އެމްއާރުއެމް އުވާލަން އިލެކްޝަންސް ކޮމިޝަނުން އަނެއްކާވެސް ނިންމައިފި
-
އެމްއާރުއެމްގެ 3000 މެންބަރުން ހަމަނުވޭ
-
މެންބަރުން ހަމަކުރަން އެމްއާރުއެމުން މަސައްކަތް ނުކުރާކަމަށް ތުހުމަތުކުރި
ކުރީގެ ރައީސް މަޢުމޫން އަބްދުލްޤައްޔޫމް އިސްވެ ހުންނަވައިގެން އުފެއްދި މޯލްޑިވްސް ރިފޯމް މޫވްމަންޓް، އެމްއާރުއެމް އުވާލުމަށް އިލެކްޝަންސް ކޮމިޝަނުން ނިންމަވައިފިއެވެ.
އެ ކޮމިޝަނުން މިގޮތަށް ނިންމެވީ ޤާނޫނުން ލާޒިމްކުރާ 3000 މެންބަރުންގެ ޢަދަދު ހަމަނުވާތީކަމަށް އިލެކްޝަންސް ކޮމިޝަނުން ވިދާޅުވިއެވެ. ސިޔާސީ ޕާޓީގެ ޤާނޫނު ބުނާގޮތުން ކޮންމެ ސިޔާސީ ޕާޓީއެއްގައިވެސް މަދުވެގެން 3000 މެންބަރުން ހަމަވާންޖެހޭނެއެވެ.
އިލެކްޝަންސް ކޮމިޝަނުން ވަނީ މީގެ ކުރިންވެސް އެމްއާރުއެމް އުވާލުމަށް ނިންމަވާފައެވެ. ނަމަވެސް އެމްއާރުއެމުން ވަނީ އެ މައްސަލަ ސިވިލް ކޯޓަށް ހުށަހަޅާފައެވެ. އެ ކޯޓުން ވަނީ އެމްއާރުއެމް އުވާލުމަށް އިލެކްޝަނުން ނިންމީ ޤާނޫނާއި ޚިލާފަށްކަމަށް މިދިޔަ ފެބްރުއަރީ މަހު ނިންމަވާފައެވެ.
ސިވިލް ކޯޓުގެ ހުކުމުގައި، އެމްއާރުއެމް އުވާލަން އިލެކްޝަންސް ކޮމިޝަނުން ދިން ނޯޓިސްއަކީ ސިޔާސީ ޕާޓީތަކުގެ ޤާނޫނާ ޚިލާފަށް ދީފައިވާ ނޯޓިސްއެއްކަމަށް ވަނީ ވިދާޅުވެފައެވެ. އެގޮތުން، މެންބަރުންގެ ޢަދަދު ކަށަވަރުކޮށްދޭން ނޯޓިސް ދިނުމުގައި އަމަލުކުރަންޖެހޭ ގޮތަށް އިލެކްޝަންސްއިން އަމަލު ކޮށްފައިނުވާކަމަށާއި، އޭގެ ގެއްލުން އެމްއާރުއެމުން އުފުލަން ނުޖެހޭނެ ކަމަށް ސިވިލް ކޯޓުގެ ޙުކުމުގައިވެއެވެ.
ސިވިލް ކޯޓުގެ ނިންމުން އިލެކްޝަންސް ކޮމިޝަނުން ވަނީ ހައި ކޯޓުގައި އިސްތިއުނާފުކޮށްފައެވެ.
އިލެކްޝަންސް ކޮމިޝަންގެ ސެކްރެޓަރީ ޖެނެރަލް ޢަބްދުﷲ އުނައިސް ވިދާޅުވީ އެމްއާރުއެމް އުވާލުމަށް އެ ކޮމިޝަނުން އަނެއްކާވެސް ނިންމެވީ ސިވިލް ކޯޓުގެ ހުކުމަށްފަހުވެސް މެންބަރުން ހަމަކުރަންޖެހޭ މުއްދަތުގައި މެންބަރުން ހަމަނުވާތީކަމަށެވެ. އެގޮތުން، ކޯޓު އަމުރަށް މިހާރު 6 މަސްދުވަސްވެފައިވާއިރު މެންބަރުން އިތުރުކުރުމަށް އެ ޕާޓީން މަސައްކަތްކޮށްފައިނުވާ ކަމަށްވެސް އިލެކްޝަންސް ކޮމިޝަނުގެ ސެކްރެޓަރީ ޖެނެރަލް ވިދާޅުވިއެވެ.