ރާއްޖޭގައި ނިއުކްލިއަރ މެޑިސިން ދާއިރާ ތަރައްގީކުރަން އައިއޭއީއޭއާ ގުޅެނީ

ނިއުކްލިއަރ މެޑިސިންގެ ދާއިރާއިން ބޭނުންވާ އެހީތެރިކަން ހޯދުމަށް އެޓޮމިކް ހަކަތައާބެހޭ ބައިނަލްއަޤްވާމީ އިދާރާ, އައި.އޭ.އީ.އޭއާ ގުޅުމުގެ މަސައްކަތް ރާއްޖެއިން ފެށުމަށް ނިންމަވައިފިއެވެ.

ސަރުކާރުން މިކަން ހާމަކުރެއްވީ ކެބިނެޓުގެ ބައެއް ނިންމުންތަކާއި ގުޅޭގޮތުން ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައެވެ.

ނޫސްވެރިންނަށް މައުލޫމާތު ދެއްވަމުން ޚާރިޖީ ވަޒީރު މޫސާ ޒަމީރު ވިދާޅުވީ، ރާއްޖެއިން އެޓޮމިކް ހަކަތައާބެހޭ ބައިނަލްއަޤްވާމީ އިދާރާއާ ގުޅެނީ އެކަމުގެ ސަބަބުން ރާއްޖެއަށް ފައިދާތަކެއް ލިބެން އޮތުމުންކަމަށެވެ. އެގޮތުން އެ ޖަމިއްޔާއާ ގުޅުމުން ނިއުކްލިއަރ މެޑިސިންގެ ދާއިރާއިން ރާއްޖެއަށް އެހީތެރިކަން ލިބިގެންދާނެ ކަމަށެވެ.

ރާއްޖޭގައި ކެންސަރު ހޮސްޕިޓަލެއް ޤާއިމް ކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ވަޢުދެކެވެ. މި ބައްޔަށް ފަރުވާ ދިނުމުގައި ނިއުކްލިއަރ މެޑިސިންގެ އެކި ފަރުވާތައް ބޭނުން ކުރާއިރު އެކަމާއި ގުޅޭ ބައިނަލްއަޤްވާމީ އިދާރާރާއަކީ އައިއޭއީއޭކަން ޚަރިޖީ ވަޒީރު ފާހަގަކުރެއްވިއެވެ.

"ރައީސްގެ އެޖެންޑާގައި އެބައޮތް ކެންސަރ ހޮސްޕިޓަލް ވަރަށް އަވަހަށް ޚިދުމަތްދިނުން. އެކަމަށް ޒަމާނީ ބޭސްފަރުވާގައި ބޭނުންވޭ އެޓޮމިކް އެޖެންސީގެ އެހީތެރިކަން. މިކަމަށް ބޭނުންާ ބައެއް ވަސީލަތް ހޯދުމާއި ވެސްޓްމެނޭޖުމަންޓް. މިއީ އައިއޭއީއޭގެ މެންޑޭޓްގައި ހިމެނޭކަމެއް." ޒަމީރު ވިދާޅުވިއެވެ.

އައިއޭއީއޭއާ ގުޅުމަށް ރާއްޖެއިން ނިންމާފައިވާއިރު އެ މަސައްކަތުގައި އުސްކޮށް ހަރަކާތްތެރިވާނީ ދިފާޢީ ވުޒާރާއިންކަމަށް ސަރުކާރުން ވިދާޅުވެއެވެ. އަދި މިމަސައްކަތަކީ ދިގު މުއްދަތެއްގެ ތެރެއިން ކުރެވޭނެ މަސައްކަތެއްކަން ސަރުކާރުން ފާހަގަކުރައްވައެވެ. އެގޮތުން އެ ޖަމުއިއްޔާގައި ރާއްޖެއިން ބައިވެރިވުމަށް ވަޒީރުން މަޖިލީހުން ނިންމެވުމުން ރައްޔިތުންގެ މަޖިލީހަށް އެކަން ހުށަހަޅައި މަޖިލީހުން ފާސްކުރަންޖެހެއެވެ.

އައިއޭއީއޭއާ ގުޅުމުން ނިއުކްލިއަރ މެޑިސިންގެ ދާއިރާގެ އިތުރުން އިއާދަކުރަނިވި ހަކަތައިގެ ދާއިރާއިންވެސް ފައިދާތަކެއް ކުރާނެކަމަށް ސަރުކާރުން ވިދާޅުވެއެވެ.

އިންޓަރނޭޝަނަލް އެޓަމިކް އެނާޖީ އެޖެންސީން (އައިއޭއީއޭ) އަކީ 29 ޖުލައި 1957 ވަނަ އަހަރު އުފެއްދި ޖަމީއްޔާއެކެވެ. މިއީ ހަނގުރާމައިގެ ބޭނުމަށް ނިއުކްލިއަރ ހަކަތަ ބޭނުންކުރިޔަ ނުދިނުމަށާއި، އޭގެ ފައިދާ ރަނގަޅުގޮތުގައި ބޭރުކުރުމަށް އެހީތެރިވެދިނުމަށް އުފައްދާފައިވާ ޖަމީއްޔާއެކެވެ. މި ޖަމުއިއްޔާގައި މިހާރުވެސް 178 މެންބަރު ޤައުމު ހިމެނެއެވެ. މި ސަރަހައްދުން މި ޖަމުއިއްޔާގައި ބައިވެރިނުވަނީ ހަމައެކަނި ރާއްޖެއާއި ބޫޓާނެވެ..