ސްޕޯޓްސް ފިޝިން ތަރައްޤީކުރުމުން އިންވެސްޓްމަންޓްތަކާއި ވަޒީފާތައް އިތުރުވާނެ: ވަޒީރު ޝިޔާމް
-
ސްޕޯޓްސް ފިޝިންގ ހާބަރުތައް ޤާއިމްކުރުމަކީ ރައީސްގެ ވަޢުދެއް
-
ހާބަރުތައް ޤާއިމްކުރާނެ 5 ސަރަހައްދެއް ވަނީ ކަނޑައަޅާފައި
ސްޕޯޓްސް ފިޝިން ތަރައްޤީކުރުމަށް ކުރެވޭ މަސައްކަތާއެކު އިންވެސްޓްމަންޓްތަކާއި ވަޒީފާގެ ފުރުޞަތުތައް އިތުރުވެގެންދާނެކަމަށް މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަޙުމަދު ޝިޔާމް ވިދާޅުވެއްޖެއެވެ.
ރާއްޖޭގައި ސްޕޯޓްސް ފިޝިންގެ ހަރަކާތްތައް އިތުރުކޮށް، އެކަމަށް ބޭނުންވާ ވަޞީލަތްތައް އިތުރުކުރެއްވުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވަޢުދުތަކުގެ ތެރޭގައި ހިމެނޭ މުހިއްމު ވަޢުދުފުޅެކެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވަޢުދުގެ ދަށުން ސަރުކާރުން މިހާރު ގެންދަވަނީ ސްޕޯޓްސް ފިޝިންއަށް ޚާއްސަ ހާބަރުތަކެއް ނުވަތަ ބަނދަރުތަކެއް ތަރައްޤީކުރުމުގެ މަސައްކަތް ކުރައްވަމުންނެވެ.
މި ހާބަރުތައް ތަރައްޤީކުރުމަށް ހަމަޖެހިފައިވަނީ މަހުގެ ވިޔަފާރިކުރާނެ ގޮޅިތަކާއި މުބާރާތްތައް ރާވާ ހިންގާނެ އިދާރީ އޮފީހަކާއި ރެސްޓޯރަންޓް އަދި ކެފޭތަކާއި މަސްވެރިކަމާއި ގުޅޭ ތަކެތި ވިއްކާ އަދި ހިދުމަތްދޭ ތަންތަނާ، ބާބަކިޔު ހެދޭނެ އިންތިޒާމްތަކާވެސްއެކުއެވެ.
މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަޙުމަދު ޝިޔާމް ވިދާޅުވީ ސްޕޯޓް ފިޝިންއަކީ މަސްވެރިކަން ސިންދަފާތުކުރުމަށް ކުރާ މަސައްކަތުގެ ދަށުން ކުރިއަށްގެންދާ މުހިއްމު މަސައްކަތެއްކަމަށެވެ. އެގޮތުން ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވަޢުދުފުޅާއި އެއްގޮތަށް ޤާއިމްކުރާ ސްޕޯޓްސް ފިޝިން ހާބަރުތައް ތަރައްޤީކުރާނެ 5 ސަރަހައްދެއް މިހާރު ކަނޑައަޅާފައިވާކަމަށެވެ.
"ސްޕޯޓްސް ފިޝިންއަކީ ވަރަށް ގިނަ ބައެއްގެ މެދުގައި މަޤްބޫލްވަމުން އަންނަ ކަމެއް. އަޅުގަނޑުމެންގެ އަމާޒަކީ ރާއްޖޭގައި މި ހަރަކާތްތެރިވާ ސްޕޯޓް ފިޝިންގ ކޮމިއުނިޓީގެ އިތުރުން ބޭރުގެ ފަރާތްތަކަށްވެސް މި ހާބަރުތަކަކީ ނުވަތަ ތަރައްޤީކުރާ ތަންތަނަކީ އެ ފަރާތްތަކަށްވެސް ބޭނުންވާ ހައްލުތައް ލިބޭނެ ތަންތަންކަމުގައި ހެދުން" ވަޒީރު ޝިޔާމް ވިދާޅުވިއެވެ.
ވަޒީރު ޝިޔާމް ވިދާޅުވީ މިއީ ސްޕޯޓްސް ފިޝިންގ ހާބަރުތައް ޤާއިމްކުރުމަކީ ރާއްޖެއަށް ބޭރުގެ އިންވެސްޓްމަންޓްތައްވެސް އިތުރުވެގެންދާނެ ކަމެއްކަމަށެވެ. އަދި އެކަމުގެ ސަބަބުން ދައުލަތަށް ވަންނަ އާމްދަނީ އިތުރުވެ، އިތުރު ވަޒީފާތައްވެސް އުފެދިގެންދާނެކަމަށް ވަޒީރު ވިދާޅުވިއެވެ.
ވަޒީރު ވިދާޅުވީ ސްޕޯޓްސް ފިޝިންގެ އިތުރުން ފަރުމަހުގެ މަސްވެރިކަންވެސް ތަރައްޤީކުރުމަށް ދަނީ ގިނަ މަސައްކަތްތަކެއް ކުރަމުންކަމަށެވެ. އެގޮތުން ފަރުމަސްވެރިކަންކުރާ ފަރާތްތަކާއި އެ ޕްރޮސެސްކުރާ ފަރާތްތަކަށް ހާއްސަކޮށްގެން ލޯނު ސްކީމެއްވެސް ތައްޔާރުކޮށް، އެކަމަށް ހުޅުވާލާފައިވާކަން ވަޒީރު ފާހަގަކުރެއްވިއެވެ.
"އެ ލޯނު ސްކީމްވެސް އިއުލާންކޮށް، ކުރިމަތިލީ ފަރާތްތަކުގެ އެޕްލިކޭޝަންތައް ވުޒާރާއިން ވަނީ އިވެލުއޭޓްކޮށްފައި. އެސްޑީއެފްސީ މެދުވެރިކޮށް ހުޅުވާލާ ؛ލޯނު ސްކީމެއް. ލަސްތަކެއް ނުވެ ހައްޤުވެރިންނަށްވެސް އެ ލޯނުތައް ދޫކުރެވިގެންދާނެ" ވަޒީރު ވިދާޅުވިއެވެ.
ސްޕޯޓްސް ފިޝިންގއާއި ފަރުމަހުގެ މަސްވެރިކަން އިތުރަށް ފުޅާކުރުމަށް ސަރުކާރުން މަސައްކަތްކުރަމުންދާއިރު، މިއީ މަސްވެރިކަމާއި އިޤްތިޞާދީ މަސައްކަތްތައް ފުޅާކޮށް، އެކަމުން ލިބޭ އާމްދަނީ އިތުރުކުރުމަށް ސަރުކާރުން ކުރާ މަސައްކަތްތަކެެކެވެ. މިކަންކަމުގެ އިތުރުންވެސް މެރިކަލްޗަރއާއި، ބޮޑު ކަންނެލީގެ މަސްވެރިކަންވެސް އިތުރަށް ފުޅާކޮށް ކުރިއެރުވުމަށް ސަރުކާރުން ދަނީ ގިނަ މަސައްކަތްތަކެއް ކުރައްވަމުންނެވެ.