޫމާތުގެ ޚަޒާނާއެކެވެ.
މީގެ އިތުރުން ހަވީރުގެ ވަރަށް މުހިންމު ބްރޭންޑެއް ކަމަށްވާ ހަވީރު ސްޕޯޓްސް އެވޯޑްސް' 1994ގައި ތައާރަފުކުރުމުގައި އިސް ދައުރެއް އަދާކުރުމުގެ އިތުރުން 2010 އިން 2016އާ ހަމައަށް އެ އެވޯޑް އިންތިޒާމްކުރުމުގެ އެންމެ އިސް ފަރާތަކީ ވެސް މޫސާ ލަތީފެވެ. އެ ޒިންމާ އޭނާ ވަނީ 2017 އާއި 2018ގައި މިހާރު އެވޯޑްސްގައިވެސް އަދާކޮށްފައެވެ.
ނޫސްވެރިކަމުގައި މޫސާ ލަތީފްގެ އެންމެ ބޮޑު އެއް މަސައްކަތަކަށް 7 ފެބްރުއަރީ 2012ގެ ހާދިސާއާ ގުޅޭ ގޮތުން ލިއުއްވި 'ފެބްރުއަރީ ހަތެއް' ފޮތް ހިމެނެއެވެ. މިއީ އެތައް ބައެއްގެ އިންޓަވިއުތަކެއްގެ މައްޗަށް ބިނާކުރެއްވި އަދި އެ ހާދިސާގެ އިތުރުން ރާއްޖެ މިހާރު ދެކެމުން އަންނަ ޑިމޮކްރަސީއަށް ފުރޮޅިގެން ދިޔަ ތާރީޚުގެ މައްޗަށް ވެސް ތަހުޤީޤީ ބައިތަކެއް ހިމެނުނު ފޮތެކެވެ.
ނޫސްވެރިކަމުގެ ދާއިރާގައި ކާމިޔާބު ހަޔާތެއް ހޭދަކުރައްވާ އަދި ދާއިރާގެ އުހުގައި މިހާރުވެސް ސާބިތުވެ ހުރި މޫސާ ލަތީފް މިހާރު ހުރީ 'ދައުރު'ގެ އެޑިޓަރުކަމުގެ މަގާމުގައެވެ.