މިހާތަނަށް އެންމެ ގިނަ ކޮންޓެއިނަރު ހިފައިގެން އައި ބޯޓާއެކު ބަނދަރުގެ ޖާގަ އިތުރުކޮށްފި

މާލެ ވިޔަފާރި ބަނދަރުގެ ކޮންޓެއިނަރު ޖެހޭނެ ޖާގަ އިތުރުކޮށް، އިތުރު 100 ކޮންޓެއިނަރު ޖެހޭނެ ޖާގަ ތައްޔާރުކުރަމުންދާ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ހާމަކޮށްފިއެވެ.

މާލެ ވިޔަފާރި ބަނދަރުގެ ކޮންޓެއިނަރު ޖެހުމުގެ ޖާގަ އިތުރުކޮށްފައިވަނީ، މާލެ ވިޔަފާރި ބަނދަރަށް މިހާތަނަށް އެންމެ ގިނަ ކޮންޓެއިނަރު ހިފައިގެން އައި ބޯޓު ބަނދަރުކުރުމާއި ގުޅިގެންނެވެ. މިބޯޓުގައި ޖުމްލަ 1836 ކޮންޓެއިނަރު ގެނައެވެ. މިބޯޓުން ގެނައި ކޮންޓެއިނަރުތަކަކީ މެލޭޝިއާ އާއި ސިންގަޕޯރުގައި ރާއްޖެ ނުގެނެވި ގިނަދުވަސްތަކެއްވެފައިވާ ކޮންޓެއިނަރުތަކެއްކަން އެމްޕީއެލްއިން ފާހަގަ ކުރެއެވެ.

މިބޯޓާއި މިވަގުތު މާލޭ ވިޔަފާރި ބަނދަރަށް ކައިރިކޮށްފައިވާ އެހެން ބޯޓު ފަހަރުގައި ހިމެނޭ ކޮންޓެއިނަރުތަކާއެކު، މިފާއިތުވި ހަފުތާގައި ބާލަންޖެހޭ ކޮންޓެއިނަރުގެ އަދަދު ވަނީ 3000އިން މަތިވެފައެވެ. އެގޮތުން ބަނދަރަށް ބާލަންޖެހޭ ކޮންޓެއިނަރާއި، މާލޭ ވިޔަފާރި ބަނދަރުގައި މިވަގުތު ހުރި ކޮންޓެއިނަރުތަކާއެކު ބަނދަރުގެ ކެޕޭސިޓީއަށްވުރެ ދެ ގުނަ އިތުރު ކަމަށް އެމްޕީއެލްއިން ވިދާޅުވެއެވެ.

އަދި މާލޭ ވިޔަފާރި ބަނދަރުގައި ބާލަން ޖެހޭ ކޮންޓެއިނަރުގެ އަދަދު އާދަޔާ ޚިލާފަށް މަތިވި ދަނޑިވަޅުގައި މޫސުން ގޯސްވުމުގެ ސަބަބުން، އޮޕަރޭޝަންތައް ކުރިއަށް ގެންދިއުމަށް ދަތިތަކެއް ކުރިމަތިވިކަމަށް އެކުންފުނިން ވަނީ ފާހަގަކުރައްވާފައެވެ.

މިއާއެކުވެސް، ހޮނިހިރު ދުވަހު މެނދުރު 12:00 އާއި ހަމައަށް މިބޯޓުން ޖުމްލަ 949 ކޮންޓައިނަރު ބާލައި، ބާލަން ޖެހޭ ކޮންޓެއިނަރުގެ އަދަދު ވަނީ ދެ ބައިކުޅަ އެއް ބަޔަށް ކުޑަކޮށްފައެވެ.

އެމްޕީއެލްއިން ވިދާޅުވީ، މާލޭ ވިޔަފާރި ބަނދަރަށް ބާލަންޖެހޭ ކޮންޓެއިނަރުގެ އަދަދު މި ދުވަސްވަރު އާދަޔާ ޚިލާފަށް މަތިވުމާއި ގުޅިގެން، މާލޭ ވިޔަފާރި ބަނދަރުން މުދާ ބޭލުމުގެ މަސައްކަތްތަކަށް ހޭދަވާ މުއްދަތު ކުރިއަށްވުރެ ބޮޑުވުން އެކަށީގެންވާ ކަމަށެވެ. މިއާއެކު ކަސްޓަމަރުންނަށް ދިމާވެދާނެ ދަތިތަކަށް ކުންފުނިން މާޢާފަށް އެދެއެވެ.

މާލޭ ވިޔަފާރި ބަނދަރުގެ ޖާގައިގެ ދަތިކަން ހައްލު ކުރުމަށް މި އަހަރުގެ ތެރޭގައި ކުރެވުނު މަސައްކަތުގެ ތެރެއިން، މާލޭ ވިޔަފާރި ބަނދަރުގެ ޔާޑް ސަރަހައްދުން 250 ކޮންޓެއިނަރު ޖެހޭނެ އިތުރު ޖާގައެއް ހަމަޖައްސާފައިވާ ކަމަށް އެމްޕީއެލްއިން ވިދާޅުވެއެވެ. އަދި އިތުރު 100 ކޮންޓެއިނަރު ޖެހޭނެ ޖާގައެއް ހެދުމުގެ މަސައްކަތް މިހާރުވެސް ކުރިއަށްދާކަން އެކުންފުނިން ފާހަގަކުރައްވައެވެ.

އެމްޕީއެލްއިން ވިދާޅުވީ އެކުންފުނިން ދަނީ މުދަލުގެ ވެރިފަރާތްތަކަށް ރައްކާތެރިކަމާއިއެކު، ވީހާވެސް އަވަސް، ލުއި ފަސޭހަ ޚިދުމަތެއް ފޯރުކޮށްދިނުމަށް މަސައްކަތް ކުރަމުންނެވެ. އަދި ޚިދުމަތް އިތުރަށް ފުޅާކޮށް، މިހާރަށްވުރެ ލުއިފަސޭހަވާނެހެން ބަނދަރުގައި ތޮއްޖެހުން ކުޑަކުރުމަށް ވީހާވެސް އަވަހަށް މުދާ ކްލިއަރ ކުރުމަށް އެމްޕީއެލްއިން ވަނީ އެދިވަޑައިގެންފައެވެ.