ރައީސުލްޖުމްހޫރިއްޔާ "މޯލްޑިވްސް ފުޑް އެންޑް ޑްރަގް އޮތޯރިޓީ" އަލުން ގާއިމުކުރައްވައިފި

މިއަދު އަމަލުކުރަން ފެށި ކާބޯތަކެތީގެ ރައްކާތެރިކަމުގެ ޤާނޫނުގެ ދަށުން މޯލްޑިވްސް ފުޑް އެންޑް ޑްރަގް އޮތޯރިޓީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު އަލުން ޤާއިމްކުރައްވައިފިއެވެ. މި އޮތޯރިޓީ ހިނގަމުންދާނީ ސިއްޙަތާ ބެހޭ ވުޒާރާގެ ދަށުންނެވެ.

ރައީސުލްޖުމްހޫރިއްޔާ، މޯލްޑިވްސް ފުޑް އެންޑް ޑްރަގް އޮތޯރިޓީ ގާއިމުކުރެއްވުމާ ގުޅިގެން، މިހާތަނަށް މިނިސްޓްރީ އޮފް ހެލްތުގެ ދަށުން ހިނގަމުންއައި، މޯލްޑިވްސް ފުޑް އެންޑް ޑްރަގް އޮތޯރިޓީ މިއަދުން ފެށިގެން ވަނީ އުވާލައްވާފައެވެ.

ދައުލަތުގެ އިދާރާތަކުން މޯލްޑިވްސް ފުޑް އެންޑް ޑްރަގް އޮތޯރިޓީއަށް ލިޔުއްވާ ސިޓީގައި ޖައްސަވަމުން ގެންދަވާނީ، ކާބޯތަކެތީގެ ރައްކާތެރިކަމުގެ ޤާނޫނަށް ޢަމަލުކުރަން ފެށުމުގެ ކުރިން މިނިސްޓްރީ އޮފް ހެލްތުގެ ދަށުން ހިނގަމުންއައި، މޯލްޑިވްސް ފުޑް އެންޑް ޑްރަގް އޮތޯރިޓީއަށް ހަމަޖައްސަވައިފައިވާ ނަންބަރު 182 ކަމަށް ރައީސުލްޖުމްހޫރިއްޔާގެ އޮފީހުން ވިދާޅުވެއެވެ.

މީގެ ކުރިން އޮތް މޯލްޑިވްސް ފުޑް އެންޑް ޑްރަގް އޮތޯރިޓީ، އެމްއެފްޑީއޭއަކީ 2006 ވަނަ އަހަރު އޭރުގެ ރައީސުލްޖުމްހޫރިއްޔާ އުފެއްދެވި ތަނެކެވެ. އޭރުވެސް ކާބޯތަކެއްޗާއި ބޭހާއި ބެހޭ މިންގަނޑުތައް ކަނޑައަޅައި، އެކަން ވިލަރެސް ކުރުމުގެ މަސައްކަތް ކުރަނީ އެމްއެފްޑީއޭންނެވެ. އެއިދާރާގެ މަސައްކަތްތައް ފުޅާވި ނަމަވެސް ޤާނޫނީ ބާރުވެރިކަމެއް އެހާ ބޮޑަށް ލިބިފައެއް ނުވެއެވެ. އެގޮތުން ކާބޯތަކެތި ވިއްކާތަންތަން އިންސްޕެކްޓް ކުރެވުނު ނަމަވެސް ޤަވާއިދާއި ޚިލާފަށް ހުރިތަންތަނާއި މެދު މާބޮޑު ފިޔަވަޅެއް އެޅެން ނޯވެއެވެ.

އެގޮތުން ކާބޯތަކެތި ތައްޔާރުކުރާ ތަންތަން ބަލައި ފާސްކުރުމާއި، އެމްއެފްޑީއޭގެ މިންގަނޑުތަކަށް ސާފުތާހިރުކަން ނުހުންނަ ތަންތަން ބަންދުކުރުމުގެ ބާރު މީގެކުރިން އޮތީ ވަރަށް ބޮޑަށް ހަނިކުރެވިފައެވެ. އަދި ވިޔަފާރިއެއްގެގޮތުގައި ރަޖިސްޓްރީކޮށްގެން ހިންގާ ތަންތަނާއި ކެފޭ ހޮޓާ އަދި ރެސްޓޯރެންޓްތައް ބެލުން ފިޔަވާ ފުޅާދާއިރާއެއްގައި ކާބޯތަކެތި ހަދައިގެން ވިއްކަމުންދިޔަ ދިޔުން ބެލޭނެ ބާރެއް ނިޒާމު އޮތްގޮތުން މީގެކުރިން އެމްއެފްޑީއޭއަކަށް ނެތެވެ.

މިހާތަނަށް އެމްއެފްޑީއޭން އަމަލުކުރަމުން އަންނަ ގޮތަކީ ރާއްޖެ އެތެރެކުރާ ބާވަތްތަކުގެ ތެރެއިން ރައްކާތެރި ނޫން ބާވަތެއް ފާހަގަ ކުރެވުމުން އާންމުންގެ ސަމާލުކަމަށް އެކަން ގެނައުމެވެ. އަދި އެ ބާވަތްތައް އެތެރެކޮށް ނުވިއްކުމަށް އެންގުމެވެ. ނަމަވެސް އެގޮތަށް އަންގާ އެންގުންތައް ތަންފީޒު ކުރުމުގެ ޤާނޫނީ ބާރުވެރިވެރިކަމެއް ނޯވެއެވެ. ނަމަވެސް އަލަށް އަމަލުކުރަން ފެށި ކާބޯތަކެތީގެ ރައްކާތެރިކަމުގެ ޤާނޫނުގެ ދަށުން މިހާރު އެގޮތަށް އަންގާ އެންގުމާއެކު ބާޒާރުން ތަކެތި ނެގުމަށް ރީކޯލް ނޯޓިސް ނެރެ، އެއަށް ޢަމަލުނުކުރުމަކީ ޤާނޫނީ ކުށެއްގެ ގޮތުގައި ކަނޑައަޅައި 10،000ރ. އާއި 1،000،000ރ. ދެމެދު އަދަދަކުން ޖޫރިމަނާ ކުރުމުގެ ބާރު އެއޮތޯރިޓީއަށް ވަނީ ލިބިފައެވެ.

އަލަށް އަމަލުކުރަންފެށި ޤާނޫނާއެކު އެމްއެފްޑީއޭއަށް ބާރުވެރިކަން ލިބި، ކާބޯތަކެތި އުފައްދާ، ވިއްކާ، އަދި ގުދަންކުރާ ތަންތަން ބަލައި ފާސްކުރުމާއި، މިންގަނޑަށް ނުހުންނަ ތަންތަނަށް ފިޔަވަޅު އެޅުމުގެ ބާރު ލިބިދެއެވެ. ހަމައެއާއެކު ޤާނޫނު ތަންފީޒުކުރެވޭ މިންވަރު ބަލައި މޮނިޓަރކުރެވޭ ނިޒާމެއް ޤާއިމުކުރުމަށް އެމްއެފްޑީއޭއަށް ލާޒިމުކުރެއެވެ.

މީގެ އިތުރުން އެމްއެފްޑީއޭ ހިންގުމަށް ޑިރެކްޓަރ ޖެނެރަލެއް ޤާނޫނުގެ ދަށުން އައްޔަން ކުރާނެއެވެ. އެގޮތުން ކާބޯތަކެތީގެ ރައްކާތެރިކަމާ ގުޅޭގޮތުން އެއޮތޯރިޓީން އަދާކުރަންޖެހޭ މަސްއޫލިއްޔަތުތަކާ ގުޅިގެން ނިންމާ ނިންމުންތަކާ ގުޅޭގޮތުން ޑިރެކްޓަރ ޖެނެރަލް ވަޒީރަށް ޖަވާބުދާރީވެ ވަޑައިގަންނަވާނެއެވެ.

އަލަށް ޤާއިމްކުރެއްވި މޯލްޑިވްސް ފުޑް އެންޑް ޑްރަގް އޮތޯރިޓީއަށް ޤާނޫނީ ބާރުވެރިކަން ވަނީ ވަރަށް ބޮޑަށް ލިބިފައެވެ. އަދި މީގެ ސަބަބުން ރާއްޖޭގެ ކާބޯތަކެތީގެ ރައްކާތެރިކަން ވަރަށް ބޮޑަށް ކަށަވަރުވެގެންދާނެ ކަމަށް ސަރުކާރާއި ކަމާއި ބެހޭ އިދާރާތަކުން ޤަބޫލުކުރެއެވެ.